Zeremi 52 - NYANMIƐN NDƐ'N 1998

Nɛbikadnɛzar i Sedesias tralɛ

¹ Kɛ Sedesias ɔ ´yo famiɛn'n, wuun ɔ lɛ afuɛ ablaɔn-nin-kun. Ɔ dili afuɛ blu-nin-kun Zerizalɛm lɛ. I nin suan Amital. Zeremi ng'ɔ fin Libna'n i wa-a.

² Ɔ yoli like ng'ɔ yo-man Anannganman i fɛ'n. Like kunngba nga Zozakim yoli'n, i kunngba'n yɛ ɔ yoli-ɔ.

³ Sa ti bɔ sa kekle'm be tɔli Zerizalɛmfuɛ mun nin Zidafuɛ'm be su'n yɛlɛ kɛ Anannganman fali ya dan kpa. Ɔ man ɔ fuannin be, siɛn'n ɔ klo-man kɛ ɔ wun be kun.

⁴ Ɔ man Nɛbikadnɛzar nin i sonja'm be kwlakwla be bali kɛ be nin Zerizalɛmfuɛ mun be ´kun. Kɛ ɔ ´yo sɔ'n, wuun Sedesias yoli famiɛn ɔ'a di afuɛ ngwlan. Afuɛ ngwlan su'n i anglo blu'n su yɛ be bali-ɔ, wuun anglo'n ɔ'a di le blu. Be boli be nanmue'n klɔ'n i sin. Lika gbagblagba nga be ko jran su ko kun alɛ'n, be kplɛnnin i sɔ kpanngban bo sin yiali klɔ'n.

⁵ Be trannin lɛ lele Sedesias i sielɛ'n i afuɛ blu-nin-kun'n su .

⁶ Awe'n yoli dan klɔ'n nun. Siɛn'n, be nyan-man like be di-mɛn i kun. Anglo nnan su'n i le ngwlan su'n,

⁷ Babilɔnifuɛ'm be kpɛli klɔ'n i wun talɛ'n nun toklo. Kɔnguɛ'n, alɛ kunfuɛ'm be kwlaa be fin klɔ'n nun fiteli, nan b'a wanndi. Be sinnin anuan ng'ɔ o famiɛn'n i fie'n i wun lɛ'n nun. Ɔ o talɛ nnyɔn'm be afiɛn nun. Be fali lika kpɛtɛkplɛɛ'n i atin'n. Sanngɛ kɛ ɔ ´yo sɔ'n, wuun Babilɔnifuɛ'm b'a sin b'a yia klɔ'n .

⁸ Babilɔni sonja'm be suli famiɛn Sedesias su, be ko toli i lika kpɛtɛkplɛɛ ng'ɔ o Zeriko wun lɔ'n nun. I sonja'm be yacili i lɛ be bo sanndili.

⁹ Babilɔnifuɛ'm be trɛli i. Be fɛli i ko mannin Nɛbikadnɛzar. Ribla b'ɔ o Amat mɛn'n nun'n, lɔ yɛ be fɛli i be ɔli-ɔ. Yɛ Nɛbikadnɛzar dili i jɔlɛ-ɔ.

¹⁰ Babilɔni famiɛn sɔ'n ɔ man be kunnin Sedesias i mma mun be si i nyrun lɛ Ribla lɔ. Kpɛkuun ɔ man be kunnin Zida famiɛn'n i awlo lɔ sran dandan mun.

¹¹ Kpɛkuun Nɛbikadnɛzar sɔ'n man be boli Sedesias i nyinma'n. Ɔ man be fali jrɔkɔ be cili i, nan ɔ'a fɛ i ɔ'a ɔ Babilɔni. Be wlɛli i bisua, ɔ kali bisua lɔ wuli .

Nɛbizaradan i Zerizalɛm i sacilɛ mlɔnmlɔn'n i ndɛ

¹² Nɛbizaradan ti gladi difuɛ'm be su kpɛn, i kunngba'n ɔ ti famiɛn'n i sonja'm be su kpɛn'n kun. Le kun ɔ wa wluli Zerizalɛm klɔ'n nun. Kɛ ɔ ´ba sɔ'n, wuun Nɛbikadnɛzar yoli Babilɔni famiɛn ɔ'a di afuɛ blu-nin-ngwlan. Afuɛ blu-nin-ngwlan su'n i anglo nnun'n su yɛ ɔ bali sɔ nin-ɔn, wuun anglo'n ɔ'a di le blu.

¹³ Ɔ wɔli Anannganman i sua'n nin famiɛn sua'n, ɔ nin Zerizalɛm sua'm be ngba be nun. Sran kpakpa'm bé sua mun'n, ɔ'a yaci-man wie lɛ.

¹⁴ Babilɔni sonja nga be nin gladi difuɛ'm be su kpɛn'n bali'n, be bubuli talɛ ng'ɔ si Zerizalɛm klɔ'n i wun'n i ngba.

¹⁵ Nɛbizaradan b'ɔ ti gladi difuɛ'm be kpɛnngbɛn'n ɔ trali yalɛfuɛ'm be bue lomuɛn ɔli. Ɔ trali Zerizalɛmfuɛ nga be kali klɔ'n nun'n, ɔ nin be bɔ be fali be wun mannin Babilɔni famiɛn'n, ɔ nin ajuin difuɛ nga be kali lɛ'n be lomuɛn wie.

¹⁶ Sanngɛ ɔ yacili yalɛfuɛ'n wie'm be lɛ kɛ be nian vinyi fie mun nin fie kun nga'm be lika.

¹⁷ Babilɔnifuɛ'm be sacili Nyanmiɛn i sua'n i ja mlomlo nga be fali aaba yoli be mun. Sua ja sɔ'm be o Nyanmiɛn i sua'n i nyrun lɛ. Be sacili kakaklolo'm be nzɔliɛ mun nin aaba kpongbo dan ng'ɔ o Nyanmiɛn i sua'n i awlo'n i klun lɛ'n. Kpɛkuun be fali aaba'n kwlaa ɔli Babilɔni.

¹⁸ Be fali aaba ninnge nga be fa su Nyanmiɛn'n i kwlakwla. Ninnge sɔ mun yɛ: blalɛ sɛ mun, peli mun, laliɛ mun, klowa conjronjo'n mun, yɛ klowa mun.

¹⁹ Gladi difuɛ'm bé su kpɛn'n fali ninnge nga be fa tu nzuɛn'n, nin sɛ mun, nin kannin siewlɛ mun, nin klowa mun, nin klowa nga be fa kpɛntɛn-kpɛntɛn nzue'n, ɔ nin ninnge nga be fa sika ɔkwlɛ nin jɛtɛ ufue yoli'n, ɔ fali be kwlaa.

²⁰ Nyanmiɛn i sua'n i ja nnyɔn bɔ be ti mlomlo'n, nin aaba kpongbo dan kluklu'n, ɔ nin aaba nannin blu-nin-nnyɔn nga be fa kakaklolo'm be nzɔliɛ'n sie su bɔ famiɛn Salomɔn fali be sieli Nyanmiɛn i sua'n nun lɔ'n, b'a kwla sunnzun-man be. Ɔ man b'a si-man kɛ be nɔnnin'n fa ti'n.

²¹ Sua ja'm be liɛ'n, be nglo-nglo su'n ti mɛtri ngwlan. Nyanman ng'ɔ bo sin yia kun'n ti mɛtri nnun nin sin. Be klun'n ti buɛ. Be gbugblugbu'n ti santimɛtri mɔcuɛ.

²² Kun i ti su gbagblagba'n ti aaba. Kun ekun ti sɔ ekun. Bé ti su gbagblagba sɔ'n i nglo-nglo su'n ti mɛtri nnyɔn nin bue. Be fali like kɛ lala sa be fa katali like gbagblagba'm bé wun. Be fali aaba yɛ be fa yoli tɛ sɔ mun-ɔn. Be fali like wie bɔ be yoli i kɛ grenadie mma sa'n be fa sende-sendeli tɛ'm be nuan su tɛɛn sin yiali nun. Be fali aaba yɛ be fa yoli grenadie mma sɔ mun-ɔn. Sua ja nnyɔn'm be wafa'n ti kun, yɛ grenadie nnyɔn'm be wafa ti kun kusu.

²³ Grenadie mma'm be ti ablangwlan nin nsiɛn. Grenadie mma'm be kwlaa nga be sin yia like kɛ lala sa'n, be ti sɔ ya.

²⁴ Gladi difuɛ'm bé su kpɛn'n ɔ trali Nyanmiɛn nyrun jranfuɛ'm bé su kpɛn bɔ be flɛ i Sɛraza'n nin i mantanfuɛ bɔ be flɛ i Sofoni'n, ɔ nin Nyanmiɛn nyrun jranfuɛ nsan nga be nian anuan'n su'n.

²⁵ Ɔ trali sonja'm be su kpɛn'n kun nin famiɛn'n i mantanfuɛ nso. Ɔ trali sonja'm bé su kpɛn'n i fluwa klɛfuɛ'n. Bian sɔ'n yɛ ɔ fa sran'm be sonja Zida mɛn'n nun nin-ɔn. Ɔ trali Zida sran ablesiɛn ekun. Kɛ ɔ ´tra sran sɔ mun'n, wuun be kwlaa be o klɔ'n nun lɛ.

²⁶ Nɛbizaradan b'ɔ ti gladi difuɛ'm bé kpɛn'n, ɔ fali be kwlaa sɔ'n ɔli Babilɔni famiɛn'n i nyrun Ribla lɔ.

²⁷ Babilɔni famiɛn'n ɔ boli be lele, yɛ ɔ man be kunnin be Ribla lɔ. Ribla'n wo Amat mɛn'n nun. Kɛ Zidafuɛ'm bé tuli be bo be mɛn'n nun lɔ kɛ ng'ɔ o lɛ'n sa.

²⁸ Nɛbikadnɛzar i sielɛ'n i afuɛ nso'n su'n, ɔ trali sran akpi nsan sran ablaɔn-nin-nsan (3.023) be lomuɛn.

²⁹ I afuɛ blu-nin-mɔcuɛ su'n, ɔ trali sran ya mɔcuɛ nin sran ablasan-nin-nnyɔn Zerizalɛm ɔli.

³⁰ Kpɛkuun i afuɛ ablaɔn-nin-nsan'n su'n, i gladi difuɛ'm be kpɛn b'ɔ be flɛ i Nɛbizaradan'n trali Zuif ya nso ablanan-nin-nnun. Be kwlakwla ng'ɔ tra be ɔli'n be ti sran akpi nnan sran ya nsiɛn (4.600).

Babilɔni famiɛn'n i Zozakin i aunnvuɛ silɛ

³¹ Kɛ be fali Zozakin b'ɔ ti Zida famiɛn'n ɔli'n, i afuɛ ablasan-nin-nso'n su'n, Babilɔni famiɛn'n bɔ be flɛ i kɛ Evil-Mɛrɔdak'n, ɔ sili i aunnvuɛ nan ɔ'a yi i bisua'n nun ɔ'a fite. Afuɛ sɔ'n i anglo blu-nin-nnyɔn'n su yɛ ɔ yili i-ɔ. Kɛ ɔ ´yo sɔ'n, wuun anglo'n ɔ'a di le ablaɔn-nin-nnun. Afuɛ kunngba nga Evil-Mɛrɔdak yoli famiɛn'n, i nun yɛ ɔ yili Zozakin-ɔn.

³² Evil-Mɛrɔdak kannin ndɛ fɛfɛ mun kleli i. Yɛ ɔ yoli man ɔ nyannin nyrun trali famiɛn nga be nin i o Babilɔni lɔ'n.

³³ Evil-Mɛrɔdak fali tralɛ uflɛ kacili Zozakin i bisua tralɛ mun. Zozakin nin i be dili like likawlɛ lele fa juli i nguan'n i awieliɛ.

³⁴ Yɛ kusu lele b'ɔ ´fa ju i nguan'n i awieliɛ'n, famiɛn'n mɛnnin i like kwlaa ng'ɔ miɛn i sa'n. Ɔ'a kpɛ-man cɛn kun lele yɛ wie'n fa kunnin i-ɔ.