JÉSUS-CHRIST I DYASIN FE'N BO LUC KLELI'N 5 - NYANMIƐN NDƐ'N 1998

Jésus i sɔnnzɔnfuɛ'm be flɛlɛ

¹ Le kun kɛ Jésus o Zenezarɛt fɛtɛ'n nuan lɛ bɔ sran'm be sin yiɛ i lɛ kɛ be ´tie Nyanmiɛn ndɛ'n,

² ɔ wunnin alie nnyɔn fɛtɛ'n nuan lɛ bɔ jue kunfuɛ'm be fin nun jrali yɛ be su kpu be lala mun.

³ Ɔ fuli be nun kun b'ɔ ti Simɔn liɛ nun. Yɛ ɔ seli Simɔn kɛ ɔ fa alie'n wɔ i nyrun lɔ kan. Jésus trannin ase, ɔ kleli sran'm be like.

⁴ Kɛ i nuan tɔli'n, ɔ seli Simɔn kɛ: «Fa alie'n kɔ nzue'n i kploun'n nun lɔ nan an `gua amun lala'n.»

⁵ Simɔn seli i kɛ: «Baba, y'a guɛ i kɔnguɛ'n lele aliɛ'n ɔ'a fa cɛn ye y'a nyan-man like fi, sanngɛ kɛ bɔ ɔ waan n gua'n ti, n ´gua.»

⁶ Kɛ be guali'n, be trali kpatra kpanngban kpa, kpɛkuun be lala'n su ti.

⁷ Be fa bé sa flɛli be wiengu nga be o alie kun'n nun lɔ'n kɛ be wa uka be. Be bali, alie nnyɔn'n yili, ɔ man be wa de mlɔn.

⁸ Kɛ Simɔn Piɛr wunnin i sɔ'n, ɔ kotoli Jésus bo ɔ seli i kɛ: «Nannan, cuɛn ɔ wun kan, afin n ti sa tɛ yofuɛ.»

⁹ Yɛlɛ kɛ Piɛr nin be nga be nin i o lɛ'n be kwlaa bé nuan boli bé wun kpatra bɔ be trɛli i'n ti.

¹⁰ Zebede wa yasua nnyɔn'n, Zak nin Zan bɔ be ti Simɔn wiengu junman difuɛ'n, be kusu bé nuan boli bé wun wie. Yɛ Jésus seli Simɔn kɛ: «Nán srɛ kun wɔ, kɛ ɔ fin ndɛ'n, sran yɛ a wa trɛ i kɛ a fa tra kpatra'n sa-a.»

¹¹ Kɛ be wa sili alie mun, be yacili be ninnge'n kwlaa lɛ nan b'a su i su.

Jésus yoli kokowefuɛ kun juejue

¹² Kɛ Jésus o klɔ kun su'n, bian kun bɔ kokowe'n wo i wunnɛn'n kwlaa su'n, ɔ wunnin i, ɔ kotoli i bo, ɔ utuli i nyin ase, yɛ ɔ srɛli i kɛ: «Nja, yaci, yo man n kokowe'n wie weiin.»

¹³ Jésus tinngɛli i sa'n kɛnnin i, yɛ ɔ seli i kɛ: «M'an ti, man ɔ kokowe'n wie weiin.» Be ja osu kunngba nun lɛ kokowe'n wieli sran sɔ'n i wun.

¹⁴ Yɛ ɔ wlɛli i su nun kpa kɛ nán ɔ kan sa sɔ'n kle sran fi sanngɛ ɔ `fɛ i wun ko kle Nyanmiɛn nyrun jranfuɛ'n, yɛ ɔ `fɛ i wun aso bolɛ like bɔ Moiz kleli'n fa man man be wun kɛ ɔ'a yo juejue .

¹⁵ Jésus dunman'n fu titi, yɛ sran kpanngban kpa be yiɛ i wun lɛ kɛ be ´tie i ndɛ'n nan ɔ yo be juejue.

¹⁶ Sanngɛ ɔ kɔ blo lɔ kɛ ɔ nin Nyanmiɛn be ko koko yalɛ.

Jésus yoli bubuwafuɛ kun juejue

¹⁷ Le kun bɔ Jésus ´kle like'n, Farizifuɛ mun nin mmla i sifuɛ dandan'm bɔ be fin Galile nin Zide be klɔ'n kwlaa su'n nin Zerizalɛm'n, be gua lɛ. E Min Nyanmiɛn jin i sin, ɔ man ɔ yo tukpacɛfuɛ'm be juejue.

¹⁸ Be ´nian-an, sran'm be sua bubuwafuɛ kun tɛ nun be su fɛ i ba, be waan be ´fɛ i wlu kan Jésus o lɔ'n nan be ´fɛ i sie i i nyrun lɛ.

¹⁹ Sanngɛ sran'm be ti, be wun-man kan be ´fɛ i sin-ɔn. I ti be fuli sua'n su, yɛ be kpali sua'n i lika kun nan b'a fɛ i nin tɛ'n ba jrɛ i sran'm be afiɛn Jésus nyrun lɛ.

²⁰ Kɛ Jésus wunnin kɛ be lafi i su'n, ɔ seli bian sɔ'n kɛ: «Sa nga a yoli Nyanmiɛn'n, b'a yaci a cɛ wɔ.»

²¹ Mmla klefuɛ mun nin Farizifuɛ'm be buli i akunndan be seli kɛ: «?Wan yɛ ɔ saci Nyanmiɛn dunman sɔ-ɔ? ?Sɛ nán Nyanmiɛn kunngba cɛ'n, wan yɛ ɔ kwla yaci sran wun sa cɛ i-ɔ?»

²² Jésus wunnin be akunndan'n, yɛ ɔ sɔ su seli be kɛ: «?Nguɛ ti yɛ an bu akunndan kɛ nga sa-a?

²³ ?Kɛ n se kɛ b'a yaci ɔ́ wun sa'n a cɛ wɔ'n, annzɛ kɛ n se kɛ jao nanti'n, i nnyɔn'n, onin yɛ i kanlɛ ti pɔpɔ tra kun-ɔn?

²⁴ Sanngɛ n klo kɛ amun si kɛ m bɔ n kacili Sran'n n lɛ atin asiɛ'n su wa n yaci sa nga sran'm be yo Nyanmiɛn'n n cɛ be.» I sɔ'n ti ɔ seli bubuwafuɛ'n kɛ: «Min wa, jao fa ɔ bɛ'n kɔ wɔ awlo.»

²⁵ Bé ja osu kunngba'n nun lɛ ɔ jao fɛli i bɛ'n b'ɔ la nun'n be nyrun lɛ, kɛ ɔ ´kɔ i awlo, ɔ manman Nyanmiɛn.

²⁶ Be kwlaa bé nuan boli bé wun, be manmannin Nyanmiɛn, srɛ kunnin be dan kpa, yɛ be seli kɛ: «Sa nga y'a wun i ndɛ yɛ'n, e nian wun-man wie le.»

Jésus i Levi flɛlɛ

²⁷ Kɛ ɔ yoli sɔ'n, Jésus fiteli nan ɔ'a wun gua bo sika defuɛ kun bɔ be flɛ i kɛ Levi'n, ɔ ti i junman diwlɛ lɛ, Jésus seli i kɛ: «Bla a su n su.»

²⁸ Ɔ yacili i ninnge'n kwlaa nan ɔ'a jao ɔ'a su i su.

²⁹ Jésus ti Levi tɔnnin aliɛ dan kpa, ɔ yiɛli i kɛ ɔ wa di like i awlo lɔ. Gua bo sika defuɛ kaka kpa be nin sran wie mun be bali like sɔ'n dilɛ wie.

³⁰ Farizifuɛ'm be nin be mmla klefuɛ'm be ijɔli be konviabo, be usɛli i sɔnnzɔnfuɛ'm be kɛ: «?Nguɛ ti yɛ amun nin gua bo sika defuɛ nin sa tɛtɛ yofuɛ mun be nɔn nzan, be di like-ɔ?»

³¹ Jésus sɔli su, ɔ seli be kɛ: «Sran ng'ɔ ti juejue'n ɔ kɔ-man ayrefuɛ sin, san tukpacɛfuɛ yɛ ɔ kɔ-ɔ.

³² M'an ba-man sran kpa'm be flɛlɛ, sa tɛtɛ yofuɛ mun yɛ m bali be flɛlɛ nan be kaci be nzuɛn nin-ɔn.»

Srɛ nun kpɛlɛ i su sa usalɛ

³³ Be seli i kɛ: «Zan sɔnnzɔnfuɛ'm be nin Farizifuɛ'm be liɛ'n be ta srɛ nun kpɛ, be nin Nyanmiɛn koko yalɛ, sanngɛ ɔ liɛ'm be nɔn nzan be di like.»

³⁴ Yɛ Jésus usali be kɛ: «?Yasua kun b'ɔ su fa atɔnvlɛ'n, kɛ ɔ nin i janvuɛ'm be tɛ o lɛ'n, an kwla mian be kɛ be kpɛ srɛ nun?

³⁵ Le kun be wa de yasua sɔ'n bé sa nun, blɛ sɔ'n nun yɛ be wa kpɛ srɛ nun-ɔn.»

³⁶ Yɛ ɔ buli be nyanndra kun kɛ: «Sran fi kpɛ-man tralɛ uflɛ i bue ta-man tralɛ nvuɛn nun, sɛ ɔ yo sɔ-ɔ, sin uflɛfuɛ'n ɔ ´cuɛn-cuɛn tralɛ nvuɛn'n ɔ ´titi, yɛ sin uflɛfuɛ'n ɔ nin nvuɛnfuɛ'n be sɛ-man.

³⁷ Yɛ sran fi fa-man nzan lɔflɛ guɛ-mɛn i kplo kotokun nvuɛn nun, sɛ ɔ yo sɔ-ɔ, nzan lɔflɛ'n ɔ ´kpuke kotokun'n, ɔ ´gua, wuun kotokun'n ɔ'a saci.

³⁸ Sanngɛ be fa nzan lɔflɛ'n gua kotokun uflɛ'n nun.

³⁹ Sɛ sran kun nɔn nzan nga ɔ'a cɛ kpa b'ɔ yo fɛ'n, ɔ klo-man lɔflɛfuɛ'n, afin nga ɔ'a cɛ kpa'n yɛ ɔ ti kpa-a.»