Zoɛl 4 - NYANMIƐN NDƐ'N 1998

Nvle kun'm be nunfuɛ'm be fɔ nga Anannganman tuli be'n

¹ «I sɔ blɛ liɛ'n nun'n, n ´fa Zidafuɛ mun nin Zerizalɛmfuɛ'm bɔ be trali be lomuɛn'n n sa be sin be osu laa'n nun.

² Kpɛkuun n ´yiayia nvle kun'm be nunfuɛ'm be kwlaa, n ´fa be n ´kɔ kongo nga be flɛ i kɛ Anannganman Di Jɔlɛ Kongo'n nun lɔ. Sa nga be fa yoli min sran'n, lɛ yɛ n ´flɛ be nan y'a kan e afiɛn ndɛ-ɔ. Afin be yoli man min sran sɔ'm bé nyin su boli je, ɔ man be sanngan sanngannin nvle kun nga'm be nun. Be cɛcɛli min mɛn'n nun be fali.

³ Be tuli fɔtɔ be fa cɛli min nvle liɛ'n nun sran mun. Be yoli yasua'm be atɛ be fa toli tekle bla mun. Bla'm be kusu, be yoli be atɛ be fa nɔnnin be nzan su.

⁴ ?Amun nga be o Tir nin Sidɔn lɔ'n, ɔ nin amun nga be o Filisti'n, amun waan amun ´yo min sɛ? ?Amun ´kunndɛ kɛ amun ´tu amun klunngbɔ be ´gua min su? Sɛ amun klun akunndan'n yɛlɛ nga lɛ'n, n kusu'n, sa nga amun fa yoli min'n, n ´yi m ´man amun, n su sisi-man mín bo nan m'an ´yo .

⁵ An fali min jɛtɛ ufue nin min sika ɔkwlɛ'n, ɔ nin min anwlɛn su ninnge kpakpa'm be kwlaa, an fa ɔli amun amuɛn sua'm be nun.

⁶ Zidafuɛ mun nin Zerizalɛmfuɛ'm be kusu, kɛ ɔ ko yo nan b'a tu be mɛn liɛ'n nun lɛ b'a ɔ mmua'n ti, amun yoli be atɛ Grɛk'm bé sa nun.

⁷ Min kusu kan amun ko yoli be atɛ lɔ'n, n ´ko fa be lɔ m ´ba. Kpɛkuun tɛ nga an yoli be'n, n ´kaci i nyin amun su.

⁸ Amun mma yasua mun nin amun mma bla mun'n, n ´yo be atɛ Zidafuɛ'm bé sa nun. Kpɛkuun be kusu be ´yo be atɛ Sabefuɛ bɔ be mɛn liɛ'n wo mmua lɔ'n bé sa nun. M bɔbɔ min Anannganman yɛ n kan kle amun-ɔn .»

Alɛ kasiɛn'n nin jɔlɛ dilɛ'n

⁹ Man be kpan be se nvle kun'm be nunfuɛ be kɛ: «Alɛ b'ɔ ba'n ti, amun `siesie amun wun. An `tra amun safunyrɛn'm be ase man be siesie bé wun be `sie. An `yiayia amun sonja'm be kwlaa man be wɔ.

¹⁰ Amun tokpo dandan'n bɔ nannin'n be cuɛn'n, an `fa be `bo tokofi. Amun wlɔsɔ mun'n, an `fa be `bo cua. Man srɛfuɛ kpa'n ɔ se i wun kɛ: ‹N ti yakpafuɛ yɛ n wo lɛ-ɔ .›

¹¹ Amun nvle-nvle nga amun mantan e wa mun'n, amun `kan amún wun be bla, an wa tian amún nuan.» Anannganman kusu, sunman ɔ sonja mun man be bla.

¹² Man nvle-nvle'm be nunfuɛ'm be jaso be bla kongo nga be flɛ i kɛ Anannganman Di Jɔlɛ Kongo nun wa. Lɔ yɛ n ´ko tran yɛ e nin nvle nga be mantan e yɛ'n e ´ko kan ye afiɛn jɔlɛ nin-ɔn.

¹³ Amun `fa wlɔsɔ'n be fa `sɔtɔ be, amun `kpɛ be kɛ awie blowa sa. Amun `kpita be kɛ b'a fa vinyi mma b'a guɛ i sɛ nun nan sɛ'n ɔ'a yi nan be su kpita sa. Be cuɛn be nzue'n lele man kpongbo'n yi. Be klunwi'n ɔ'a bobo su ngboko !

¹⁴ Nzrafuɛ kpanngban kpa be su ba Jɔlɛ Dilɛ Kongo nun, Nyanmiɛn i ya like nga i waan ɔ ´yo'n, i cɛn'n ɔ'a mantan koko .

¹⁵ Wia'n su bo-man kun, anglo su ta-man kun, nzraama'm be kusu be su fite-man kun.

¹⁶ Anannganman tian Siɔn oka'n su lɔ kɛ asɔmɔli wie sa. Ɔ o Zerizalɛm lɔ, ɔ kpan, be ti i nɛn'n. Kɛ ɔ kpan sɔ bɔ nyanmiɛn bɔ la nglo lɔ plaii nin asiɛ'm be ti'n, kpɛkuun be o kejelɛ. Sanngɛ Anannganman ti i sran'm be sasafuɛ. Ɔ ti Izraɛlfuɛ'm be fiawlɛ .

¹⁷ Amun wa wun i sakpa kɛ min yɛ n ti Anannganman amun Nyanmiɛn nin-ɔn, nan Siɔn oka'n, b'ɔ ti min Nyanmiɛn'n, min oka liɛ klonglo'n i su yɛ n tran-an. Zerizalɛm ɔ ´yo min liɛ mlɔnmlɔn ekun, N su man-man nvle kun nga'm be atin be wlu-man nun wa mlɔnmlɔn kun.

Izraɛl lɔ ninnge'm be wa yo ye

¹⁸ Cɛn wie lele'n, oka'm be su lɔ vinyi'm be wa su kaka kpa. Nnɛn nga be o kpɔlɛ'm be su'n, be nyɔnflɛn nzue nga be cuɛn'n, ɔ ´yo kaka kpa. Zida nzue ba'm be kwlaa be ´sonji. Nzue kun ´fɛ i Anannganman i sua'n nun lɔ ɔ ´gua akasia kongo'n nun lɔ .

¹⁹ Zidafuɛ'm be tɛtɛ nga Eziptfuɛ mun nin Edɔmfuɛ'm be yoli be'n, ɔ nin sran nga b'a yo-man like fi bɔ be kunnin be'n ti, Ezipt mɛn'n ´bo, Edɔm ´kaci kɛ aawlɛ flɛnnɛn sa.

²⁰ Sanngɛ Zida liɛ'n, sran'm be ko wie-man nun le. Zerizalɛm kusu, sran ko tu-man su le nan kɛ ɔ ´yo-ɔ ɔ'a yo.

²¹ Siɔn lɔ sran nga be kunnin be'n bɔ n nian ´jran-man be nuan n nian kan-man ndɛ'n, n ´wa tu be klunngbɔ bɔ be ko tu'n. Kpɛkuun m bɔbɔ min Anannganman'n, n ´ko tran Siɔn lɔ.