Saun Yolɛ 4 - NYANMIƐN NDƐ'N 1998

Nyanmiɛn nyrun jranfuɛ kpɛnngbɛn'n i ti kpatalɛ tɛ

¹ Anannganman seli Moiz kɛ

² ɔ `kan ndɛ ng'ɔ yɛ'n kle Izraɛlfuɛ mun. I waan: «Like nga min mmla'n tannin kɛ nán be yo i mlɔnmlɔn'n, bɔ sran kun ɔ'a sunnzun-man kɛ ɔ ´yo i sɔ sa'n, bɔ ɔ'a yo'n, like ng'ɔ fata kɛ ɔ yo'n yɛ:

³ Sɛ min nyrun jranfuɛ'm be kpɛnngbɛn'n yɛ ɔ yo i sɔ sa liɛ'n b'ɔ man sa tɛ sɔ'n ɔ'a sa mɛn mma'm be kwlaa'n, man ɔ fa nannin tola kun bɔ lɛ nun-mɛn i wun'n, ɔ `fa kpata min i sa tɛ b'ɔ yoli'n ti.

⁴ Ɔ `fa nannin tola'n wɔ tannin sua nga n yi min wun nglo nun'n i anuan'n nun min nyrun lɔ, ɔ `fɛ i sa'n fuɛ i nnɛn'n i ti'n su nan ɔ `kpɛ i kɔmin.

⁵ Ɔ `fɛ i mmoja'n wie wlu tannin sua nga n yi min wun nglo nun'n nun lɔ.

⁶ Ɔ `fɛ i sama'n kun bo i nnɛn i mmoja'n nun, nan ɔ `fa kpɛntɛn-kpɛntɛn tannin ng'ɔ kpɛ min sua'n nun i bue ng'ɔ fite weiin nun wa'n i nun. Ɔ `yo i sɔ kpɛ nso min nyrun lɛ.

⁷ Ɔ `fa mmoja'n wie siesie ansans yrawlɛ ng'ɔ o min nyrun lɛ tannin sua'n nun lɔ'n i cɔnjɔ-cɔnjɔ bɔ be ti kɛ nnɛn wɛ sa'm bé su. Kpɛkuun ɔ `ko utu mmoja'n i onga'n min sɔwlɛ'n b'ɔ jin tannin sua'n i nyrun lɛ'n i bo lɛ.

⁸ Nnɛn i luilui lika'n, ɔ `yiyi i kwlaa'n, i aya nin i fle'n bé wun lui, ɔ `yiyi,

⁹ i aklɛnzia nnyɔn'n nin bé wun lui'n bɔ o i asi nun'n, ɔ `yiyi be. Kpɛkuun ɔ `yi i buɛ i kpa lika fuɛ'n. I buɛ'n nin i aklɛnzia'n, be `yi be likawlɛ.

¹⁰ Man min nyrun jranfuɛ'n ɔ yiyi i lika sɔ mun kɛ be fa yiyi bo kun yolɛ i su tɛ nnɛn'n i liɛ'n sa nan ɔ `yra be min sɔwlɛ'n su.

^11-12 Sanngɛ nnɛn'n i ng'ɔ ka lɛ'n, i kplo'n, nin i nnɛn ba'n, nin i ti'n, nin i ja mun, nin i fle'n, nin i aya'n, nin i waka su'n, be `fa jaso nanmue'n nun lɛ be wɔ min lika nga be utu nnɛn nga be yra be'n be nzuɛn'n i lɔ'n, be `fa ɔ lɔ. Be `trɔ sin nan be `yrɛ i, lɔ yɛ ɔ ti i yrawlɛ-ɔ .»

Nzrafuɛ'm bé ti kpatalɛ tɛ

¹³ «Sɛ kusu Izraɛlfuɛ'm be ngba yɛ like nga min mmla'n tannin kɛ nán be yo i mlɔnmlɔn'n, bɔ b'a sunnzun-man kɛ be ´yo i sɔ sa'n, kpɛkuun b'a wun-man nun b'a yo'n, wuun b'a yo tɛ.

¹⁴ Kɛ be ko wun i kɛ b'a yo i sɔ sa'n, man be fa nannin tola kun be fa ko kpata min. Be `fa be wɔ tannin sua'n nyrun lɔ.

¹⁵ Man klɔ'n su kpɛnngbɛn'm be fa bé sa fua nnɛn'n i ti su nan b'a kpɛ i kɔmin min nyrun lɛ.

¹⁶ Man min nyrun jranfuɛ kpɛnngbɛn'n ɔ fɛ i mmoja'n wie wlu tannin sua'n nun lɔ.

¹⁷ Ɔ `fɛ i sama'n kun bo i nnɛn'n i mmoja'n nun, nan ɔ `fa kpɛntɛn-kpɛntɛn tannin ng'ɔ kpɛ min sua'n nun'n i bue ng'ɔ fite weiin nun wa'n i nun sɔ kpɛ nso.

¹⁸ Ɔ `fa mmoja'n wie `siesie min sɔwlɛ'n i cɔnjɔ-cɔnjɔ bɔ be ti kɛ nnɛn wɛ sa'n su min nyrun lɛ tannin sua'n nun lɔ. Kpɛkuun ɔ `ko utu mmoja'n i onga'n min sɔwlɛ b'ɔ jin tannin sua'n i anuan'n nun lɛ'n i bo lɛ.

¹⁹ Nnɛn'n i nun luilui'n, ɔ `yiyi i ngba'n nan ɔ `yrɛ i lui sɔ'n min sɔwlɛ'n su.

²⁰ Ninnge nga bɔ min nyrun jranfuɛ'n fa yoli i bɔbɔ i tɛ nnɛn liɛ'n su'n, ɔ `nian bé su tɛɛn yo be. Like ng'ɔ fata kɛ min nyrun jranfuɛ'n ɔ yo nan m'an yaci Izraɛlfuɛ'm bé wun sa'n m'an cɛ be'n yɛ ɔ o lɛ-ɔ. Kɛ ɔ ko yo i sɔ'n, kpɛkuun n kusu n ´yaci bé wun sa'n cɛ be.

²¹ I sin man min nyrun jranfuɛ'n ɔ fa nnɛn i onga'n ɔ `jaso nanmue'n nun lɛ. Ɔ `ko yrɛ i kɛ nannin ng'ɔ fa yili i bɔbɔ i tɛ liɛ'n sa. Ɔ ti nzrafuɛ'm bé ti tɛ yɛ ɔ yili fa kpatali min-ɔn.»

Kpɛnngbɛn kun i ti kpatalɛ tɛ

²² «Sɛ siefuɛ kun yɛ like nga min Anannganman b'ɔ n ti i Nyanmiɛn'n min mmla'n tannin kɛ nán be yo i mlɔnmlɔn'n, b'ɔ sunnzun-man kɛ ɔ ´yo, kpɛkuun i sɔ sa liɛ'n ɔ'a yo'n, wuun ɔ'a yo sa tɛ.

²³ Kɛ ɔ ko wun i kɛ ɔ'a yo sa tɛ'n, man ɔ fa boli kpakpuɛ kun yɛ ɔ `fa yi tɛ kpata min-ɔn. I sɔ nnɛn liɛ'n, nán man lɛ trɛn i wun.

²⁴ Ɔ `fɛ i sa'n fua boli kpakpuɛ'n i ti'n su nan ɔ `kpɛ i kɔmin kan be kpɛ nnɛn nga be yrɛ i nnɛn'n kɔlikɔli'n i kɔmin lɛ'n. Ɔ ti i ti kpatalɛ tɛ.

²⁵ Man min nyrun jranfuɛ'n fɛ i sama'n kun bo i nnɛn mmoja'n nun nan ɔ `fa klikli min sɔwlɛ nga be yi tɛ su'n i cɔnjɔ-cɔnjɔ bɔ be ti kɛ nnɛn wɛ sa'm bé su nan ɔ ko utu i onga'n min sɔwlɛ'n i ja wun lɛ.

²⁶ Man ɔ yra nnɛn'n i lui'n i ngba min sɔwlɛ'n su kɛ bo kun yolɛ i su tɛ nnɛn liɛ'n sa. Like ng'ɔ fata kɛ min nyrun jranfuɛ'n ɔ yo nan m'an yaci kpɛn sɔ'n i wun sa m'an cɛ i'n yɛ ɔ o lɛ-ɔ. Kɛ ɔ ko yo sɔ'n, kpɛkuun n ´yaci i wun sa'n n ´cɛ i.»

Klɔ'n su sran ngbɛn kun i ti kpatalɛ tɛ

²⁷ «Sɛ klɔ'n su sran ngbɛn wie yɛ like nga min mmla'n tannin kɛ nán be yo, bɔ ɔ'a sunnzun-man kɛ ɔ ´yo i sɔ sa liɛ'n, kpɛkuun-ɔn ɔ'a yo'n, wuun ɔ'a yo sa tɛ.

²⁸ Kɛ ɔ ko wun i kɛ ɔ'a yo sa tɛ'n, ɔ `fa boli bla kun yɛ ɔ `fa yi tɛ nin-ɔn. I sɔ boli bla liɛ'n, nán man lɛ trɛn i wun.

²⁹ Ɔ `fɛ sa'n fua nnɛn nga be ´fa yi tɛ'n i ti su nan ɔ `kpɛ i kɔmin kan be kpɛ tɛ nnɛn nga be yrɛ i kɔlikɔli'n i kɔmin lɛ'n.

³⁰ Man min nyrun jranfuɛ'n fɛ i sama'n kun bo i nnɛn'n i mmoja'n nun nan ɔ `fa klikli min sɔwlɛ'n i cɔnjɔ-cɔnjɔ bɔ be ti kɛ nnɛn wɛ sa'm bé su, nan ɔ `utu i onga'n min sɔwlɛ'n i ja wun lɛ.

³¹ Man min nyrun jranfuɛ'n ɔ yi nnɛn i lui'n kɛ be fa yi bo kun yolɛ i su tɛ i nnɛn'n i liɛ'n sa nan ɔ `yrɛ i min sɔwlɛ'n su. Ɔ bɔn min bue nun fannin. Like ng'ɔ fata kɛ min nyrun jranfuɛ ɔ yo nan m'an yaci Izraɛlfuɛ'm bé wun sa'n m'an cɛ be'n yɛ ɔ o lɛ-ɔ. Kɛ ɔ ko yo i sɔ'n, kpɛkuun n kusu n ´yaci i wun sa n cɛ i.

³² Sɛ ɔ ti bua sɛsɛ kan wie yɛ i waan ɔ ´fa yi tɛ'n, man ɔ fɛ i bla nga lɛ nun-mɛn i wun'n nan m'an yaci i wun sa'n m'an cɛ i.

³³ Ɔ `fɛ i sa'n fua nnɛn'n i ti'n su. Ɔ `kpɛ i kɔmin kan be kpɛ nnɛn nga be yra be kɔlikɔli'n be kɔmin lɛ'n.

³⁴ Man min nyrun jranfuɛ'n fɛ i sama'n kun bo i nnɛn i mmoja'n nun, ɔ `fa klikli min sɔwlɛ'n i cɔnjɔ-cɔnjɔ bɔ be ti kɛ nnɛn wɛ sa'm bé su, nan ɔ `ko utu i onga'n min sɔwlɛ'n i bo lɛ.

³⁵ Nnɛn'n i luilui lika'n, man min nyrun jranfuɛ'n ɔ yiyi be. Ɔ `yiyi be kɛ be fa yiyi bo kun yolɛ i su tɛ'n nnɛn'n i liɛ'n sa, nan ɔ `yrɛ i min sɔwlɛ'n su sin nga be trɔli i lɛ'n su. Like ng'ɔ fata kɛ min nyrun jranfuɛ'n ɔ yo nan m'an yaci ngbata sefuɛ'n i wun sa'n m'an cɛ i'n yɛ ɔ o lɛ-ɔ .»