Mmla'n 13 - NYANMIƐN NDƐ'N 1998

¹ Amun `fa ndɛ nga n ´kan kle amun yɛ'n be su. Amun `nian su `nanti. Nán amun kpɛ wie gua nun, nán amun yi wie ase.

Izraɛlfuɛ'm bé wun lika nianlɛ b'ɔ fata kɛ be niɛn i amuɛn sɔfuɛ'm be lika'n i ndɛ

² Sɛ amun nun sran wie waan ɔ ti Nyanmiɛn nuan ijɔfuɛ'n annzɛ sɛ i ti wun ase'n, sɛ ɔ ´kan aolia nun sa nga be wa ju'n be ndɛ kle amun'n,

³ sɛ sa ng'ɔ kannin'n ɔ ju sakpa'n, yɛ sɛ i ti i waan amun sɔ amuɛn bɔ amun si-man be laa'n nan amun su be'n,

⁴ nán amun tie sran nga i waan ɔ ti Nyanmiɛn nuan ijɔfuɛ sɔ'n, annzɛ i ti'n wuun ase'n i ndɛ mun. Amun si kɛ Anannganman amun Nyanmiɛn'n yɛ ɔ su sa amun nian-an, sɛ amun klo i kpa kɛ ɔ fata'n sa o, sɛ amun fa amun wla'n kwlaa guɛ i su o, yɛ sɛ amun akunndan kwlaa o i su o.

⁵ Anannganman amun Nyanmiɛn'n yɛ amun `su i-ɔ. Amun nyin `yi i, amun `fɛ i mmla'm bé su, amun `tie i aniɛn'n, amun `su i, yɛ amun `fa amún wun mɛntɛn i kpa.

⁶ Sran nga i waan ɔ ti Nyanmiɛn nuan ijɔfuɛ sɔ'n, annzɛ i ti wun ase'n, man be kun i. Afin Anannganman amun Nyanmiɛn b'ɔ ko yili amun kanga nun Ezipt mɛn'n nun lɔ'n, sran sɔ i waan amun jaso i wun. I waan amun yaci Anannganman amun Nyanmiɛn'n i atin ng'ɔ kleli amun kɛ an fa su'n. I sɔ'n ti, sɛ be kun i'n, sa tɛ'n ´tu amun afiɛn.

^7-9 Sɛ ɔ wie amún nin wa wie, annzɛ amun wa yasua wie, annzɛ amun wa bla wie, annzɛ amún bo bla wie, annzɛ amun janvuɛ ng'ɔ ti amun anwlɛn su sran'n wie, ɔ wa se amun blɛlɛlɛ kɛ amun ko sɔ amuɛn bɔ nán kɛ amun si i-ɔ, bɔ kusu nán kɛ amun nannan'm be sili i-ɔ, b'ɔ ti nvle wie nun amuɛn'n, nán amun kplin su. Nán amun tie sran sɔ'm be ndɛ'n, nán amun si be aunnvuɛ, nán amun yaci cɛ be, amun `yi be nglo. Sɛ nvle ng'ɔ mantan amun lɛ i nun amuɛn o, sɛ kusu mmua lɔ nvle wie nun amuɛn o, i kunngba nin-ɔn. Asiɛ wunmuan'n i su amuɛn'n kwlakwla be ndɛ yɛ n kan-an.

¹⁰ Amun `finfin i sɔ sran'm be yɛbuɛ be `kun be. Sran nga be lɛkɛ i'n yɛ ɔ dun mmua fin be yɛbuɛ-ɔ, yɛ sran'm be nian su finfin be wie kun be.

¹¹ Amun `fin be yɛbuɛ kun be, afin be waan amun kaci amun sin si Anannganman amun Nyanmiɛn'n b'ɔ yili amun kanga nun Ezipt mɛn'n nun lɔ bali'n.

¹² Kɛ ɔ ko yo sɔ'n, Izraɛlfuɛ'm be kwlakwla be ´ti, kpɛkuun srɛ ´kun be sa tɛ kɛ nga sa i yolɛ nun amun afiɛn.

¹³ Klɔ nga Anannganman amun Nyanmiɛn'n fa man amun kɛ amun tran be nun'n, sɛ amun ti kun wun ndɛ kɛ

¹⁴ i nun finfinfuɛ wie'm be o amun nun nan b'a cuɛn be klɔfuɛ mun kɛ be ko sɔ amuɛn bɔ amun si-man be laa'n ,

¹⁵ amun `usa ndɛ sɔ nun, amun `usa-usa kpa. Sɛ ndɛ sɔ'n ti nanwlɛ nan be yoli tete sa sɔ'n sakpa amun afiɛn'n,

¹⁶ amun `kun klɔ sɔ'n i su sran'm be ngba. Amun `bo klɔ'n mlɔnmlɔnmlɔn. Amun `nunnun i nun ninnge nin i nun nnɛn'm be sekeseke kpan.

¹⁷ Amun `tian sran sɔ'm bé bo ninnge'm bé nuan gua'n su, nan amun `wɔ i kwlaa nun man Anannganman amun Nyanmiɛn'n. Amun `wɔ klɔ'n nun wie. Sacilɛ nga klɔ sɔ'n fa sacili'n, man klɔ sɔ'n ɔ ka sɔ, nán man be kplɛn i uflɛ kun.

^18-19 Nán lika sɔ bɔ amun sacili i'n, i nun like wie fi ka amún sa nun. Sɛ amun ti Anannganman amun Nyanmiɛn'n i aniɛn'n, sɛ amun fɛ i ndɛ nga n ´kan kle amun ndɛkɛn yɛ'n su, sɛ amun yo sa ng'ɔ ti kpa Anannganman amun Nyanmiɛn'n i nyrun'n, ɔ ´yaci i ya dan b'ɔ fali'n, ɔ ´si amun aunnvuɛ, ɔ ´yo amun ye, ɔ man amun ´trɛ kɛ ɔ fa tali amun nannan'm be nda'n sa.