Zeremi 21 - NYANMIƐN NDƐ'N 1998

Sedesias i ndɛ'n i su tɛlɛ

¹ Kɛ Sedesias sunmannin Pasir b'ɔ ti Malkiza i wa'n ɔ nin Sofoni b'ɔ ti Nyanmiɛn nyrun jranfuɛ'n Zeremi b'ɔ ti Maazeza i wa'n i wun lɔ'n, yɛ Anannganman'n kannin ndɛ ng'ɔ o yɛ'n kleli Zeremi-ɔ. Famiɛn waan be wa se Zeremi kɛ:

² «Nɛbikadnɛzar b'ɔ ti Babilɔni famiɛn'n ɔ'a fa alɛ ɔ'a wla ye sin, i ti usa Anannganman sa man ye. Sɛ ɔ ´yi i atrɛ'm be nun kun man ye nan e kpɔfuɛ sɔ'm be ´wanndi kɔ o!»

³ Yɛ Zeremi tɛli be su kɛ: «An `ko se Sedesias kɛ yoo:

⁴ ‹Anannganman b'ɔ ti Izraɛl Nyanmiɛn'n wan yoo: Amun sonja nga alɛ ninnge'n wo bé sa nun bɔ be jin klɔ'n wun talɛ'n sin be nin Babilɔnifuɛ'm be ´kun yɛ'n, n wa yo man siɛn'n klɔ'n nun wa yɛ be ´jran be kun-ɔn.

⁵ M bɔbɔ min yɛ e nin amun e ´kun-ɔn. E nin amun e ´kun kekle kpa. N ´nian amún wun ya dan nga m'an fa'n su yɛ e nin amun e ´kun-ɔn.

⁶ N ´kun klɔ nga nunfuɛ'm be kwlaa, i sran o, i nnɛn o! Tukpacɛ b'ɔ sa ndɛndɛ'n ´kun be.

⁷ I sin, Sedesias b'ɔ ti Zida famiɛn'n nin i awlo lɔ sran dandan mun, ɔ nin klɔ'n nun sran nga tukpacɛ b'ɔ sa ndɛndɛ'n nin alɛ'n, ɔ nin awe'n ɔ'a kun-man be'n, n ´fa be n ´wla Nɛbikadnɛzar b'ɔ ti Babilɔni famiɛn'n i sa nun. N ´fa be ´wla be kpɔfuɛ mun nin be bɔ be klo-man be nin nguan'n bé sa nun. Nɛbikadnɛzar su si-man be aunnvuɛ, ɔ su yo-man be blɛblɛ mlɔnmlɔn, ɔ ´kun be.› »

⁸ Se nvle nunfuɛ'm be kɛ: «Anannganman'n wan yoo: ‹N fa nguan atin'n nin wie atin'n n fa sie amun nyrun.

⁹ Sran ng'ɔ ka klɔ nga nun wa'n, alɛ'n annzɛ awe'n, annzɛ tukpacɛ b'ɔ sa ndɛndɛ'n ´kun i. Sran nga kusu b'ɔ fite b'ɔ fɛ i wun ko man Babilɔnifuɛ mun bɔ be nin amun ´kun yɛ'n, ɔ ´nyan nguan. I nguan'n bɔ cɛ yɛ ɔ ti i like b'ɔ ´nyɛn i nin-ɔn.› »

¹⁰ Anannganman wan yoo: «N wa kpɛ mín nyin klɔ nga wun wa, nɛ́n i kpa yolɛ ti-ɔ, sanngɛ i nyrɛnnɛn klelɛ ti-ɔ. Be ´fa man Babilɔni famiɛn'n, ɔ ´wɔ nun.»

Famiɛn'n i awlo'n i ndɛ liɛ'n yɛ

¹¹ Zida famiɛn i awlofuɛ mun, an `tie Anannganman i ndɛ'n.

¹² David awlofuɛ mun, Anannganman'n wan yoo: «Kɛ aliɛ'n cɛn cɛ'n, sɛ amun ´di jɔlɛ'n, amun `nian nanwlɛ'n be di. Amun `de sran mun be nga be fɛn sran'm bé bo ninnge'n bé sa nun. Ɔ'a yo-man sɔ-ɔ, min ya'n ɔ ´jue kɛ sin sa. Sɛ ɔ jue kusu-ɔ, sran fi su kwla nuɛn-mɛn i. Amún sa tɛ'n i nuan akatua nga amun ´nyɛn i'n yɛ ɔ o lɛ-ɔ.

¹³ Amun nga an tran Nyanmiɛn i sua'n i bo ngua lɔ lika kpɛtɛkplɛɛ nun yɛbuɛ'n su'n, amun bɔ an di amún nuan se kɛ: ‹?Wan cɛ yɛ ɔ kwla jra lele to ye wa-a? ?Wan yɛ ɔ kwla wlu e fiawlɛ nun-ɔn?›, Anannganman'n wan yoo:

¹⁴ ‹Min nin amun e wa yia nun, n ´fa sa nga amun yo'n bé nuan sa n ´yo amun, n ´trɔ amun famiɛn sua'n nun sin. Sin sɔ'n ɔ ´didi like nga be mantan sua sɔ'n i lɛ mun.› »