Zakari 11 - NYANMIƐN NDƐ'N 1998

An `kpan

¹ Liban, tike wɔ anuan mun man sin n di ɔ sɛdri waka mun.

² Siprɛs waka mun, an `kpan, afin sɛdri waka'm b'a bu b'a gua. Waka nglanman sɔ'm b'a nunnun. Bazan lɔ sɛni waka mun, an `kpan, afin amún bo ble nga be kwla-man nun wlu'n ɔ'a yra.

³ Mɛn mma'm bé su kpɛn'm be o kplinlɛ, afin be blɛ liɛ'n ɔ'a wie. Asɔmɔli'm be su kpan, afin be fiawlɛ klanman ng'ɔ san Zurdɛn'n ɔ'a yra.

Nnɛn kankanfuɛ wafa nnyɔn mun

⁴ Anannganman min Nyanmiɛn'n seli min kɛ yoo: «Bua nga be ti dilɛ liɛ'n, kankan be.

⁵ Be bɔ be to i sɔ nnɛn mun'n, be ´kun be-ɔ be bu-mɛn i kɛ sa yɛ be su yo i lɛ-ɔ. Be nga kusu bɔ be yo be atɛ'n, be liɛ nga be kan'n yɛlɛ kɛ yoo: ‹E `la Anannganman'n i ase, afin e yɛ y'a nyan e wun yɛ.› Bua sɔ'm bé su nianfuɛ'm be si-man be aunnvuɛ bɔ kaan sa.

⁶ N kusu, min Anannganman, n su si-man asiɛ'n su sran'm be aunnvuɛ wie kun. M ´man atin man sran'm be yo be wiengu'm be kanga, yɛ m ´man atin man be yo be famiɛn'm be kanga. Famiɛn'm be ´sanngan mɛn'n nun, sanngɛ n su de-man sran fi bé sa nun.»

⁷ Kpɛkuun bua nga be ti dilɛ liɛ bɔ be yo annvɔ sɔ mun yɛ n kankannin be-ɔ. N fali kpɔnman nnyɔn yɛ n fa kankannin be-ɔ. N flɛli kun kɛ: «Aenguɛ fɛfɛ tralɛ.» Yɛ n flɛli kun ekun kɛ: «Anuansɛ,» yɛ n fa kankan nnɛn mun-ɔn.

⁸ Anglo kunngba cenje yɛ n fa fuannin bua kankanfuɛ nsan mun-ɔn. Kɛ n fuannin be sɔ'n, bua'm be wun flannin min, kpɛkuun min kusu min wun yoli be tɛ .

⁹ Ɔ man n seli be kɛ: «N su kankan-man amun kun. Be nga be waan be ´wu'n, be `wu. Be nga kusu b'ɔ fata kɛ be kun be'n, man be kun be, kpɛkuun be nga be ka lɛ'n, be ´kun be wun be ´di.»

¹⁰ Yɛ n fali min kpɔnman nga be flɛ i Aenguɛ'n yɛ m buli nun-ɔn. I bo'n yɛlɛ kɛ aenguɛ nga e nin nvle'm be kwlaa e trali'n ɔ'a wie.

¹¹ Kpɛkuun aenguɛ'n ka lɛ wieli. Kpɛkuun be nga be fia be yo bua'm be atɛ'n bɔ bé nyin wo min su'n, be wunnin kɛ kannzu ndɛ nga n kannin'n, Anannganman'n yɛ ɔ fa wlali mín nuan yɛ n kannin-ɔn.

¹² Yɛ n seli be kɛ: «Sɛ amun waan amun fa min akatua'n be ´man min'n an `fa man min, sɛ amun waan amun fa man-man min kusu-ɔ, man ɔ ka lɛ.» Kpɛkuun be kali sika jɛtɛ ablasan be wlali mín sa nun. Min akatua'n yɛ ɔ o lɛ-ɔ.

¹³ Yɛ Anannganman'n seli min kɛ: «Be bu i kɛ wɔ akatua'n ti dan yɛ o lɛ-ɔ! To sika sɔ'n guɛ lɔ man sɛ ufuɛ'n .» Yɛ n ´fa jɛtɛ ablasan'n yɛ n ´fa ko guɛ i Anannganman i sua'n nun lɔ m ´man sɛ ufuɛ nin-ɔn.

¹⁴ Kpɛkuun yɛ m buli anuansɛ kpɔnman'n nun-ɔn. Min waan m ´bu nun nan Zida nin Izraɛl be afiɛn fɔn.

¹⁵ Anannganman seli min ekun kɛ: «Yo wɔ wun kɛ nnɛn kankanfuɛ b'ɔ wun-man sa wlɛ'n sa.

¹⁶ Afin n su wa fa nnɛn kankanfuɛ uflɛ kun m ´ba mɛn'n nun. I sɔ nnɛn kankanfuɛ liɛ'n, sɛ be ´kun bua o, nɛ́n i ndɛ-ɔ, sɛ bua ´mlin o, nán kɛ ɔ ´ko kunndɛ i ti-ɔ, sɛ bua wun sanndi-mɛn i o, nán kɛ ɔ ´yo i ayre ti-ɔ. Bua nga be tɛ yo juejue'n, ɔ su ta-man be. Be nga b'a lo lɛklɛlɛklɛ'n be dilɛ cɛ yɛ ɔ si i-ɔ. Bé ja bui tutulɛ'n yɛ ɔ ´tutu-ɔ.

¹⁷ Nnɛn kankanfuɛ luflefuɛ ng'ɔ yaci i nnɛn'm be lɛ tu kpɛn'n, i yako! Man alɛ'n saci i sa nin i nyin mma mun. Man i sa fama'n wu i wun yɛ nɛ́n i nyin mma fama'n wun ase kun .»