Saun Yolɛ 3 - NYANMIƐN NDƐ'N 1998

Bo kun yolɛ i su tɛ'n

¹ «Sɛ nnɛn dan kɛ nannin tola, wie kusu-ɔ nannin bla, yɛ sran kun waan ɔ ´fa yi bo kun yolɛ i su tɛ man min'n, nán man lɛ trɛn i wun.

² Ɔ `fa ɔ tannin sua nga n yi min wun nglo nun'n i anuan'n nun lɔ. Ɔ `fɛ i sa'n fua nnɛn'n i ti'n su nan ɔ `kpɛ i kɔmin, nan Aarɔn i wa yasua mun bɔ be ti min nyrun jranfuɛ'n be `fɛ i mmoja'n guagua min sɔwlɛ'n i nvɛn wun nvɛn wun'm bé su tɛɛn `sin yia nun.

³ I sɔ tɛ nnɛn liɛ'n, i lika nga be `fa man min'n be yɛ: i lui ng'ɔ o i aya'n nin i fle'n bé wun'n,

⁴ i aklɛnzia nnyɔn'n nin bé wun lui'n b'ɔ o i asi nun'n, nin i buɛ i kpa lika'n. I buɛ sɔ'n nin i aklɛnzia mun'n, be `yi be likawlɛ.

⁵ Aarɔn i wa yasua'm be `yrɛ i ngba ng'ɔ o lɛ'n min sɔwlɛ'n su, ɔ nin nnɛn'n bɔbɔ nga be fa yili tɛ'n. Tɛ nga be yrɛ i nnɛn'n kɔlikɔli'n, ɔ bɔn min bue nun fannin.

⁶ Sɛ bua o annzɛ boli o yɛ sran kun waan ɔ ´fa yi i sɔ tɛ man min'n, nnɛn ng'ɔ ´fa'n, sɛ bla o, sɛ yasua o, nán man lɛ trɛn i wun.

⁷ Sɛ ɔ ti bua bɔ ɔ'a kpɛ cro yɛ ɔ fa'n, man ɔ fa bla min nyrun lɔ ko `kle min.

⁸ Ɔ `fɛ i sa'n fuɛ i nnɛn'n i ti'n su, nan be `kpɛ i kɔmin tannin sua'n nyrun lɛ, nan Aarɔn i wa yasua'm be `fɛ i mmoja'n guagua min sɔwlɛ'n i nvɛn wun nvɛn wun'm be su tɛɛn `sin yia nun.

⁹ I sɔ tɛ nnɛn liɛ'n, i lika ng'ɔ ti min liɛ bɔ be `yrɛ i be `man min'n yɛ: i lua wunmuan'n, be `tu i lua kpue'n nun lɔ, i aya nin i fle'n bé wun lui'n,

¹⁰ ɔ nin i aklɛnzia nnyɔn'n nin bé wun lui'n b'ɔ o i asi nun'n, ɔ nin i buɛ i kpa lika'n. Be `yi i buɛ'n nin i aklɛnzia'm be likawlɛ.

¹¹ Man min nyrun jranfuɛ'n kun ɔ yrɛ i min sɔwlɛ'n su. I sɔ aliɛ liɛ'n ti min liɛ, be `yrɛ i be `fa man min.

¹² Sɛ boli bla yɛ sran kun fa ba tɛ i yilɛ'n, man ɔ fa bla min nyrun lɔ ko kle min.

¹³ Ɔ `fɛ i sa'n fuɛ i nnɛn'n i ti'n su nan ɔ `kpɛ i kɔmin tannin sua'n nyrun lɛ, nan Aarɔn i wa yasua'm be `fɛ i mmoja'n guagua min sɔwlɛ'n i nvɛn wun nvɛn wun'm be su tɛɛn `sin yia nun.

¹⁴ I sɔ tɛ nnɛn liɛ'n, i lika ng'ɔ ti min liɛ'n yɛlɛ i aya'n nin i fle'n bé wun lui'n,

¹⁵ ɔ nin i aklɛnzia nnyɔn'n nin bé wun lui'n bɔ o i asi nun'n, ɔ nin i buɛ'n i kpa lika fuɛ'n. Be `yi i buɛ'n nin i aklɛnzia mun likawlɛ.

¹⁶ Min nyrun jranfuɛ'n kun `yrɛ i min sɔwlɛ'n su lɛ. Ɔ bɔn min bue nun fannin. Min aliɛ-ɔ. Be `yrɛ i be man min. Nnɛn lui'n kwlaa ti min liɛ.

¹⁷ I sɔ'n ti'n, ɔ fin ndɛ, kan kwlaa bɔ amun wo'n, mmla nga n wa ´klekle amun yɛ'n, amun nin amun osu nunfuɛ mun amun `fa su: nán amun di nnɛn lui nin nnɛn mmoja. Nán amun di be le nan kɛ ɔ ´yo-ɔ ɔ'a yo-ɔ.»