Zeremi 24 - NYANMIƐN NDƐ'N 1998

Figie mma gbogbo nnyɔn'n

¹ Kɛ Nɛbikadnɛzar b'ɔ ti Babilɔni famiɛn'n trali Zida famiɛn Zozakim i wa Zekɔnias nin Zida famiɛn'n i awlo lɔ sran dandan mun, ɔ nin sua su bofuɛ nin lakle yofuɛ mun be lomuɛn b'ɔ fali be ɔli Babilɔni'n, le kun Anannganman'n kleli min figie mma gbogbo nnyɔn. Be fa be jinjinnin Nyanmiɛn i sua'n nyrun lɛ.

² Gbogbo'n kun nun figie mma liɛ'm be kpa'n ti kɛ figie mma klikli nga kɛ wawa'n kpɛn-ɔn be su'n sa. Gbogbo kun'n kusu i nun figie mma liɛ'n ti-man kpa mlɔnmlɔn. Be di-ɔ ɔ yo-man ye bɔbɔ.

³ Anannganman'n usali min kɛ: «?Zeremi, nguɛ yɛ a wun i-ɔ?» Min waan: «N wun figie mma wie mun, wie'm be ti kpa. Wie'm be kusu be ti-man kpa mlɔnmlɔn. Be di-ɔ ɔ yo-man ye.»

⁴ Kpɛkuun Anannganman'n kannin ndɛ kleli min. I waan:

⁵ «Min Anannganman bɔ n ti Izraɛl Nyanmiɛn'n min wan yoo: ‹Kɛ a wun figie mma kpa mun bɔ a klo be'n, i kunngba'n yɛ n fa klo Zidafuɛ nga n yoli man be trali be ɔli Kaldefuɛ'm be mɛn'n nun nin-ɔn.

⁶ N ´nian be lika klanman. N ´fa be n ´sa be sin mɛn nga nun. N ´kplan be kɛ sua sa, n su bubu-man be kun. N ´kplan be kɛ waka sa, n su tu-man be bo kun.

⁷ M ´man be ngwlɛlɛ man be si kɛ min yɛ n ti Anannganman nin-ɔn. Sɛ b'a nian-man bɛ nin fama nan be ba min wun mlɔnmlɔn'n, be wa yo min sran yɛ n kusu n ´yo be Nyanmiɛn.

⁸ Zida famiɛn Sedesias kusu nin i awlo lɔ sran dandan mun o, nin be nga be kali Zerizalɛm wa mun o, nin be nga be kali mɛn'n nun wa mun o, ɔ nin be nga be ko trannin Ezipt mɛn'n nun mun o, n ´yo be kɛ figie mma nga be ti-man kpa bɔ be di-ɔ ɔ yo-man ye'n sa.

⁹ Sa nga n ´fa wla be nun'n man asiɛ'n su famiɛn diwlɛ'n kwlaa be nunfuɛ nga be wun be'n be ´bo kitika. Lika kwlaa wie ala bɔ n ´fuan be lɛ'n, lɛfuɛ'm be ´fa be dunman'n be ´kpɛ nzowa. Be ´kpɛ bé wun flɛn, be ´fa be bo sannzan.

¹⁰ M man alɛ'n ´tɔ be su, awe'n ´kpɛn be su, tukpacɛ b'ɔ sa ndɛndɛ'n ´tɔ be su lele san be ´nunnun be ´tu lika nga n fa mannin be nin be nannan mun'n nun.› »