Neemi 4 - NYANMIƐN NDƐ'N 1998

¹ Kɛ Sanbalat nin Tɔbiza, nin Arabfuɛ nin Amɔnfuɛ, nin Asdɔdfuɛ'm be tili kɛ Zerizalɛm klɔ'n i talɛ'n i kplanlɛ'n su kɔ i nyrun, nan e su tannintannin toklo mun'n, ɔ yoli be ya dan.

² Nan b'a gugu kɛ bé bo `yo kun nan be nin ye bɔ e ti Zerizalɛmfuɛ mun'n e `kun nan be `sanngan e nun.

³ Yɛ e srɛli e Nyanmiɛn'n, nan y'a sie sran kɛ be sasa ye kɔnguɛ nin wia su nan sɛ be nin ye ´ba kunlɛ-ɔ, be kan kle ye.

⁴ Zidafuɛ'm be waan: «Junman difuɛ'm b'a fɛ. E kplan talɛ nga-a, ɔ su yo-man ye, afin ɔ bubuli dan.»

⁵ E kpɔfuɛ'm be kusu be bu i kɛ e si-man nga be waan be ´yo'n nun. Be waan: «Kɛ be ´bo bli-ɔ, e yɛ e o yɛ, e wa nunkun be nunkunlɛ kpa, kpɛkuun be ´yaci junman sɔ'n.»

Neemi wlali junman difuɛ'm bé sa nun alɛ ninnge

⁶ Zuif nga be mantan be lɛ'n, be bali kpɛ blu be wa yiyili bé bo kleli ye. Be klekleli ye lika nga b'a ko jranjran nun sɛsɛsɛ nan be wa tɔ e su'n.

⁷ Yɛ n fali Izraɛlfuɛ mun n siesieli be talɛ'n i sin, lika tɔnun'm be nun, ɔ nin asiɛ kee'm be su. N siesieli be awlobo-awlobo. Be tokofi nin be cua, nin be ta'm be o bé sa nun.

⁸ Kɛ n wieli kan be wo'n i nian-nian'n, n seli kpɛnngbɛn nin jɔlɛ difuɛ, nin sran'm be kwlaa kɛ: «Nán man amun sro be! Nán amún wla fi kɛ Anannganman ti dan nan ɔ yo sro. Amun `kun amun niaan nin amun mma mun, nin amún yi mun, ɔ nin amun awlo'm be ti alɛ.»

⁹ E kpɔfuɛ'm be tili i kɛ y'a si ajalɛ nga be fali nun. Be wunnin kɛ Nyanmiɛn'n ɔ'a saci be jajalɛ mun. Ɔ man e kwla sali e sin e osu, e ɔli talɛ kpanlɛ junman'n su.

¹⁰ Sanngɛ kɛ ɔ fɛ lɛ'n, min sran'm be bue yɛ be yo junman nin-ɔn, be bue kusu bé sa nun cua, ɔ nin nyrɛn, ɔ nin ta, ɔ nin like kokloko bɔ be fa kata be wue'n su'n. Kpɛnngbɛn'm be ´nian-an, Zidafuɛ'm be kwlaa be o be junman'n su.

¹¹ Be nga be kplan talɛ'n, ɔ nin be nga be wla trɔ annzɛ be sua trɔ'n be fa bé sa kun di junman, yɛ alɛ kunlɛ like o bé sa kun'n nun.

¹² Kɛ be ´di junman'n, wuun be tokofi'n san bé bo. Awɛ bofuɛ nin min yɛ ɔ sin-ɔn.

¹³ N seli kpɛnngbɛn nin jɔlɛ difuɛ, nin sran'm be kwlaa kɛ: «Junman'n ti dan, i diwlɛ'n ti tɛtrɛ. Ɔ man e nun-man lika kunngba, e o talɛ'n su kunngun.

¹⁴ Sɛ amun ti awɛ'n, amun `yia kan e o bɔ e bo awɛ'n lɛ'n. E Nyanmiɛn'n ´kun e ti alɛ!»

¹⁵ Kɛ e dili junman'n sa, kɛ ɔ fɛ i aliɛ njɛnniɛn b'ɔ ´fa ju kɔnguɛ'n bɔ nzraama'm be ´fite'n, e o su. Cua'n wo e bue sa nun.

¹⁶ I blɛ sɔ'n nun'n, n seli sran'm be ekun kɛ be nin bé sa nun sran'm be `la Zerizalɛm, nan e `sasa klɔ'n nan wia nun y'a yo junman'n.

¹⁷ E nin min niaan, nin min sufuɛ, nin min sasafuɛ nga be su min su'n, e wie fi e yi-man e tralɛ'n. E alɛ'n ninnge'n nin nzue jaso-man é sa nun.