Sofoni 3 - NYANMIƐN NDƐ'N 1998

Nyanmiɛn yoli Zerizalɛm lele ɔ'a yo-man ye

¹ Nyin kekle klɔ, klɔ saciwa, klɔ bɔ i su kpɛnngbɛn'm be mianmian sran'n, n ´yo i yako!

² Be kan ndɛ be kle i-ɔ, ɔ guɛ i su sin, be kle i ngwlɛlɛ-ɔ, ɔ fɛ-mɛn i su sie-mɛn i bo, ɔ fɛ-mɛn i wla gua-man Anannganman su.

³ I famiɛn i awlo lɔ sran dandan'm be ti kɛ asɔmɔli b'ɔ su tian'n sa. I su jɔlɛ difuɛ'm be ti kɛ nsoso bɔ nnɔsua be ko di koniɛn bɔ sanngɛ nglɛmun be nyan-man like be kpisa-man'n sa.

⁴ I su Nyanmiɛn nuan ijɔfuɛ mun'n, be kwla lafi-man bé su fa-man like wla-man be sa nun kɛ be `yo, be yo-man like nga be kle be'n. I su Nyanmiɛn nyrun jranfuɛ'm be yo Nyanmiɛn i ninnge'm be finfin. Be fa-man mmla'n su .

⁵ Kusu wuun sa kpa yolɛ ti yɛ Anannganman'n wo klɔ'n su-ɔ, nán sa tɛ yolɛ ti-ɔ. Nglɛmun kwlakwla ɔ yiyi i mmla'n nun, ɔ lɛ-man cɛn. Sanngɛ ɔ nin sɔ ngba'n, aeliɛ tɛfuɛ'm be ´yo sa'n sa-a, nyannzuɛn kaan sa kun-man be.

⁶ «N nunnunnin nvle wie mun mlɔnmlɔnmlɔn, be sasawlɛ sua mun bɔ be ti nglo sua'n, bɔ be o klɔ'm be cɔnjɔ'm be su'n, m bubuli be. Be akpɔ'm be tɔli srololo, m bubuli be klɔ mun, sran fi ijɔ-man be su kun.

⁷ Min waan sɛ n ´yo sɔ nan Zerizalɛmfuɛ'm be ´sro min o. Bé nyin nglo-nglo nga n wlali'n, min waan wuun sɛ be ´wun i wlɛ o. Sa nga n ko yo'n, n yoli, sanngɛ sa tɛtɛ yolɛ'n yɛ bé wun kpɛ su-ɔ.»

⁸ I sɔ'n ti min waan: «An `tran lɛ be minndɛ min man n kan sa tɛ nga an yoli mun n kle amun afin m'an gugu kɛ n ´yiayia nvle-nvlefuɛ mun nin famiɛn'm be mɛn'n be nunfuɛ mun nan ya dan nga n fali'n, n ´yo i nuan like m ´man be. Min ya dan ng'ɔ jue kɛ sin sa'n, ɔ ´di asiɛ wunmuan'n.»

Nyanmiɛn ´kaci nvle-nvle'm be nunfuɛ'm be anwlɛn

⁹ «Kpɛkuun n ´kaci nvle-nvle'm be nunfuɛ'm be anwlɛn'n, ndɛ tɛ su fin-man bé nuan fite-man kun. Ɔ man be ´su min Anannganman. Be kwlaa bé bo ´yo kun be ´srɛ min.

¹⁰ Min sufuɛ bɔ n yoli man b'a bo b'a sanndi'n, wie'm be ´jaso Etiopi nzue ba'n sin lɔ be wa cɛ min like.»

Izraɛlfuɛ nga bé ka'n

¹¹ «Cɛn sɔ nun'n sa nga amun yoli min'n, fɔnlɛ nga amun fɔnnin min wun'n, amun su fɛ-mɛn i su afɛ'n kun, afin be nga be tu bé wun beblebe'n, n ´kan be bo amun wun lɛ. Kpɛkuun amun ´yaci amun wun tulɛ min Nyanmiɛn min oka'n su.

¹² Amun nvle'n nun sran nga n ´yaci be lɛ'n, yɛlɛ wɛtɛɛfuɛ mun nin yalɛfuɛ mun. Be liɛ'n be ´lafi min su, be ´fia min sin.

¹³ Izraɛlfuɛ nga be ´ka'n, be su di-man ndrunmun kun, be su bua-man ato, be su lakalaka-man sran'm be kun, be ´di like be ku ´yi, be ´la fɔuun, sran fi su wla-man be srɛ kun.»

Zerizalɛm ´sin i osu

¹⁴ Siɔnfuɛ mun, an `kpan aklunjuɛ kpanlɛ! Izraɛlfuɛ mun, an `bo sro! Zerizalɛmfuɛ mun, man amun klun jɔ kpa kɛ sran klun fa jɔ'n sa,

¹⁵ afin amun wun ya nga Anannganman fali'n ɔ'a guɛ i ase, ɔ'a fuan amun kpɔfuɛ mun. Anannganman b'ɔ ti Izraɛl famiɛn'n, ɔ nin amun wo nun, nán srɛ kun amun, sayalɛ su nyan-man amun kun.

¹⁶ Ɔ lɛ cɛn bɔ be ´se Zerizalɛmfuɛ mun kɛ yoo: «Siɔnfuɛ mun nán srɛ kun amun, nán amún sa sin bubu amun!

¹⁷ Anannganman amun Nyanmiɛn'n jin amun sin. Ɔ lɛ wunmiɛn, ɔ ´yo man amun ´kwla. I klun ti jɔwa dan amun wun, klolɛ b'ɔ klo amun'n ti, amun ´sin amun osu laa'n nun. Amun dunman nun ɔ ´bo sro, ɔ ´si able

¹⁸ kɛ be fa yo i cɛn dilɛ nun'n sa. Sayalɛ'n su nyan-man amun kun Anannganman ´titi amun nyrun nyannzuɛn'n.

¹⁹ I sɔ blɛ nun'n e nin be kwlaa nga be kleli amun yalɛ'n e ´yia nun. Be nga bé ja yo be ya'n m miɛnmiɛn i, n ´yiayia be nga be mlinnin mun, n ´yo man an ´nyan kɔmin, amun dunman'n ´fu lele ɔ ´tru mɛn nga an wunnin nyannzuɛn nun'n be nun.

²⁰ Blɛ sɔ'n nun'n, n ´ko fa amun m ´ba, n ´kan amun m ´bo nun, n ´wla amun sran nun, amun bɔbɔ amun ´wun i. N ´yo man amun ´nyan kɔmin, amun dunman'n ´fu, ɔ ´tru nvle'm be nun.» Anannganman'n yɛ ɔ kan sɔ-ɔ.