Zozie 10 - NYANMIƐN NDƐ'N 1998

Zozie kwlali Amɔrfuɛ mun

¹ Adɔni-Zedɛk b'ɔ ti Zerizalɛm famiɛn'n, ɔ tili i kɛ Zozie kwlali Aifuɛ mun nan ɔ nunnunnin klɔ'n mlɔnmlɔnmlɔn, yɛ ɔ kunnin i famiɛn'n kɛ ɔ fa kunnin Zeriko liɛ'n sa. Ɔ tili i ekun kɛ Gabaɔnfuɛ'm be nin Izraɛlfuɛ'm b'a tra aenguɛ nan be nin be yɛ be tran-an.

² Sa sɔ'm be sanngannin Zerizalɛmfuɛ'm be akunndan afin Gabaɔn i dan tra Ai, kusu famiɛn klɔ'm be nyrun ba-man nyan trɛ-mɛn i. Yɛ Gabaɔn sonja'm be ti alɛ kunfuɛ kpakpa ngunmin.

³ Adɔni-Zedɛk b'ɔ ti Zerizalɛm famiɛn'n ɔ sunmannin sran Ɔam b'ɔ ti Ebrɔn famiɛn'n, ɔ nin Piream b'ɔ ti Zarmit famiɛn, ɔ nin Zafia b'ɔ ti Lakis famiɛn'n, ɔ nin Debir b'ɔ ti Eglɔn famiɛn'n bé sin. Ɔ fali ndɛ nga wlali bé nuan:

⁴ «Gabaɔnfuɛ'm be nin Zozie b'a tra aenguɛ. I sɔ'n ti, amun bla wa uka min nan e nin be e kun.»

⁵ Yɛ Amɔr famiɛn nnun'n: Zerizalɛm famiɛn'n, nin Ebrɔn famiɛn'n, nin Zarmit famiɛn'n, nin Lakis famiɛn'n, ɔ nin Eglɔn famiɛn'n, be kan boli nun, be nin be alɛ kunfuɛ mun kwlaa be ɔli kɛ be nin Gabaɔnfuɛ'm be ´ko kun.

⁶ Gabaɔnfuɛ'm be mannin Zozie ngaliɛ Gilgal lɔ kɛ: «E bɔ e ti ɔ sran mun'n, e yɛ Amɔr famiɛn nga be tran oka'm be su'n b'a ju b'a gua é su yɛ. Bla ndɛndɛ bla wa uka ye, bla wa de ye!»

⁷ Zozie ɔ'a jranjran-man, ɔ fɛli i sonja kpakpa mun nin i alɛ kunfuɛ'm be kwlaa.

⁸ Anannganman seli i kɛ: «Nán sro be, m'an fa be m'an man wɔ, be wie fi su jran-man ɔ nyrun.»

⁹ Zozie nin i alɛ kunfuɛ'm be nantili kɔnguɛ wunmuan'n, kpɛkuun be wa fuli Amɔrfuɛ'm be nun.

¹⁰ Anannganman man b'a jran-man Izraɛlfuɛ'm be nyrun. Be kwlali be kwlalɛ kpa Gabaɔn wun lɛ. Be suli be su Bɛt-Ɔrɔn kpɔlɛ'n su lele fa juli Azeka nin Makeda. Kɛ be ´kɔ'n, wuun be ´kun be.

¹¹ Amɔrfuɛ'm be wie'm be wanndi kpɛnnin Bɛt-Ɔrɔn sin lɔ. Kɛ be fɛ lɛ lele ´ju Azeka'n, Anannganman man nzraama dandan kpa bɔ kɛ nzue tɔ'n be gua'n be guali be su lele fa juli Azeka. Ɔ man sran nga nzraama sɔ'm be kunnin be'n, be sɔnnin tra be nga Izraɛlfuɛ'm be kunnin be tokofi nun'n.

¹² Kɛ Anannganman fali Amɔrfuɛ mun wlali Izraɛlfuɛ'm bé sa nun, cɛn sɔ nun'n, yɛ Zozie srɛli Anannganman Izraɛlfuɛ'm be nyrun lɛ, ɔ seli kɛ: «Wia, jran Gabaɔn ti su nglo lɛ! Anglo, nán tu ɔ bo Azalɔn kongo'n su!»

¹³ Wia'n nin anglo'n be jrannin lele san Izraɛl nvle'n kwlali i kpɔfuɛ mun. Kɛ ɔ ti klɛwa Sran Kpa'n i fluwa nun'n sa, wia'n yacili nantilɛ lele cɛn wunmuan kun, ɔ'a tɔ-man.

¹⁴ Anannganman nian nian-man sran nuan ndɛ su nian yo-man sa kɛ nga sa le, yɛ kɛ ɔ fin i lɛ b'ɔ fa ju ndɛ'n, cɛn kɛ nga lɛ sa i wun su nian ju-man le yɛ ɔ su ju-man le. Anannganman nian yo-man i sɔ like kun. Nanwlɛ, le kun sɔ'n Anannganman ukali Izraɛlfuɛ mun yɛ be kunnin alɛ nin-ɔn.

¹⁵ Kɛ ɔ yoli sɔ'n, Zozie nin Izraɛlfuɛ'm be sali be sin Gilgal nanmue nun lɔ.

Zozie kunnin Amɔr famiɛn nnun'n

¹⁶ I blɛ sɔ nun'n, wuun Amɔr famiɛn nnun'm b'a wanndi b'a ko fia Makeda lɔ yɛbuɛ buɛ nun.

¹⁷ Be ko kan kleli Zozie kɛ: «Famiɛn nnun'm be fia Makeda yɛbuɛ buɛ nun lɔ.»

¹⁸ Yɛ Zozie waan: «Amun `kondo yɛbuɛ dandan be sie i yɛbuɛ buɛ sɔ'n i anuan nun nan amun `sie sran lɛ man be nian su.

¹⁹ Nán amun jranjran lɛ. Amun su amun kpɔfuɛ'm be su! Kɛ amun nin be ´kun'n, amun `sin bé sin wa, ɔ'a yo-man sɔ-ɔ, be ´nyan atin wlu be klɔ'm be nun, afin Anannganman amun Nyanmiɛn'n ɔ'a fa be ɔ'a man amun.»

²⁰ Zozie nin Izraɛlfuɛ'm be kwlali be kwlalɛ kpa. Be kwlali be mlɔnmlɔn. Be kunngun nga be kwla wanndili'n, be ɔli klɔ nga be si bé wun'n be su.

²¹ Kɛ ɔ yoli sɔ'n, yɛ Izraɛlfuɛ'm be kwlaa be sali bé sin Zozie wun lɔ nanmue nga be kplɛnnin i Makeda wun lɔ'n nun-ɔn. Like fi ɔ'a yo-man be wie fi. Kɛ ɔ fin i lɛ'n, sran fi ɔ'a uke-mɛn i nuan bé wun kun.

²² Kɛ be sali bé sin'n, Zozie seli be kɛ: «Amun `ko yi yɛbuɛ nga be fa tanninnin kunman i nuan'n nan amun `tra Amɔr famiɛn nnun sɔ'm be blɛ min.»

²³ Yɛ be yoli kɛ Zozie fa kannin'n sa-a. Be fali Zerizalɛm, nin Ebrɔn, nin Zarmit, nin Lakis, ɔ nin Eglɔn be famiɛn'm be blɛli i.

²⁴ Kɛ famiɛn'm be juli Zozie nyrun lɛ cɛ'n, ɔ flɛli Izraɛlfuɛ mun nan ɔ'a se alɛ'n su kpɛnngbɛn nga be ukɛli i be kunnin alɛ'n be kɛ: «Amun `wunnge wa nan amun `fa amún ja `tiatia famiɛn nga'm be kɔmin'm be su.» Yɛ kpɛnngbɛn'm be wunngeli lɛ nan b'a fa bé ja b'a tiatia be kɔmin'm be su.

²⁵ Zozie seli be kɛ: «Nán srɛ kaan sa kun amun! Nán amun akunndan'n sanngan! Amun `jran kekle! Amun `tra amun anwlɛn! Sa kunngba nga Anannganman fa yoli be nga be o yɛ'n, yɛ ɔ ´fa yo amun kpɔfuɛ'm be kwlaa-a.»

²⁶ I sin yɛ Zozie kunnin famiɛn sɔ mun-ɔn. Ɔ man be boli be kɔmin waka nnun su.

²⁷ Kɛ wia'n wa tɔ'n, ɔ man be yili be fuɛn'n nan b'a gua be yɛbuɛ buɛ nga be fiali nun'n nun, nan b'a fa yɛbuɛ dandan b'a tannin i nuan'n. Yɛbuɛ sɔ'm be tɛ o lɛ ndɛ.

Zozie i mɛn i ngua lɔ'n klɔ'm be falɛ

²⁸ Le kunngba sɔ'n nun Zozie fali Makeda klɔ'n. Ɔ kunnin i famiɛn'n ɔ nin i su sran'm be kwlaa. Sran ba kun a ka-man lɔ. Sa ng'ɔ fa yoli Zeriko famiɛn'n, i kunngba'n yɛ ɔ fa yoli Makeda famiɛn nin-ɔn.

²⁹ Kɛ Zozie nin Izraɛlfuɛ'm be fɛ i Makeda lɛ'n, be ɔli Libna. Be fali alɛ'n wlali lɛfuɛ'm bé sin.

³⁰ Anannganman fali klɔ sɔ'n nin i famiɛn'n mannin be ekun. Be kunnin i sufuɛ mun. Be nun kun a ka-man. Sa kunngba nga be fa yoli Zeriko famiɛn'n yɛ be fa yoli Libna famiɛn nin-ɔn.

³¹ Kɛ Zozie nin Izraɛlfuɛ'm be fɛ i Libna lɛ'n, be ɔli Lakis be ko boli be nanmue klɔ'n wun lɛ. Yɛ be fali alɛ'n wlali lɛfuɛ'm bé sin-ɔn.

³² Be kunnin le kun. I le nnyɔn'n su'n Anannganman fali Lakis mannin Izraɛlfuɛ mun. Izraɛlfuɛ'm be kunnin Lakisfuɛ mun, b'a yaci-man sran bɔ kun sa lɛ kɛ be fa yoli Libna'n sa.

³³ Ɔram b'ɔ ti Gezɛr famiɛn'n bali Lakis ukalɛ, Zozie kwlali i nin i alɛ kunfuɛ mun. Be wie fi a ka-man lɛ.

³⁴ Kɛ Zozie nin Izraɛlfuɛ'm be fɛ i Lakis lɛ'n be ɔli Eglɔn. Be boli be nanmue klɔ wun lɛ, yɛ be fali alɛ'n wlali lɛfuɛ'm bé sin.

³⁵ Be yrali klɔ'n le kunngba sɔ'n nun nan b'a kun klɔfuɛ mun kɛ Lakis lɔ'n sa.

³⁶ Kɛ Zozie nin Izraɛlfuɛ'm be fɛ i Eglɔn lɛ'n be ɔli Ebrɔn. Be fali alɛ'n wlali klɔfuɛ'm bé sin,

³⁷ nan b'a fa klɔ'n. Be kunnin i su famiɛn'n ɔ nin i su sran mun. Be fali klɔ nga be mantan lɛ'n nan b'a kun i su sran mun. Zozie nunnunnin klɔ'n mlɔnmlɔn, yɛ ɔ nunnunnin i su sran'm be kwlakwla kɛ Eglɔn lɔ'n sa.

³⁸ I sin, Zozie nin Izraɛlfuɛ'm be sali bé sin nan b'a ɔ Debir. Be fali alɛ'n wlali lɛfuɛ'm bé sin.

³⁹ Be fali klɔ'n yɛ be trɛli i su famiɛn'n. Be fali klɔ nga be o i asa'n su'n wie. Be kunnin klɔ'm be su sran mun. B'a yaci-man sran kun lɛ. Like nga Zozie fa yoli Ebrɔn annzɛ Libna nin i famiɛn'n yɛ ɔ fa yoli Debir ɔ nin i famiɛn nin-ɔn.

⁴⁰ Zozie fali mɛn'n i ngba. Ɔ kwlali famiɛn nga be o oka-oka lika'm be nun'n, nin be nga be o ngua lɔ lika'm be nun'n, nin be nga be o lika kpɛtɛkplɛɛ nun'n, ɔ nin be nga be o kpɔlɛ nga be o jenvie i nuan lɔ'n. Ɔ'a yaci-man sran fi lɛ, ɔ nunnunnin sran'm be ngba kɛ Anannganman b'ɔ ti Izraɛl Nyanmiɛn'n seli kɛ be yo'n sa .

⁴¹ Zozie boli alɛ'n kunlɛ bo Kadɛs-Barnea ɔ nin Gaza nin ngua wa lika nun lele fa juli Gozɛn ɔ nin Gabaɔn bɔ be o nglo lɔ lika nun'n nun.

⁴² Ɔ fali lika sɔ'm be ngba. Ɔ kwlali be famiɛn mun likawlɛ afin Anannganman bɔbɔ yɛ ɔ uka Izraɛl-ɔ.

⁴³ Kɛ ɔ yoli sɔ'n, Zozie, ɔ nin Izraɛlfuɛ mun be kwlaa be sali be sin Gilgal nanmue'n nun lɔ.