Zakari 8 - NYANMIƐN NDƐ'N 1998

Zerizalɛmfuɛ'm be wa di alaje

¹ Anannganman b'ɔ sie mɛn wunmuan'n kannin ndɛ kleli min. I waan:

² «Klolɛ nga n fa klo Siɔn'n ti dan. M'an wu i ti kpo!» Anannganman b'ɔ sie mɛn wunmuan'n yɛ ɔ kan sɔ-ɔ.

³ Anannganman wan yoo: «I sɔ'n ti yɛ n sali min sin Siɔn wa yɛ min wan n wa tran Zerizalɛm wa nin-ɔn. Be wa flɛ Zerizalɛm kɛ: Nanwlɛ Klɔ, yɛ be ´flɛ Siɔn oka'n kɛ: Nyanmiɛn Oka.»

⁴ Anannganman b'ɔ sie mɛn wunmuan'n wan yoo: «Sran oke kpa mun bɔ be afuɛ'n ɔ'a ɔ i nyrun lɔun ti be tra kpɔnman nun'n, i yasua mun o, i bla mun o, be wa tran Zerizalɛm klɔ gua'n su ekun.

⁵ Gbanflɛn mun nin talua kpanngban be wa kan klɔ nun akpɔ'm be nun ngowa ekun.»

⁶ Anannganman b'ɔ sie mɛn wunmuan'n wan yoo: «?Sɛ Izraɛlfuɛ nga be kali'n, be lafi su kɛ i sɔ sa'n kwla yo-man le'n, i sɔ'n ti m bɔbɔ n kwla m bu i sɔ wie ?»

⁷ Anannganman b'ɔ sie mɛn wunmuan'n wan yoo: «N wa de min nvlefuɛ nga be o wia afiliɛ lɔ'n nin i atɔliɛ lɔ mun.

⁸ N ´ko fa be lɔ m ´ba nan be wa tran Zerizalɛm. Be ´yo min nvle nunfuɛ, yɛ min kusu n ´yo be Nyanmiɛn. N ´nian be su klun-ufue su klanman.»

⁹ Anannganman b'ɔ sie mɛn wunmuan'n wan yoo: «Amun nga amun tili ndɛ nga min nuan ijɔfuɛ'm be kannin'n, cɛn nga min bɔ n sie mɛn wunmuan'n min sua'n i kplanlɛ'n ju nan be ´wlɛ i bo ase'n, an `jran kekle.

¹⁰ Laa'n, sran di junman-an be tuɛ-mɛn i kalɛ nan se kɛ nnɛn yɛ ɔ di junman-an be ´tuɛ i kalɛ-ɔ. Aata difuɛ'm be kpɔfuɛ'm be ti, bé wun di, afin n yoli man sran'm be jaso be wiengu wun.

¹¹ Sanngɛ tranlɛ nga e nin laafuɛ mun e trannin'n, nɛ́n i kunngba'n yɛ e nin Izraɛlfuɛ nga be kali'n e tran siɛn nin-ɔn.

¹² N ´yo man sran'm bé wun ´tɔ be fɔuun. Vinyi'm be ´su, fie'm be ´yo kpa, nzue'n ´tɔ. Nɛnnɛn nga n ´fa di Izraɛlfuɛ nga be kali'n, yɛ ɔ o lɛ-ɔ.

¹³ Zidafuɛ mun nin Izraɛlfuɛ mun, kɛ laa an bo sanndili nvle'm be nun bɔ be fa wunnin kɛ sannzan o amun su'n, kɛ n wa de amun, siɛn'n, be ´wun kɛ an ti muaefuɛ. Nán srɛ kun amun, an `tra amun anwlɛn !»

¹⁴ Anannganman b'ɔ sie mɛn wunmuan'n wan yoo: «Kɛ amun nannan'm be kunnin min ya bɔ n guguli kɛ n ´yo amun tɛ'n, m'an yaci m'an cɛ amun.

¹⁵ Siɛn'n, m'an fa akunndan uflɛ. N wa yo Zerizalɛmfuɛ mun nin Zida osu wunmuan'n be kpa. I ti nán srɛ kun amun kun.

¹⁶ Sanngɛ like ng'ɔ fata kɛ an yo'n yɛ: Amun `di nanwlɛ kle amun wiengu. Man jɔlɛ difuɛ'm di ndɛ mun nanwlɛ, be `yo man sran'm be afiɛn sɛ .

¹⁷ Nán an bu be wiengu wun akunndan tɛ. Nán an ta nda ngbɛn-ngbɛn. Min ciliɛ mun yɛ be o lɛ.» Anannganman b'ɔ sie mɛn wunmuan'n yɛ ɔ kan sɔ-ɔ.

Zerizalɛm lɔ kɔlɛ

¹⁸ Anannganman b'ɔ sie mɛn wunmuan'n seli min kɛ:

¹⁹ «Se Zidafuɛ'm be kɛ min Anannganman bɔ n sie mɛn wunmuan'n min waan afuɛ nuan kun nun anglo nnan nin anglo nnun'n su nglɛmun nga be ci'n, ɔ nin anglo nso nin anglo blu'n su nglɛmun nga be ci'n, be `yaci i cilɛ. Siɛn'n, be `fa i sɔ anglo liɛ mun yo cɛn be di. Sanngɛ amun `fa nanwlɛ dilɛ'n `cici amún ti, an `klo fɔundi'n.»

²⁰ Anannganman b'ɔ sie mɛn wunmuan'n wan yoo: «Nvle uflɛ mun nin klɔ uflɛ sufuɛ'm be wa tran Zerizalɛm wa kaka kpa.

²¹ Klɔ kun sufuɛ'm be ´se be wiengu klɔ uflɛ sufuɛ'm be kɛ: ‹Amun `bla, e su ko srɛ Anannganman b'ɔ sie mɛn wunmuan'n e ´fa e wun ´mɛntɛn i.› Kpɛkuun be ´tɛ be su kɛ: ‹Man e wɔ.›

²² Nvle kaka kpa nin mɛn nga be yo sro'n be nunfuɛ'm be ´ba Zerizalɛm, be ´fa bé wun ´mantan Anannganman b'ɔ sie mɛn wunmuan'n yɛ be ´srɛ i.

²³ I blɛ sɔ nun'n, sɛ sran blu be aniɛn'n ti ngunmin-ngunmin'n, be ´ko tra Zuif kunngba cenje i wun tralɛ'n i nuan su'n, kpɛkuun be ´se i kɛ: ‹E nin amun yɛ e ´kɔ-ɔ, afin e tili i kɛ Nyanmiɛn'n wo amun sin.› »