Naɔm 3 - NYANMIƐN NDƐ'N 1998

Be su saci sa tɛ yolɛ klɔ'n

¹ Sran kunwlɛ klɔ, yako! Wɔ bɔ wualɛ'n yɛ a wua'n, bɔ sa tɛtɛ'n yɛ a yo'n, bɔ ninnge'm be fɛnlɛ'n yɛ a fɛn yɛ a fa nyan ɔ́ wun'n, yako !

² Amun `nian ngble'm be tɛlɛ bɔ be ´tɛ-ɔ, amun `nian kakaklolo ja mun be tɛlɛ bɔ be ´tɛ-ɔ, amun `nian nnɛn kpanngɔ'm bé ja bo kplalɛ b'ɔ ´kpla lɔ-ɔ, ɔ nin alɛ kakaklolo'm be sinlɛ bɔ be ´sin-ɔn.

³ Nnɛn kpanngɔ su fufuɛ'm be kpɛ alɛ ba, tokofi'm be bo sa mianmianmian. Cua'm be kpa sin, be nga b'a tɔ'n be tru lika'n kwlaa nun, fuɛn'm be tian be wiengu su, be kwla-man be ka, bé ja kpla fuɛn'm be su.

Nyannzuɛn ɔ'a kun Niniv

⁴ Niniv, a ti kɛ tekle bla sa, tekle nga a bo'n ɔ'a sɔn lele ɔ'a kpe nun. A fa ɔ klanman nin abonuan ninnge mun fa flɛ sran mun, a fa ɔ wlaka bolɛ'n fa mlin mɛn nin nvle sunman.

⁵ Anannganman b'ɔ sie mɛn wunmuan'n wan yoo: «I sɔ'n ti e nin wɔ y'a nyɛn i. N ´susu ɔ tralɛ tɛnndɛn'n lele ɔ ju ɔ ti wa, kpɛkuun n ´yi ɔ wun ngbɛn n ´kle nvle uflɛ mun. N ´gua ɔ́ nyin ase be nyrun.

⁶ N ´cuɛn wɔ ase nnɔtiɛ'n nun, n ´sokpa wɔ nan be `tu be `nian wɔ.»

⁷ Sran kwlaa ng'ɔ wun wɔ'n, ɔ ´wanndi. Kpɛkuun ɔ usɛ i wun kɛ yoo: «?Nan bolɛ nga Niniv ɔ'a bo yɛ'n, wan li cɛ yɛ ɔ ´koko i-ɔ? ?Nin yɛ be ´nyan wɔ anwlɛn su nzue guafuɛ-ɔ?»

Sa ng'ɔ juli No-Amɔn su'n i kunngba'n ´ju Niniv su wie

⁸ ?Niniv, ɔ kpa tra No-Amɔn b'ɔ o Nil'n i sama'm be afiɛn'n, bɔ nzue sin yiɛ i'n, b'ɔ sin yiɛ kɛ b'a sisi i wun nin talɛ kekleke kpa wie sa'n?

⁹ Etiopifuɛ mun nin Eziptfuɛ mun be mɛn-mɛn i anyanbeun like'n blɛblɛ, Pitfuɛ mun nin Libifuɛ mun be nin i be ju kun alɛ.

¹⁰ Sanngɛ be trali klɔ sɔ'n su sran'm be lomuɛn be ɔli mɛn uflɛ nun. Be kunnin i mma kanngan mun atin'm be kwlaa su. Be wlali kpɛnngbɛn'm be kɔmin jrɔkɔ. Kpɛkuun awlobo kpɛn'm be liɛ'n be kwlafuɛ'm be tuli bé wun fɔtɔ be cɛcɛli be nun be fali be.

¹¹ Niniv, sa kunngba sɔ'n, ɔ ´nyan wɔ wie. Sa yaya sɔ'n ɔ ´ju wɔ sɛsɛ man a ´yo kɛ ɔ ti yɛ ɔ'a saci sa. Ɔ blɛ liɛ su'n, a ´kunndɛ a wanndi ɔ kpɔfuɛ'm bé bo ´ko fia.

Niniv su jrɛn-mɛn i kpɔfuɛ'm be nyrun

¹² Ɔ talɛ nglo-nglo ng'ɔ sisi ɔ́ wun'n, ɔ ti kɛ figie mma bɔ ɔ'a blo'n sa. Sran nga i waan ɔ ´di'n, kɛ ɔ ´keje i waka'n, wuun ɔ ´guɛ i nuan nun.

¹³ Wɔ alɛ kunfuɛ mun b'a kaci kɛ bla mun sa. Ɔ kpɔfuɛ'm be kan-man klɔ'n i anuan mun nan b'a tike. Sin'n sacili anuan'm be nun gboklo mun.

¹⁴ Sɛ bɔ amun waan: «Alɛ b'ɔ ba'n ti'n, amun `sa nzue be sie, amun `wlawla be sasawlɛ lika'm talɛ'm be nun, amun `yo be kpa kekleke! Amun `si ufa'n yɛ amun `siesie bliki kpɛwlɛ'm be ye!

¹⁵ Sanngɛ amun ´wu. Sɛ sin ɔ'a di-man amun'n, tokofi yɛ ɔ ´di amun-ɔn. Be ´di amun kɛ aɛcɛ'm be su di nnya sa. Amun sran'm be tian bé nuan kɛ lalo mun sa.

Amun sran'm be kwlaa be ´nunnun

¹⁶ Amun aata difuɛ'm be sɔnnin kɛ nyanmiɛn su nzraama mun sa. Be ti kpanngban kɛ aɛcɛ bɔ be su tu kɔ'n sa.

¹⁷ Amun aata su nianfuɛ'm be sɔnnin kɛ lalo mun sa, yɛ amun awa junman difuɛ'm be sɔnnin kɛ kakaa bɔ b'a tian bé nuan susrɛ'm be su ayrɛ blɛ nun'n sa. Kɛ wia'n man su'n, kpɛkuun b'a mlin, be wun-man lika bɔ be ɔli-ɔ. A kunndɛ be-ɔ a wun-man be kun.

Kɛ be ´cici'n yɛ ɔ tɔli-ɔ

¹⁸ Asiri famiɛn, ɔ sran nga a siesieli be kɛ be `nian ɔ sran'm be su'n be su lafi. Ɔ sonja su kpɛn'm be kwla-man bé wun keje kun. Ɔ nvle'n nunfuɛ'm b'a bo je oka'm be su, sran fi nun-man lɛ kun nan ɔ'a flɛflɛ be kɛ be `yia.

¹⁹ Ɔ sacilɛ nga w'a saci yɛ'n, be yo wɔ sa fi-ɔ, ɔ yo-man ye kun. Kannin nga ɔ'a tu wɔ yɛ'n, ɔ ti ɔ wie like. Sa nga bɔ ɔ'a nyan wɔ bɔ a la nyrɛnnɛn nga nun yɛ'n, be kwlaa nga be ti i sɔ ndɛ'n, be ´bo ndɛ. Afin sran fi nun-man lɛ bɔ w'a yo-mɛn i tɛ w'a flan-man nun-ɔn.»