Marc 14 - NYANMIƐN NDƐ'N 1998

Jésus wun ndɛ cicilɛ

¹ Kɛ ɔ ka le nnyɔn nan Delɛ-cɛn'n nin kpaun bɔ kpaun ayre nun-man nun'n be cɛn dilɛ'n ɔ'a ju'n, Nyanmiɛn nyrun jranfuɛ dandan mun nin mmla klefuɛ'm be kwlaa be kunndɛ ngwlɛlɛ wafa nga be ´fa tra Jésus gblɛ nun be ´kun i'n.

² Afin be seli kɛ: «Nán man ɔ yo cɛn dilɛ'n nun, sɛ ɔ yo sɔ-ɔ, ɔ cɛ-man nan sran'm b'a tri.»

Bla kun fa parfɛn guali Jésus ti'n su

³ Kɛ Jésus o Simɔn b'ɔ ti kokowefuɛ'n i awlo Betani lɔ'n, bɔ be ti aliɛ'n sin'n, bla kun wluli bé sin lɔ parfɛn bɔ i gua ti kekle kpa'n i albatri sɛ kun wo i sa nun. Be fa nar ngo muɛn yɛ be yoli-ɔ. Ɔ buli sɛ sɔ'n i ti, yɛ ɔ fali parfɛn'n guali i Jésus ti'n su.

⁴ Ɔ yoli wie'm be ya nan b'a usa be wiengu kɛ: «?Parfɛn sacilɛ ngbɛn kɛ nga sa'n, i bo yɛlɛ onin?

⁵ Be kwla yo i atɛ b'ɔ tra denie ya nsan, yɛ be fɛ i sika'n man yalɛfuɛ mun. Nan b'a ijɔ bla sɔ'n.»

⁶ Sanngɛ Jésus seli be kɛ: «An `yaci i lɛ. ?Nguɛ ti yɛ an fita i anwlɛn sɔ-ɔ? Like ng'ɔ yo mannin min'n ti kpa.

⁷ Afin amun nin yalɛfuɛ mun yɛ amun ´ka wa titi-ɔ, an kwla yo be kpa blɛ kwlaa nga an klo'n, sanngɛ n liɛ'n, min nin amun su tran-man wa titi .

⁸ Ɔ'a yo ng'ɔ kwlɛ i yo'n, ɔ'a dun mmua gua min wun parfɛn, min nziɛ yɛ ɔ'a sie-ɔ.

⁹ Nanwlɛ, mɛn wunmuan'n nun'n, lika kwlaa nga be ´bo jasin fɛ'n lɛ'n, be ´kan sa nga bla nga yoli'n wie kɛ bé wla ´kpɛn i su.»

Zidas i Jésus sran'm be fa manlɛ

¹⁰ Zidas Iskariɔt b'ɔ ti i sɔnnzɔnfuɛ blu-nin-nnyɔn'n be nun kun'n, ɔ ko toli Nyanmiɛn nyrun jranfuɛ dandan mun kɛ ɔ ´fa Jésus man be.

¹¹ Kɛ be tili'n, be klun jɔli, yɛ be seli i kɛ be ´mɛn i sika. Ɔ man Zidas kunndɛli cɛn ng'ɔ ti kpa bɔ i nun ɔ ´kwla fɛ i man be'n.

Jésus nin i sɔnnzɔnfuɛ mun be dili Delɛ-cɛn'n

¹² Kpaun bɔ kpaun ayre nun-man nun'n i cɛn dilɛ klikli'n bɔ i nun yɛ be kun Delɛ-cɛn'n i bua'n, Jésus sɔnnzɔnfuɛ'm be usɛli i kɛ: «?Lika onin yɛ a klo kɛ e siesie nan a ´di Delɛ-cɛn nun-ɔn?»

¹³ Ɔ sunmɛnnin i sɔnnzɔnfuɛ'm be nun nnyɔn, ɔ seli be kɛ: «An `wɔ klɔ lɔ, amun nin yasua kun bɔ nzue sɛ kun jin i ti su'n amun ´yia. An `su i su.

¹⁴ Lika ng'ɔ wlu nun'n, an `se awlo ifuɛ'n kɛ: ‹Nja waan e wa usa wɔ kɛ: ?Lika ng'ɔ nin i sɔnnzɔnfuɛ'm be ´di Delɛ-cɛn'n ɔ o nin?›

¹⁵ Ɔ ´kle amun nglo sua ba dan kun, b'a siesie i nun ninnge'n kwlaa, lɛ yɛ amun wa siesie Delɛ-cɛn'n i diwlɛ'n ´man ye-ɔ.»

¹⁶ I sɔnnzɔnfuɛ'm be ɔli, kɛ be juli klɔ lɔ'n, be toli ninnge ng'ɔ kan be ndɛ kleli be'n be lɛ, nan b'a siesie Delɛ-cɛn'n i diwlɛ'n.

¹⁷ Kɛ aliɛ jɔli'n, ɔ nin i sɔnnzɔnfuɛ blu-nin-nnyɔn'n be bali.

¹⁸ Kɛ be o tabli'n sin bɔ be ´di like'n, Jésus seli kɛ: «Nanwlɛ, amun nga amun nin min di like'n, amun nun kun wa fa min man sran mun .»

¹⁹ Kpɛkuun bé wla ɔ'a bo, be usɛli i sa bé ti nun ti nun, nga waan: «?Min-ɔn?» nga waan: «?Min-ɔn?»

²⁰ Yɛ ɔ seli be kɛ: «Amun blu-nin-nnyɔn'n amun nun kun-ɔn, sran ng'ɔ fɛ i sa wla n liɛ'n sin talie nun nin-ɔn.

²¹ M bɔ n kacili Sran'n n su kɔ kɛ be klɛli i min wun ndɛ nun'n sa, sanngɛ sran ng'ɔ ´fa min man sran mun'n, i yako! Ɔ flunman kɛ b'a wu-man sran sɔ'n .»

Kɔminiɔn falɛ'n i ba kpɛlɛ

²² Kɛ be ´di like'n, Jésus fali kpaun, kɛ ɔ lali Nyanmiɛn ase'n, ɔ bubuli nun fa mannin be. Ɔ seli kɛ: «An `de, kpaun ng'ɔ o yɛ'n ti min wunnɛn.»

²³ I sin ɔ fali klowa kun, kɛ ɔ lali Nyanmiɛn ase'n, ɔ fa mannin be, nan be kwlaa b'a nɔn.

²⁴ Yɛ ɔ seli be kɛ: «Nzan ng'ɔ o yɛ'n ɔ ti min mmoja b'ɔ man amun nin Nyanmiɛn amun ´tra aenguɛ. Sran kpanngban be ti yɛ be ´guɛ i ase-ɔ .

²⁵ Nanwlɛ, n su nɔn-man vinyi nzue kun lele san cɛn nga min nin amun e ´nɔn uflɛ Nyanmiɛn i mɛn'n nun lɔ'n.»

²⁶ Kɛ be toli Nyanmiɛn manmanlɛ jue'n, be ɔli Olivie Oka'n su lɔ.

Jésus seli kɛ Piɛr wa se kɛ ɔ si-mɛn i

²⁷ Jésus seli be kɛ: «Amun kwlaa amún ti nun wa saci, afin be klɛli i kɛ: ‹M ma bo bua tafuɛ'n, yɛ bua'm be ´bo sanndi .

²⁸ Sanngɛ kɛ n wu bɔ n ko cɛn'n, n ´dun mmua amun nyrun Galile lɔ.› »

²⁹ Piɛr seli i kɛ: «Kannzɛ be kwlaa bé ti nun ´saci'n, n liɛ'n su saci-man wie.»

³⁰ Yɛ Jésus seli i kɛ: «Nanwlɛ, ndɛ kɔnguɛ nga bɔbɔ, a wa se kɛ a si-man min sɔ kpɛ nsan nan akɔ nyinman'n ɔ'a bo kpɛ nnyɔn.»

³¹ Sanngɛ Piɛr jrannin ndɛ sɔ'n su kekle kpa kɛ: «Kannzɛ min nin wɔ e ´wu'n, san e ´wu, n su se-man kɛ n si-man wɔ le.» Nan be kwlaa b'a kan ndɛ kunngba sɔ'n.

Jésus ko srɛli Nyanmiɛn Zɛtsemane lɔ

³² Yɛ be ɔli lika kun bɔ be flɛ i Zɛtsemane'n nun. Jésus seli i sɔnnzɔnfuɛ'm be kɛ: «N ´ko srɛ Nyanmiɛn, an `tran wa.»

³³ Yɛ ɔ fali Piɛr, nin Zak, ɔ nin Zan be ɔli-ɔ, akluntitiɛ'n tɔli i su, yɛ awlaboɛ'n boli i kunlɛ bo-ɔ.

³⁴ Ɔ seli be kɛ: «Awlaboɛ'n su kun min, an `ka wa, an `tran bé nyin su.»

³⁵ Kɛ ɔ ɔli i nyrun lɔ kan'n, kpɛkuun ɔ finnin i wun ase, ɔ seli Nyanmiɛn kɛ sɛ nyrɛnnɛn dan nga kwla to fuɛn i'n, man ɔ to fuɛn i.

³⁶ Ɔ seli kɛ: «Baba, a kwla sa'n kwlaa yo, yo man nyrɛnnɛn wie nga to fuan min, sanngɛ nán yo nga n klo kɛ ɔ yo su'n, sanngɛ yo nga a klo kɛ a ´yo i su'n.»

³⁷ Kɛ ɔ sɛli i sin b'ɔ ´to i sɔnnzɔnfuɛ mun-ɔn be su lafi, yɛ ɔ seli Piɛr kɛ: «?Simɔn, w'a lafi? W'a kwla tran-man dɔ bɔ kun?

³⁸ Man amún nyin tran su, yɛ amun nin Nyanmiɛn an `koko yalɛ nan lakafuɛ'n ɔ'a laka-man amun. Amun anwlɛn'n wo su kɛ amun ´yo, sanngɛ an lɛ-mɛn i wun fanngan.»

³⁹ Ɔ yacili be lɛ ɔli ekun, ɔ ko kannin ndɛ kunngba'n kleli i Si.

⁴⁰ Ɔ sɛli i sin bali ekun, ɔ ´to be-ɔ be su lafi, afin lafilɛ'n wo bé nyin su. Be wun-man ndɛ nga be kan kle i-ɔ.

⁴¹ Kɛ ɔ bɛli i kpɛ nsan su'n, ɔ seli be kɛ: «An `de wunmiɛn, an `lafi siɛn'n. Ɔ'a wie! Dɔ'n ɔ'a ju, an `nian, be wa fa m bɔ n kacili Sran'n man sa tɛ yofuɛ mun.

⁴² An `jao man e wɔ, sran ng'ɔ ´fa min man sran mun'n su ba.»

Jésus i tralɛ

⁴³ I nuan nian tɔ-man, kpɛkuun Zidas b'ɔ ti i sɔnnzɔnfuɛ blu-nin-nnyɔn'm be nun kun'n ɔ nin sran kpanngban bɔ Nyanmiɛn nyrun jranfuɛ dandan mun, nin mmla klefuɛ mun, nin kpɛnngbɛn mun be sunmannin be'n b'a bo nun. Tokofi nin klɔnman o bé sa nun.

⁴⁴ Zidas b'ɔ fɛli i mannin sran mun'n, ɔ kleli be nzɔliɛ kun kɛ: «Sran nga n to ń sa yi i kɔmin'n, wuun i-ɔ, an `trɛ fɛ i wɔ, an `niɛn i su kpa.»

⁴⁵ Kɛ ɔ juli lɔ cɛ'n, ɔ wunngeli Jésus wun lɛ, ɔ seli i kɛ: «Baba!»

⁴⁶ Kpɛkuun yɛ ɔ to i sa yili i kɔmin-ɔn, yɛ sran sɔ'm be trali Jésus-ɔ.

⁴⁷ Be bɔ be o lɛ'n be nun kun cuɛnnin i tokofi'n, ɔ fa finnin Nyanmiɛn nyrun jranfuɛ'm be su kpɛn'n i sufuɛ'n, ɔ kpɛli i su'n.

⁴⁸ Jésus seli be kɛ: «An su n su nin klɔnman nin tokofi mun kɛ kodiawiefuɛ wie yɛ an bɛ i tralɛ sa.

⁴⁹ Cɛn kwlaa n wo amun afiɛn Nyanmiɛn i sua'n nun, n kle amun like, amu'an tra-man min. Sanngɛ be yo i sɔ nan Nyanmiɛn Ndɛ nga be klɛli'n ɔ `kpɛn su.»

⁵⁰ Yɛ be kwlaa be yaci i lɛ be wanndili-ɔ.

Gbanflɛn'n b'ɔ wanndili'n

⁵¹ Gbanflɛn kun bɔ tannin sin kun klɛ i wun'n ɔ su i su. Be trɛli i,

⁵² kpɛkuun, ɔ floli ɔ yacili i tannin'n bé sa nun, ɔ fɛli i wun kplɛn'n wanndili.

Jésus i jɔlɛ difuɛ dandan'm bé ja su fa kɔlɛ

⁵³ Be fa Jésus ɔli Nyanmiɛn nyrun jranfuɛ'm be su kpɛn'n i lika lɔ. Kɛ ɔ ´yo sɔ'n, wuun Nyanmiɛn nyrun jranfuɛ dandan mun, nin kpɛnngbɛn mun, nin mmla klefuɛ'm be kwlaa b'a yia lɔ.

⁵⁴ Piɛr su i su, sanngɛ ɔ'a mɛntɛn-mɛn i lele be fa juli Nyanmiɛn nyrun jranfuɛ'm be su kpɛn'n i awlo lɔ. Ɔ nin sua sunianfuɛ'm be trannin sin wun lɛ be su tɔn.

⁵⁵ Nyanmiɛn nyrun jranfuɛ dandan mun nin jɔlɛ difuɛ'm be kwlaa be kunndɛ ndɛ kun bɔ be kwla jran su be ´fa kun i-ɔ, sanngɛ b'a nyɛn-mɛn i le.

⁵⁶ Afin be nun kpanngban be tɔnnin i suɛn, sanngɛ suɛn sɔ'n bɔ be tɔnnin i'n be ti ngunmin ngunmin.

⁵⁷ Be wie'm be jaoli be tɔnnin i suɛn be seli kɛ:

⁵⁸ «E tili kɛ ɔ seli kɛ ɔ ´bubu Nyanmiɛn i sua nga sran yɛ ɔ kplannin'n, nan i le nsan su'n ɔ ´kplan uflɛ bɔ sran sa su wlu-man nun.»

⁵⁹ Ɔ nin i sɔ'n ngba'n, be ndɛ nga be fa tɔn i suɛn'n, be ti ngunmin ngunmin.

⁶⁰ Yɛ Nyanmiɛn nyrun jranfuɛ'm be su kpɛn'n ɔ jao usali Jésus kɛ: «?A tɛ-man ndɛ fi su? Ndɛ nga be ´kɛn i lɛ'n, ɔ ti sɛ?»

⁶¹ Jésus trannin bliin, ɔ'a uke-mɛn i nuan. Nyanmiɛn nyrun jranfuɛ'm be su kpɛn'n usɛli i ekun kɛ: «?Krist, Nyanmiɛn bɔ be yi i ayɛ'n i Wa'n yɛlɛ wɔ?»

⁶² Yɛ Jésus seli i kɛ: «Ɛɛn, yɛlɛ min. Amun wa wun m bɔ n kacili Sran'n kɛ n ti Nyanmiɛn i fama su, yɛ amun ´wun min n wo nyanmiɛn ble'n su n su ba .»

⁶³ Yɛ Nyanmiɛn nyrun jranfuɛ'm be su kpɛn'n titili i bɔbɔ wun tralɛ nun-ɔn, yɛ ɔ seli kɛ: «?Lalofuɛ onin yɛ e ´kunndɛ i ekun-ɔn ?

⁶⁴ An tili Nyanmiɛn dunman b'ɔ saci'n. ?An bu i sɛ?» Be kwlaa be seli kɛ ɔ'a di fɔ, be waan ɔ nin kunlɛ fata .

⁶⁵ Be wie'm be guɛli i wun ngɔsrɛ, be boli i zaga, be usɛli i kɛ: «?Wan yɛ ɔ boli wɔ-ɔ?» Yɛ sua sunianfuɛ'm be sɔli i bolɛ su-ɔ.

Piɛr seli kɛ ɔ si-man Jésus

⁶⁶ Kɛ Piɛr wo awlo'n nun asiɛ wun lɛ'n, Nyanmiɛn nyrun jranfuɛ'm be su kpɛn'n i afanniɛn kun bali.

⁶⁷ Kɛ ɔ wunnin Piɛr kɛ ɔ su tɔn sin'n, ɔ niɛnnin siin, yɛ ɔ seli i kɛ: «Wɔ-ɔ, a o Jésus b'ɔ fin Nazarɛt'n i sin wie.»

⁶⁸ Ɔ seli kɛ: «Sran nga a kɛn i ndɛ'n, n si-mɛn i, ndɛ kpa nga a kan'n, n wun-mɛn i wlɛ.» I sin ɔ fite ɔli ala'n bo lɔ.

⁶⁹ Afanniɛn'n wunnin i, yɛ ɔ wa kan kleli be nga be o lɛ'n be ekun kɛ: «Bian nga o be nga be o lɛ'm be nun wie.»

⁷⁰ Nan ɔ'a se kɛ ɔ ti-man sɔ. Kɛ ɔ cɛli kan'n, be nga be o lɛ'n be seli Piɛr ekun kɛ: «Nanwlɛ, wɔ-ɔ, a o be nga be o lɛ'n be nun wie, afin a ti Galilefuɛ.»

⁷¹ Yɛ ɔ fa Nyanmiɛn wuɛwuɛli i wun-ɔn, ɔ seli kɛ: «Sɛ m bua ato'n, man Nyanmiɛn wun min. Bian nga an kɛn i ndɛ'n, n si-mɛn i.»

⁷² I osu kunngba'n nun yɛ akɔ nyinman'n boli i kpɛ nnyɔn su liɛ nin-ɔn, yɛ Piɛr wla kpɛnnin ndɛ nga Jésus kan kleli su-ɔ. Ɔ kan kleli i kɛ ɔ wa se kɛ ɔ si-mɛn i sɔ kpɛ nsan nan akɔ'n ɔ'a bo'n. Yɛ ɔ tɔli sunlɛ su-ɔ.