Zeremi 43 - NYANMIƐN NDƐ'N 1998

Be mian Zeremi be fɛ ɔli Ezipt

¹ Kɛ Zeremi wieli ndɛ nga Anannganman Nyanmiɛn kpli'n fa wlɛli i nuan kɛ ɔ kan kle nvlefuɛ mun'n kan'n,

² Ose i wa Azaria, nin Kareak i wa Zosanan, ɔ nin tutrefuɛ nga be o lɛ'm be seli Zeremi kɛ: «Ato yɛ a ´buɛ i lɛ. Nán Anannganman e Nyanmiɛn'n yɛ ɔ sunmannin wɔ kɛ a wa se ye kɛ nán e wɔ Ezipt lɔ-ɔ.

³ Ɔliɛ Neriza i wa Barik yɛ ɔ wlawla wɔ-ɔ. I waan ɔ ´yo sɔ nan Kaldefuɛ'm be `nyan ye be kun ye, wie kusu-ɔ be `fa ye wɔ Babilɔni.»

⁴ Ɔ man Kareak i wa Zosanan nin sonja kpɛnngbɛn nga mun, ɔ nin sran nga be o lɛ'm b'a di-man ndɛ nga Anannganman'n kan kleli be kɛ be `ka Zida mɛn'n nun'n su.

⁵ Zosanan nin sonja akpasua su kpɛnngbɛn'm be fali Zidafuɛ nga be kali lɛ mun ɔli. Be kwlaa sɔ'n yɛ be bo sanndili lika'm be nun yɛ be sali bé sin bali Zida mɛn'n nun tranlɛ nin-ɔn.

⁶ Bla mun o, yasua mun o, famiɛn'n i mma bla mun o, sran nga Nɛbizaradan b'ɔ ti gladi difuɛ'm be kpɛnngbɛn yacili be Safan i wa Asikam i wa liɛ Gɛdalia sa nun'n, be fali be ngba ɔli. Be fali Zeremi nin Neriza i wa Barik ɔli wie.

⁷ B'a di-man ndɛ nga Anannganman kan kleli be'n su. Be ɔli Ezipt be ko juli Tapanɛs .

Zeremi kannin Nɛbikadnɛzar i Ezipt balɛ'n i ndɛ

⁸ Kɛ be juli Tapanɛs lɔ'n, Anannganman kannin ndɛ kun kleli Zeremi. Ɔ seli i kɛ:

⁹ «Fa yɛbuɛ dandan nan fu kunman famiɛn'n sua'n i nyrun lɛ lika nun, nan wla be ase. Yo i sɔ Zida yasua'm be nyrun Tapanɛs wa,

¹⁰ nan se be kɛ: ‹Anannganman b'ɔ sie mɛn wunmuan'n, Izraɛl Nyanmiɛn'n wan yoo: N wa ko yia Babilɔni famiɛn'n, Nɛbikadnɛzar b'ɔ ti min sufuɛ'n. N ´tɛkɛ i famiɛn bia'n yɛbuɛ nga a wla be ase yɛ'n be su. Lika kunngba nga nun wa yɛ ɔ wa kplɛn i tannin sua nin-ɔn .

¹¹ Ɔ wa kun Eziptfuɛ mun. Be nga be ko wu'n, be ´wu. Be nga be ko tra be lomuɛn'n, be ´tra be. Be nga alɛ ko di be'n, ɔ ´de be.

¹² N ´yo man be yi Ezipt amuɛn'm bé sua'n nun sin be ´yra be. Nɛbikadnɛzar ´wɔ amuɛn mma'm be nun, nga ɔ'a wɔ-man be nun'n, ɔ ´fa be kɔ i mɛn'n nun. Ɔ ´yiyi Ezipt mɛn'n nun ninnge mun flɛnnvlɛnnvlɛnnvlɛn kɛ bua kankanfuɛ fa yiyi i tralɛ'n su sɔsɔwa mun sa. Kpɛkuun ɔ ´kɔ bɔ cɛ.

¹³ Bɛt-Semɛs lɔ like mlomlo'm bɔ be ti kɛ sua ja sa bɔ be fa yɛbuɛ yoli'n, ɔ ´bubu be. Ɔ ´fa sin'n yi i Ezipt amuɛn'm bé sua'm be nun.› »