Saun Yolɛ 9 - NYANMIƐN NDƐ'N 1998

Aarɔn nin i mma'm be Nyanmiɛn i junman'n i nun wlulɛ

¹ I le mɔcuɛ su'n, Moiz flɛli Aarɔn nin i mma mun, ɔ nin Izraɛl klɔ'n su kpɛnngbɛn mun.

² Ɔ seli Aarɔn kɛ yoo: «Aarɔn, kunndɛ nannin nga ɔ'a kpɛ cro'n fa yi Anannganman i kpatalɛ tɛ, kpɛkuun kunndɛ bua nyin kun fa yi tɛ nga be yrɛ i nnɛn'n kɔlikɔli'n. Fa be wa yi tɛ man Anannganman. I sɔ nnɛn liɛ mun'n, nán lɛ kaan sa tran wie fi wun.

³ Nan se Izraɛlfuɛ'm be kɛ be `fa boli kpakpuɛ kun be wa fa yi Anannganman i kpatalɛ tɛ, be `fa nannin sɛsɛ kun bɔ ɔ'a di afuɛ kun'n, ɔ nin bua kun bɔ ɔ'a kpɛ cro'n nga ɔ'a di afuɛ kun'n, be `fa be bla be wa yi tɛ nga be yrɛ i nnɛn'n kɔlikɔli'n. I sɔ nnɛn liɛ mun'n, nán lɛ kaan sa tran wie fi wun.

⁴ Yɛ be `fa nannin tola kun, ɔ nin bua nene kun be wa fa yi bo kun yolɛ'n su tɛ be man Anannganman. Be ´ba'n, be `kunndɛ ble sanmlɛn mlɛnnɛnnɛn kpa, be sɛnngɛn i nin ngo, be `fa be sie su, afin andɛ Anannganman ɔ ´yi i wun nglo kle amun.»

⁵ Ninnge nga Moiz klekleli be'n, be fɛli i ngba be ɔli tannin sua'n i nyrun lɔ. Izraɛlfuɛ'm be juli Anannganman nyrun lɛ nan b'a jranjran lɛ.

⁶ Yɛ Moiz seli be kɛ yoo: «N wa kle like nga Anannganman waan amun yo nan ɔ'a yi i wun nglo nyannyannyan ɔ'a kle amun'n.»

⁷ Kpɛkuun Moiz seli Aarɔn kɛ: «Ɔ Nyanmiɛn kpatalɛ tɛ i nnɛn'n nin tɛ nga be yi-ɔ be yrɛ i nnɛn'n kɔlikɔli'n i nnɛn'n fa be wunnge Nyanmiɛn i sɔwlɛ'n wun lɔ, nan fa be yi tɛ wɔ nin Izraɛlfuɛ'm be dunman nun. Kpɛkuun like nga be yo bɔ Anannganman yaci bé wun sa tɛ'n cɛ be'n, yo ɔ bɔbɔ ɔ liɛ'n, yɛ yo mɛn mma'm bé liɛ'n kusu man be. Kɛ a ko yo i sɔ'n, kpɛkuun yi mɛn mma'm bé tɛ liɛ'n. Kpɛkuun like nga be yo bɔ Anannganman yaci bé wun sa tɛ'n cɛ be'n, fa yo i bé su ekun. Nian Anannganman i mmla'n su yo i kɛ ɔ fa kleli wɔ'n sa .»

⁸ Aarɔn fali i nannin liɛ'n kpɛnnin Nyanmiɛn i sɔwlɛ'n i nyrun lɛ, kpɛkuun yɛ ɔ kpɛ i kɔmin fa yili Nyanmiɛn kpatalɛ tɛ nin-ɔn.

⁹ Aarɔn i mma'm be mannin nnɛn i mmoja'n su be kleli i: ɔ fɛli i sama'n boli nun yɛ ɔ fa wie siesieli Nyanmiɛn i sɔwlɛ'n i cɔnjɔ-cɔnjɔ'm bé su. Kpɛkuun ɔ utuli i onga'n Nyanmiɛn i sɔwlɛ'n bo lɛ.

¹⁰ Nnɛn'n i luilui lika'n nin i aklɛnzia mun'n, ɔ nin i buɛ gbagblagba'n, ɔ yrali be Nyanmiɛn i sɔwlɛ'n su kɛ nga Anannganman kan kleli Moiz'n sa.

¹¹ Nnɛn'n i nnɛn ba nin i kplo'n, be fa be ɔli nanmue'n i sin lɔ be ko yrali be.

¹² Bua nene nga Aarɔn fa bali tɛ nga sɛ be yi-ɔ be yrɛ i nnɛn'n kɔlikɔli'n i yilɛ'n, kɛ Aarɔn kpɛli i kɔmin'n, i mma'm be fɛli i mmoja'n be mɛnnin i. Yɛ i kusu fɛli i sama'n boli nun yɛ ɔ fa kpɛntɛn-kpɛntɛnnin Nyanmiɛn i sɔwlɛ'n i sin i sin'n be su-ɔ.

¹³ Nnɛn'n i ti'n nin i nnɛn ba nga be kpɛkpɛli nun'n, be fali be be mɛnnin i ekun nan ɔ'a yra be Nyanmiɛn i sɔwlɛ'n su lɛ.

¹⁴ Nnɛn'n i klun aya'n nin i fle'n, ɔ nin i ja mun'n, ɔ wunnzinnin bé wun. Kpɛkuun ɔ fali be guali nnɛn sinsin'm bé su Nyanmiɛn i sɔwlɛ'n su yɛ ɔ yrali be-ɔ.

¹⁵ Kɛ ɔ yoli sɔ'n, Aarɔn fali mɛn mma'm bé tɛ ninnge liɛ mun kleli Anannganman. Boli kpakpuɛ nga mɛn mma'm be fa bali bé tɛ'n i yilɛ'n, Aarɔn kpɛli i kɔmin, ɔ fa yili tɛ'n kɛ ɔ fa nannin yoli'n sa.

¹⁶ Kpɛkuun nnɛn nnyɔn nga be fa bali tɛ nga be yrɛ i nnɛn'n kɔlikɔli'n i yilɛ'n, ɔ fa be kleli Anannganman. Kɛ i sɔ tɛ liɛ'n i su mmla'n fa ti'n yɛ ɔ nian su yili-ɔ.

¹⁷ Kpɛkuun sraka'n b'ɔ i liɛ ɔ ti ble annzɛ like ng'ɔ ti kɛ ble'n sa'n, ɔ fa kleli Anannganman, nan ɔ'a flɛ i sa buɛ kun ɔ'a yrɛ i Nyanmiɛn i sɔwlɛ'n su ɔ'a fa uka tɛ nga be yi-ɔ be yrɛ i nnɛn kɔlikɔli'n su.

¹⁸ Nannin tola nin bua nene nga mɛn mma'm be nin be bali kɛ be `fa yi bo kun yolɛ i su tɛ'n, Aarɔn kpɛli be kɔmin. Yɛ i mma'm be fali nnɛn sɔ'm be mmoja'n be mɛnnin i-ɔ. I kusu fa guaguali Nyanmiɛn i sɔwlɛ'n i sin i sin'n bé su.

¹⁹ Nannin tola'n nin bua nene'm be lui nin o, bé lua nin o, be luilui ng'ɔ o be aya nin be fle'n bé wun nin o, be aklɛnzia mun o, ɔ nin be buɛ gbagblagba nin o, be fali be be mɛnnin i ekun.

²⁰ Be fali nnɛn lui sɔ'n guali nnɛn'm be wue'n su, yɛ Aarɔn yrali be Nyanmiɛn i sɔwlɛ'n su lɛ-ɔ.

²¹ Mmla nga bɔ Moiz kan kleli Aarɔn'n, ɔ nian su yoli i su sa'n, ɔ man ɔ fali nnɛn'm be wue'n, ɔ nin nnɛn sɔwa fama'n ɔ totoli be Anannganman i nyrun lɛ.

²² Kɛ Aarɔn wieli Nyanmiɛn i kpatalɛ tɛ nin tɛ nga be yrɛ i nnɛn kɔlikɔli'n, ɔ nin bo kun yolɛ i su tɛ'm be yi'n, kpɛkuun ɔ mɛnnin i sa'n su nglo mɛn mma'm bé su, ɔ fa yrali be nguan. Kɛ ɔ yoli i sɔ'n, kpɛkuun yɛ ɔ fin Nyanmiɛn i sɔwlɛ'n su lɔ jrali-ɔ.

²³ I sin Moiz nin Aarɔn be ko wluli tannin sua nga Anannganman yi i wun nglo nun lɔ'n nun. Kɛ be wluli lɔ be fiteli'n, kpɛkuun yɛ be yrali mɛn mma'm be nguan-an. Kɛ be yrali be nguan b'ɔ wieli'n, Anannganman wa yili i wun nglo kleli be kwlaa sɔ'n.

²⁴ Be ´nian-an sin yɛ ɔ'a kpɛn Nyanmiɛn i sɔwlɛ'n su yɛ. Ɔ yrali tɛ nga be yrɛ i nnɛn'n kɔlikɔli'n nin tɛ nnɛn kun'm be lui'n. Kɛ Izraɛlfuɛ'm be wunnin i sɔ'n, kpɛkuun yɛ be bo be sroli woo-ɔ! Kpɛkuun yɛ be utuli bé nyin'n i ase-ɔ.