Saun Yolɛ 2 - NYANMIƐN NDƐ'N 1998

Ble annzɛ like ng'ɔ ti kɛ ble sa bɔ be fa yi sraka man Anannganman'n

¹ «Sɛ sran kun waan ɔ ´fa ble annzɛ like ng'ɔ ti kɛ ble sa ´fa yi sraka'n ´man min'n, ɔ `fa ble sanmlɛn mlɛnnɛnnɛn kpa'n, ɔ `gua su ngo nan ɔ `fa ansans sie su,

² nan ɔ `fa ko to min nyrun jranfuɛ Aarɔn i mma mun. Ble sanmlɛn mlɛnnɛnnɛn kpa nga b'a fa ngo b'a sɛnngɛn i'n, man be fla bé sa buɛ kun, man be fa ansans, nan min nyrun jranfuɛ'n kun `yrɛ i min sɔwlɛ'n su. Ɔ ti sraka'n i nzɔliɛ kan. Be flɛ i kɛ Be Wla Kpɛnlɛ Like. Be `yrɛ i kɔlikɔli, ɔ bɔn min bue nun fannin.

³ Ninnge'n i onga'n ti Aarɔn nin i wa yasua mun be liɛ. Fiɛn nun-man bé wun mlɔnmlɔn, afin min ninnge nga be mannin min'n i wie-ɔ.

⁴ Sɛ like wie bɔ be tɔn i kpaun tɔnwlɛ nun yɛ be waan be ´fa blɛ min'n, san kpaun nga b'a gua-man nun kpaun ayre'n bɔ be fɔtɔ i nin ngo'n, yɛ be `fa-a. Wie kusu'n, kpaun paplapa nga b'a gua-man nun kpaun ayre'n bɔ be fa ngo be kɛnkɛn i'n, i yɛ be `fa-a. Kpaun wafa nnyɔn sɔ'n, man be fa sanmlɛn mlɛnnɛnnɛn kpa'n yɛ be `tɔn-ɔn.

⁵ Like nga be waan be ´fa man min'n, sɛ ɔ ti kpaun nga b'a gua-man nun kpaun ayre'n bɔ be kɛɛn i puali nun'n, man be fa ble sanmlɛn mlɛnnɛnnɛn kpa be fɔtɔ i nin ngo. Sanngɛ nán man be gua nun kpaun ayre.

⁶ Man be bubu kpaun sɔ nun nan be `fa ngo'n be guagua su ekun. Ble annzɛ like ng'ɔ ti kɛ ble sa bɔ be fa man min'n i wie yɛ ɔ o lɛ-ɔ.

⁷ Like nga be waan be ´fa man min'n, sɛ ɔ ti like bɔ be nyintɔn i griazi su'n, man be fa ble sanmlɛn mlɛnnɛnnɛn kpa be fɔtɔ i nin ngo.

⁸ Be `fɛ i sɔ like mun be ko man min. Be `fa man min nyrun jranfuɛ mun nan be `fa ɔ min sɔwlɛ lɔ.

⁹ Man min nyrun jranfuɛ'n ɔ fa Be Wla Kpɛnlɛ Like'n nan ɔ `yrɛ i min sɔwlɛ'n su. I sɔ sraka liɛ'n nga be yrɛ i kɔlikɔli'n, ɔ bɔn min bue nun fannin.

¹⁰ Ninnge'n i onga'n ti Aarɔn nin i wa yasua'm be liɛ. Fiɛn nun-man bé wun mlɔnmlɔn, afin min ninnge nga be mannin min'n i wie-ɔ.

¹¹ Like nga be ´fa man min'n, ɔ fata-man kɛ kpaun ayre tran ba kun sa nun. Like nga be fa man min bɔ be ti yralɛ liɛ'n, kɛ be ´yo'n, nán man be sɛnngɛn i nin kpaun ayre annzɛ awɛma nzue.

¹² Fie su ninnge nga be nyɛn i'n, blɛ bɔ be ´fɛ i klikli'n be ´fa ko man min'n, i liɛ'n, be yrɛ-mɛn i wie kɛ be fa yra ninnge nga mun min sɔwlɛ'n su bɔ be bɔn min bue nun fannin'n sa.

¹³ Ble annzɛ like ng'ɔ ti kɛ ble sa bɔ be ´fa man min'n, be `gua su njin. Aenguɛ nga min nin amun e trali'n, i nzɔliɛ like'n yɛlɛ njin'n. Man njin ɔ tran ble annzɛ like ng'ɔ ti kɛ ble sa'n bɔ amun ´fa yi sraka ´man min'n i nun titi .

¹⁴ Amun fie su ninnge klikli nga amun nyan be'n, bɔ amun ´fa ko man min'n, bɔ be ti kɛ ble sa'n, amun `kɛɛn wie yɛ amun `si wie. Kɛ amun ´fa ko man min'n,

¹⁵ amun `dun mmua be `fa ngo be guagua su yɛ amun `fa ansans be sie su. Ble annzɛ like ng'ɔ ti kɛ ble sa bɔ be fa man min'n, i wie yɛ ɔ o lɛ-ɔ.

¹⁶ Man min nyrun jranfuɛ'n ɔ fa ble mma nga be sili'n i wie, ɔ nin ngo'n, ɔ nin ansans i ngba'n, i kwlaa sɔ bɔ be flɛ i kɛ Be Wla Kpɛnlɛ Like'n, ɔ `yrɛ i. I sɔ sraka liɛ'n, be `yrɛ man min.»