Zeremi 28 - NYANMIƐN NDƐ'N 1998

Zeremi nin Anania be ndɛ kpɛsɛlɛ

¹ Afuɛ kunngba sɔ'n nun'n, Sedesias i Zida i sielɛ i afuɛ nnan'n i anglo nnun'n su'n, e nin Nyanmiɛn nyrun jranfuɛ mun nin sran wie mun e wo Anannganman i sua'n nun lɔ, kpɛkuun Azir i wa bɔ be flɛ i kɛ Anania'n, b'ɔ ti Gabaɔn lɔ Nyanmiɛn nuan ijɔfuɛ'n seli min kɛ:

² «Anannganman b'ɔ sie mɛn wunmuan'n, Izraɛl Nyanmiɛn'n wan yoo: ‹Amun kɔmin su waka nga Babilɔni famiɛn'n fa sieli amun kɔmin'n su'n, m'an bu nun.

³ Nan yoo, ɔ ka afuɛ nnyɔn sɛsɛsɛ, Anannganman i sua'n nun ninnge nga famiɛn Nɛbikadnɛzar fa ɔli Babilɔni'n, n ´fa be m ´ba lika nga nun ekun.

⁴ Zozakim b'ɔ ti Zida famiɛn'n i wa Zekɔnias nin be kwlaa nga be trali be Zida ɔli Babilɔni'n, n ´fa be n ´sa be sin. N wa yo man amun su yo-man Babilɔni famiɛn'n i kanga kun.› »

⁵ Yɛ Nyanmiɛn nuan ijɔfuɛ Zeremi tɛli Nyanmiɛn nuan ijɔfuɛ Anania su Nyanmiɛn nyrun jranfuɛ nin sran nga be o Anannganman i sua nun'n be nyrun lɛ'n, ɔ seli kɛ:

⁶ «Fiaa! Man ɔ yo sɔ. Man Anannganman'n yo i sɔ. Man Anannganman'n nian ndɛ nga a ´kɛn i lɛ'n su yo, man Anannganman fɛ i sua'n i nun ninnge nga be fa ɔli Babilɔni'n bla.

⁷ Nan sanngɛ ndɛ nga n ´kɛn i wɔ nin sran nga b'a yia yɛ'n be kwlaa be nyrun yɛ'n, sie ɔ́ su tie.

⁸ Kɛ ɔ fin lalafuɛ nun'n, Nyanmiɛn nuan ijɔfuɛ nga be dunnin mmua wɔ nin min e nyrun'n, be kannin alɛ nin nyrɛnnɛn ɔ nin tukpacɛ b'ɔ sa ndɛndɛ ng'ɔ wa ju mɛn dandan nin famiɛn diwlɛ kpakpa'm be su'n.

⁹ Sanngɛ sɛ Nyanmiɛn nuan ijɔfuɛ kun kan kɛ be wa nyan fɔundi'n, san ndɛ ng'ɔ kannin'n ´ju yɛ sran'm be si sakpa kɛ Anannganman'n yɛ ɔ sunmɛnnin i-ɔ.»

¹⁰ Yɛ Nyanmiɛn nuan ijɔfuɛ Anania ´de Nyanmiɛn nuan ijɔfuɛ Zeremi i kɔmin su waka'n yɛ ɔ ´bu nun-ɔn.

¹¹ Kpɛkuun ɔ kɛnnin i sran'm be kwlaa be nyrun lɛ kɛ Anannganman wan yoo: «Ɔ ka afuɛ nnyɔn, kɛ m ´bu be kɔmin su waka nga Nɛbikadnɛzar b'ɔ ti Babilɔni famiɛn'n fa sieli i nvle-nvle'm be nunfuɛ'm be kwlaa be kɔmin su'n i nun sa.» Yɛ Zeremi ɔli i liɛ-ɔ.

¹² Kɛ Nyanmiɛn nuan ijɔfuɛ Anania deli be kɔmin su waka ng'ɔ o Nyanmiɛn nuan ijɔfuɛ Zeremi i kɔmin su'n b'ɔ buli nun'n, Anannganman'n kannin ndɛ kleli Zeremi. Ɔ seli i kɛ:

¹³ «Kɔ ko se Anania kɛ: ‹A buli be kɔmin su waka'n nun sɔ sanngɛ a wa fa blalɛ yɛ a ´kaci i-ɔ.›

¹⁴ Anannganman b'ɔ sie mɛn wunmuan'n, Izraɛl Nyanmiɛn'n wan yoo: ‹N wa fa blalɛ yɛ n ´wla nvle nga be o lɛ'n be nunfuɛ'm be kwlaa be kɔmin nan be `su Nɛbikadnɛzar b'ɔ ti Babilɔni famiɛn nin-ɔn. Be ´su i, ɔliɛ bo'n nun nnɛn mun bɔbɔ, n ´fa be m ´mɛn i.›

¹⁵ Yɛ Nyanmiɛn nuan ijɔfuɛ Zeremi seli Nyanmiɛn nuan ijɔfuɛ Anania kɛ: ‹Anania, sie ɔ́ su tie, Anannganman'n ɔ'a sunman-man wɔ. W'a yo man sran'm b'a gua be wla ase ngbɛn.›

¹⁶ I sɔ'n ti Anannganman'n wan yoo: ‹Ɔ mɛn'n nun tranlɛ wieli. Afuɛ ng'ɔ o yɛ nun'n, a ´wu. Yɛlɛ kɛ a su sran'm bé bo kɛ be `yo nyin kekle Anannganman'n su.› »

¹⁷ Afuɛ kunngba sɔ'n i anglo nso su'n, Anania wuli sakpa.