Neemi 3 - NYANMIƐN NDƐ'N 1998

Zuif'm be su bo Zerizalɛm klɔ'n i talɛ'n i kplanlɛ i bo uflɛ

¹ Eliasib b'ɔ ti Nyanmiɛn nyrun jranfuɛ'm be su kpɛn'n ɔ nin i wiengu Nyanmiɛn nyrun jranfuɛ'm bé bo yoli kun. Be kplannin anuan nga be flɛ i kɛ Bua'm be anuan'n i talɛ'n. Be yili i nglo nan b'a wlɛ i anuan'n. I sin be kplannin talɛ'n lele juli klɔ'n i sasawlɛ nga be flɛ i sran ya Sawlɛ'n. Be yili i nglo, kpɛkuun be kplannin talɛ'n lele juli klɔ'n i sasawlɛ kun nga be flɛ i Ananeɛl Sasawlɛ'n i wun lɔ.

² Zerikofuɛ'm be kplan be talɛ liɛ'n Eliasib mun bé wun lɛ. I sin Imri i wa Zakir yɛ ɔ mantan be-ɔ.

³ Sɛnafuɛ'm be kplannin anuan nga be flɛ i Jue anuan'n. Be dun mmua kplannin anuan'n i wlawlɛ'n, kpɛkuun be fali anuan'n wlali nun, nan b'a wlɛ i sin blalɛ ng'ɔ tra nun'n nin i nun gboklo mun.

⁴ Akɔz i wa Iri i klun ba Mɛremɔt ɔ mantan be lɛ. Mɛsezabeɛl i wa Berekia i klun ba Mɛsilam kusu mantan Mɛremɔt lɛ, yɛ Baana i wa Zadɔk nin Mɛsilam be yia.

⁵ Tekoafuɛ'm be nin Zadɔk mantan su lɛ, sanngɛ be kpɛnngbɛn'm bé nyin ɔ'a yi-man be min mun.

⁶ Pazeak i wa Zozada nin Bɛzɔdia i wa Mɛsilam be yoli Zekana anuan'n i uflɛ. Be dun mmua kplannin i wlawlɛ'n, i sin be wlali anuan'n, nan b'a wlɛ i sin blalɛ ng'ɔ tra nun'n ɔ nin gboklo mun!

⁷ Mɛlatia b'ɔ ti Gabaɔnfuɛ, nin Zadɔn b'ɔ ti Merɔnɔtfuɛ'n, be nin Gabaɔnfuɛ mun nin Mizpafuɛ'm be o likawlɛ, be mantan Zozada nin Mɛsilam. Be dili be junman liɛ'n juli nvle siefuɛ ng'ɔ o nzue i bue kun lɔ i lika'n i wun lɔ.

⁸ Araza i wa Iziɛl b'ɔ ti sika ɔkwlɛ ajuin difuɛ'n ɔ mantan lɛ, yɛ Anania b'ɔ ti parfɛn yifuɛ'n i kusu mɛntɛn i lɛ. Be wieli be junman liɛ'n di, be juli kan Zerizalɛm i talɛ'n ti tɛtrɛ lɛ'n.

⁹ Ir i wa Rɛfaza b'ɔ ti Zerizalɛm asa'n i bue su kpɛnngbɛn'n wo be sa su lɛ.

¹⁰ Arimaf i wa Zɛdaza o i sa su lɛ, ɔ di i junman liɛ i sua'n i ndɛnman. Asabnia i wa Atis o i sa su lɛ.

¹¹ Arɔm i wa Malkiza nin Pasat-Moab i wa Asib be wlawla lika uflɛ nin Kpaun Tɔnwlɛ i Sasawlɛ'n nun.

¹² Alɔsɛs i wa Salɔm b'ɔ ti Zerizalɛm asa'n i bue kun ekun su kpɛnngbɛn'n ɔ nin i mma mmla mun yɛ be di junman nin-ɔn, be mantan lɛ.

¹³ Anɛn nin Zanɔakfuɛ'm be yoli Kongo nun lɔ anuan'n. Be kplannin talɛ'n, be wlali anuan'n nin i sin blalɛ nga be fa nyin'n, ɔ nin i gboklo mun. Yɛ be wlawlali talɛ'n nun lele fa juli Wla Guawlɛ anuan'n nun, be yoli i sɔ mɛtri ya nnun.

¹⁴ Rekab i wa Malkiza b'ɔ ti Bɛt-Akerɛm asa'n su kpɛnngbɛn'n ɔ wlawlali Wla Guawlɛ anuan'n nun. Ɔ kplannin talɛ'n, ɔ wlali anuan'n ɔ nin i sin blalɛ'n nin i gboklo mun.

¹⁵ Kɔl-Oze i wa Salɔm b'ɔ ti Mizpa asa'n su kpɛnngbɛn'n ɔ yoli Nzue ti anuan'n. Ɔ kplannin talɛ'n, ɔ tuli su nan ɔ'a wla anuan'n nin i sin blalɛ'n nin i gboklo mun. I sin ɔ kplannin talɛ ng'ɔ o Silɔe fɛtɛ wun lɛ'n, b'ɔ o famiɛn'n i fie nin asikalie ng'ɔ fin David klɔ'n su lɔ jra'n be afiɛn lɛ.

¹⁶ Azbik i wa Neemi b'ɔ ti Bɛt-Zir asa'n i bue'n su kpɛnngbɛn'n, ɔ di i junman liɛ'n kpɛn David i asieliɛ'n i nuan, lele fa to fɛtɛ nga be kpɛli'n, lele fa ju famiɛn'n i sonja'm bé sua i wun lɛ.

¹⁷ Levifuɛ'm be di be junman liɛ'n Neemi i sa su lɛ. Levifuɛ sɔ mun yɛlɛ Bani i wa Rɛɔm, nin Asabia b'ɔ ti Kɛila asa'n i bue'n su kpɛnngbɛn'n. Kɛila dili junman i akpasua liɛ'n i nuan.

¹⁸ Be niaan Enadad i wa Bavai b'ɔ ti Kɛila asa'n i bue su kpɛnngbɛn'n, ɔ dili i junman liɛ'n be sa su lɛ.

¹⁹ Zozie i wa Ezɛr b'ɔ ti Mizpa kpɛnngbɛn'n ɔ o i sa su lɛ. Ɔ wlawla lika ng'ɔ o alɛ ninnge siewlɛ'n i ndɛnman'n, kan talɛ'n ti cɔnjɔ lɛ'n nun.

²⁰ Zabai i wa Barik ɔ kplin i nyin yoli lika uflɛ kɛ ɔ fɛ i talɛ'n i cɔnjɔ'n su lɛ lele ju Eliasib b'ɔ ti Nyanmiɛn nyrun jranfuɛ'm be su kpɛn i sua'n i anuan'n nun lɔ'n.

²¹ Akɔz i wa Iri i wa liɛ Mɛremɔt dili i junman liɛ'n Zabai i sa su lɛ, ɔ dili i Eliasib i awlo'n i anuan'n nin i awieliɛ'n be afiɛn lɛ.

²² Nyanmiɛn nyrun jranfuɛ nga be fin Zerizalɛm wun lɛ klɔ'm bé su'n, be dili be junman liɛ Mɛremɔt sa su lɛ.

²³ Bɛnzamɛn nin Asib be o bé sa su lɛ. Be dili be junman liɛ be awlo'n i nyrun lɛ. Anania i wa Maazeza i klun ba Azaria o bé sa su lɛ. Ɔ dili i junman liɛ i awlo'n wun lɛ.

²⁴ Enadad i wa Binii wo i sa su lɛ. Kan ɔ dili i junman liɛ'n ɔ fɛ i Azaria i sua'n wun lɛ lele ju talɛ'n i cɔnjɔ'n su lɛ.

²⁵ Izai i wa Palal o i sa su lɛ. I junman diwlɛ'n fɛ i talɛ'n i cɔnjɔ'n su lɛ fa ju klɔ'n i sasawlɛ ng'ɔ o famiɛn'n i sua'n i ndɛnman, bisua'n i wun lɛ'n. Parɛɔs i wa Pɛdaza o i sa su lɛ.

²⁶ Nyanmiɛn i sua'n nun junman difuɛ'm bɔ be tran Ɔfɛl'n, be dili be junman liɛ'n juli klɔ'n i sasawlɛ sua ng'ɔ o Nzue anuan'n i wia afiliɛ lɔ'n i wun lɛ.

²⁷ Tekoafuɛ'm be o bé sa su lɛ. Be junman diwlɛ'n wo klɔ'n i sasawlɛ dan ng'ɔ o talɛ'n i cɔnjɔ'n su lɛ'n lele fa to Ɔfɛl talɛ'n.

²⁸ Kɛ ɔ fɛ i Nnɛn Kpanngɔ anuan'n nun lɛ lele kɔ'n, Nyanmiɛn nyrun jranfuɛ mun yɛ be o lɛ-ɔ. Be di be junman liɛ'n bé sua'm be nyrun lɛ. Kun di i liɛ i sua'n i nyrun, kun di i liɛ i sua'n i nyrun.

²⁹ Imɛr i wa Zadɔk o bé sa su lɛ. Ɔ dili i junman liɛ'n i sua'n nyrun lɛ wie. Sɛkania i wa Sɛmaɛza b'ɔ nian Wia Afiliɛ Lɔ anuan'n su'n, ɔ o i sa'n su lɛ.

³⁰ Selemia i wa Anania yɛ Anɛn b'ɔ ti Zalaf i wa nsiɛn su'n be o i sa su lɛ. Berekia i wa Mɛsilam wo be kusu be sa su lɛ. Ɔ dili i junman liɛ'n i sua'n i nyrun lɛ.

³¹ Malkiza b'ɔ ti sika ɔkwlɛ ajuin difuɛ'n wo i sa su lɛ. I lika liɛ'n to Nyanmiɛn i sua nun junman difuɛ'n ɔ nin like atɛ yofuɛ'm bé sua mun. Ɔ fɛ i Mifkad anuan'n i ndɛnman lɛ fa ju nglo sua ng'ɔ o talɛ'n i cɔnjɔ'n i ti su nglo'n i wun lɛ.

³² Sika ɔkwlɛ ajuin difuɛ nin like atɛ yofuɛ'm be dili be junman nglo sua sɔ'n nin Bua anuan'n be afiɛn lɛ.

Izraɛlfuɛ'm be kpɔfuɛ'm be waan be ´jran junman'n

³³ Kɛ Sanbalat tili kɛ e Zuif mun e su kplan talɛ'n, ɔ'a yo-mɛn i fɛ. Ɔ fali ya dan kpa. Yɛ ɔ srili ye

³⁴ i niaan nin Samari sonja'm be nyrun yɛ ɔ seli kɛ: «?Nguɛ li yɛ Zuif niɛn nga'm be ´yo i yɛ? ?E yaci be nun man be gua junman sɔ'm bo? ?Be ´yi tɛ be man be Nyanmiɛn'n? ?Be ´yi yɛbuɛ nvuɛn nga asiɛ'n katali be su bɔ sin'n yrali be'n be ´fa kplan sua'n?»

³⁵ Yɛ Tɔbiza b'ɔ ti Amɔnfuɛ b'ɔ o i wun lɛ'n waan: «Talɛ nga be ´kplɛn lɛ'n, sɛ nsoso wie fu su'n, be talɛ nga be waan b'a fa yɛbuɛ b'a kplɛn i lɛ'n, ɔ ´bu tɔ.»

³⁶ «E Min Nyanmiɛn, nian kɛ be yo e fiaan-an! Man e finfin nga be ´yo e yɛ'n, ɔ kaci tɔ be bɔbɔ be su. Man be fɛn bé bo ninnge'n, man be tra be lomuɛn wɔ mɛn ng'ɔ ti-man be liɛ'n nun.

³⁷ Nán yaci be fɔnlɛ'n cɛ be. Nán ɔ́ wla fi bé sa tɛ'n su le, afin be wɔli e nga e kplan talɛ'n e safle.»

³⁸ Yɛ e kplannin talɛ nin-ɔn. E wlawlali nun lele e sin yiali nun. E kplannin juli i nglo-nglo su'n i afiɛn. Izraɛlfuɛ'm be niannin junman sɔ'n nun dili.