Ngɔjue Fɛfɛ Kpa'n 2 - NYANMIƐN NDƐ'N 1998

¹ Sarɔn lɔ lika kpɛtɛkplɛɛ'n nun ijre nyrɛ'n yɛlɛ min. Kongo'm be nun ijre nyrɛ nga be flɛ i kɛ lis'n yɛlɛ min.

(Yasua'n waan)

² Kɛ a wun min janvuɛ'n talua kun nga'm be afiɛn'n, ɔ waan lis nyrɛ wie yɛ ɔ o owie-owie'm be afiɛn sa.

(Talua'n waan)

³ Kɛ a wun min janvuɛ'n gbanflɛn kun nga'm be afiɛn'n, ɔ waan pɔmun waka wie yɛ ɔ o bo'n nun waka'm be afiɛn sa. Sɛ ɔ ti waka'n, wuun n ´se kɛ i fɔnvɔ'n i bo tranlɛ yo min fɛ kpa, i mma'm be yo fɛ kpa min nuan nun.

⁴ Ɔ fali min ɔli kan be yiyi be nyin lɔ'n. Be klɛli lɔ sua'n i anuan'n su kɛ «klolɛ».

⁵ Klolɛ'n i dunman nun ti m'an yo kɛ sran bɔ i wun sanndi-mɛn i sa. Be `fa vinyi mma gato be man min man n di nan n `nyan wunmiɛn. Be `man min pɔmun mma man n di nan mín nyin su klo.

⁶ Man ɔ fɛ i sa bɛ'n suan min ti. Yɛ ɔ `fɛ i sa fama'n cici min!

(Yasua'n waan)

⁷ Zerizalɛm talua mun, n ´srɛ amun kpa ti-ɔ, sɛ klolɛ'n ɔ ti sran'n, wuun n ´se kɛ nán amun tinnge i, nán amun tinnge i ka nan i jasolɛ dɔ'n ɔ'a ju. Sɛ wannzannin nin flete mun bɔ be o blo lɔ'n be ti sran'n, wuun n ´kan kle amun kɛ be dunman nun yɛ n kan ndɛ nga kle amun-ɔn.

Yasua'n i balɛ ndɛ (Talua'n waan)

⁸ N ti min adeba'n i nɛn'n. I yɛ ɔ ´ba lɔ-ɔ! Ɔ tu tra oka nin kpɔlɛ mun yɛ ɔ ba-a.

⁹ A wun i sa-a, ɔ waan flete-ɔ, a wun i sa-a, ɔ waan wannzannin gbanflɛn-ɔn. I yɛ ɔ jin e talɛ'n sin yɛ, ɔ wlɛwlɛ i ti'n fenɛtri'n nun, ɔ o fenɛtri'n i griazi sin lɔ ɔ nian wa.

¹⁰ Min adeba'n ɔ su ijɔ. Ɔ se min kɛ: «Min janvuɛ, bla klanman, bla e wɔ.

¹¹ Ayrɛ blɛ'n ɔ'a sin, nzue'n tɔ-man kun. I tɔlɛ blɛ'n ɔ'a sin.

¹² Waka'm be nyrɛ'n ɔ su kpuke. Jue tolɛ blɛ'n ɔ'a ju. Ablioso'n ɔ su to jue'n bo'n nun lɔ.

¹³ Figie mma'm be su tin, Vinyi'm be nyrɛ'n i fannin'n ɔ bɔn lika'n nun fɛɛn. N janvuɛ klanman, min adeba, jaso bla.»

¹⁴ A ti kɛ min auble sa. Auble'n wo yɛbuɛ buɛ'm be nun, ɔ fia ndroliɛ nga be seli pia'n be nun! ?A o nin? Mmo bɔ i nɛn'n yo fɛ, mmo bɔ i nyrun'n ti klanman kɛ likɛ. Man n ti ɔ nɛn'n, man n wun ɔ nyrun'n.

(I nin waan)

¹⁵ E vinyi'm b'a bo nyrɛ. Amun `tra nsoso mun, nnɛn kanngan sɔ'm be saci vinyi mun.

(Talua'n waan)

¹⁶ Min adeba'n ti min liɛ, n kusu n ti i liɛ. Kan lis nyrɛ'm be o lɛ'n, lɛ yɛ ɔ fɛ i nnɛn mun kɔ didilɛ-ɔ.

¹⁷ Kɛ lika'n ɔ'a jɔ bɔ aunngban fɛfɛ'n ɔ ´fita'n, bɔ ninnge'm be fɔnvɔ'm be ´yo tɛnndɛn'n, min adeba, bla o! Wanndi glaunglaun kɛ wannzannin sa nan bla, wanndi kɛ flete gbanflɛn sa nan bla. Sin oka bɔ be afiɛn'n ti nun'n be su nan bla.