Matthieu 1 - NYANMIƐN NDƐ'N 1998

Osu nga Jésus-Krist fin nun'n

¹ Jésus-Krist b'ɔ ti David nin Abraam be anunman'n i osu ng'ɔ fin nun'n yɛ.

² Abraam wuli Izaak, Izaak wuli Zakɔb, Zakɔb wuli Zida nin i niaan mun.

³ Zida nin Tamar be wuli Farɛs nin Zara, Farɛs wuli Ɛsrɔm.

⁴ Ɛsrɔm wuli Aram, Aram wuli Aminadab, Aminadab wuli Naasɔn, Naasɔn wuli Salmɔn.

⁵ Salmɔn nin Raab be wuli Bɔaz. Bɔaz nin Rit be wuli Obɛd. Obɛd wuli Izai

⁶ Izai wuli famiɛn David. David nin Iri i yi'n be wuli Salomɔn.

⁷ Salomɔn wuli Rɔbɔam, Rɔbɔam wuli Abia, Abia wuli Aza.

⁸ Aza wuli Zozafat, Zozafat wuli Zɔram, Zɔram wuli Ozias.

⁹ Ozias wuli Zɔatam, Zɔatam wuli Akaz, Akaz wuli Ezekias

¹⁰ Ezekias wuli Manase, Manase wuli Amɔn, Amɔn wuli Zozias.

¹¹ Blɛ bɔ be fa Izraɛlfuɛ mun ɔli Babilɔni'n, i blɛ sɔ'n nun yɛ Zozias wuli Zekɔnias nin i niaan mun-ɔn.

¹² Kɛ be fa be ɔli Babilɔni'n, i sin Zekɔnias wuli Salatiɛl, Salatiɛl wuli Zorobabɛl.

¹³ Zorobabɛl wu Abiid, Abiid wuli Eliakim, Eliakim wuli Azɔr.

¹⁴ Azɔr wuli Sadɔk, Sadɔk wuli Asim, Asim wuli Eliid,

¹⁵ Eliid wuli Eleazar, Eleazar wuli Matan, Matan wuli Zakɔb.

¹⁶ Zakɔb wuli Zozɛf b'ɔ ti Mari wun'n. Mari sɔ'n yɛ ɔ wuli Jésus bɔ be flɛ i Krist nin-ɔn.

¹⁷ Kɛ ɔ fin Abraam blɛ su lele b'ɔ ´fa ju David blɛ su'n, be osu'm be akpasua'n ti blu-nin-nnan. Kɛ ɔ fin David blɛ su lele b'ɔ ´fa ju blɛ nga be ´fa be kɔ Babilɔni'n, be osu'm be akpasua'n ti blu-nin-nnan. Kɛ be fa be ɔli Babilɔni lele b'ɔ ´fa ju Krist blɛ su'n, be akpasua'n ti blu-nin-nnan.

Jésus-Krist i awuliɛ

¹⁸ An `nian kɛ Jésus-Krist i awuliɛ'n yoli-ɔ. I nin Mari bɔ Zozɛf trɛli i ase'n, kɛ be nian si-man sua'n, Nyanmiɛn Wawɛ'n man ɔ wunnzɛli.

¹⁹ Zozɛf b'ɔ ti i wun'n ɔ ti sran kpa, ɔ klo-man kɛ ɔ saci i dunman, i sɔ'n ti, i waan ɔ ´yaci i nun blɛlɛlɛ.

²⁰ Kɛ ɔ ´bu akunndan sɔ'n, e Min Nyanmiɛn'n i anz kun yi i wun kleli i laliɛ nun, ɔ seli i kɛ: «Zozɛf, David anunman, nán srɛ kun wɔ, fa ɔ yi Mari kɔ ɔ bo, afin ba'n bɔ ɔ'a wunnzɛ i'n ɔ fin Nyanmiɛn Wawɛ'n.

²¹ Ɔ wa wu ba yasua, a ´tɔn i dunman kɛ Jésus, (bɔ i bo'n yɛlɛ Defuɛ), afin i yɛ ɔ wa de i nvle nunfuɛ'm bé sa tɛ bɔ be yo'n be nun-ɔn.»

²² I kwlaa sɔ'n yoli sɔ nan ndɛ nga e Min Nyanmiɛn'n man i nuan ijɔfuɛ'n kannin'n ɔ'a kpɛn su, ɔ seli kɛ:

²³ «An `nian, talua b'ɔ nian si-man bian'n ɔ wa wunnzɛ, ɔ ´wu ba yasua, Be ´tɔn i dunman Emaniɛl,» bɔ i bo'n kle kɛ Nyanmiɛn nin ye o nun .

²⁴ Kɛ Zozɛf tinngeli'n, ɔ yoli sa nga e Min Nyanmiɛn'n i anz'n kan kleli i'n, nan ɔ'a fɛ i yi'n ɔ'a ɔ i bo,

²⁵ sanngɛ ɔ nin i b'a si-man sua, lele Mari wuli i wa yasua bɔ Zozɛf tɔnnin i dunman Jésus'n.