JÉSUS-CHRIST I DYASIN FE'N BO LUC KLELI'N 4 - NYANMIƐN NDƐ'N 1998

Jésus i lakalɛ

¹ Kɛ Jésus fin Zurdɛn'n nun lɔ ɔ ´ba bɔ Nyanmiɛn Wawɛ'n sieli i'n, Wawɛ sɔ'n fɛ ɔli aawlɛ flɛnnɛn nun lɔ,

² lɔ yɛ mmusu'm bé si Satan ko lɛkɛlɛkɛli i cɛn ba ablanan nin-ɔn, ɔ'a di-man like. Kɛ ɔ dili cɛn ba ablanan sɔ'n, awe kunnin i .

³ Yɛ mmusu'm bé si Satan seli i kɛ: «Sɛ ɔ waan a ti Nyanmiɛn Wa sakpa'n, se yɛbuɛ nga man ɔ kaci aliɛ.»

⁴ Yɛ Jésus seli i kɛ: «Be klɛli i kɛ: ‹Nán aliɛ kunngba yɛ ɔ man sran nguan-an .› »

⁵ Mmusu'm bé si Satan fɛ ɔli lika nglo-nglo wie su, yɛ ɔ fali mɛn'n i famiɛn diwlɛ'n kwlaa kleli i kpɛ kunngba,

⁶ ɔ seli i kɛ: «N ´fa mɛn nga i kwlaa man wɔ kɛ a sie be, yɛ n ´fa anyrunnyan ninnge'n kwlaa man wɔ, afin be fa mannin min, yɛ n kusu n ´fa man sran nga n klo kɛ n ´fa mɛn i'n.

⁷ I sɔ'n ti'n, sɛ a koto m bo'n, i kwlaa'n ´kaci ɔ liɛ.»

⁸ Jésus seli i kɛ: «Be klɛli i kɛ: ‹Koto ɔ Min Nyanmiɛn'n i bo, yɛ su i kunngba cɛ .› »

⁹ Mmusu'm bé si Satan fɛ i ekun ɔli Zerizalɛm lɔ, ɔ fɛ i sieli Nyanmiɛn i sua'n su, yɛ ɔ seli i kɛ: «Sɛ ɔ waan a ti Nyanmiɛn Wa sakpa'n, tu kpɛn asiɛ wun lɔ,

¹⁰ afin be klɛli i kɛ: ‹Ɔ ´se i anz'm be kɛ be nian wɔ su.›

¹¹ Yɛ: ‹Be ´fa wɔ bé sa su, ɔ man ɔ́ ja su kpla-man yɛbuɛ .› »

¹² Jésus seli i kɛ: «Be seli kɛ: ‹Nán kunndɛ ɔ Min Nyanmiɛn i nuan.› »

¹³ Kɛ mmusu'm bé si Satan lɛkɛlɛkɛ i wafa'n kwlaa bɔ ɔ'a nyɛn-mɛn i'n, ɔ nin i be tili nun lele san blɛ uflɛ ekun.

Jésus i junman'n bo bolɛ Galile lɔ

¹⁴ Kɛ Nyanmiɛn Wawɛ'n tinnin Jésus'n, ɔ ɔli Galile mɛn'n nun ekun. I dunman'n fu lele juli klɔklɔ nga be mantan lɛ'm bé su.

¹⁵ Ɔ kle like be Nyanmiɛn ndɛ suanlɛ nin i srɛlɛ sua'm be nun, be yi i ayɛ lika'n kwlaa.

Be kannin Jésus bo Nazarɛt lɔ

¹⁶ Jésus ɔli Nazarɛt lɔ kan ɔ nyinnin lɔ'n. Wunmiɛn-delɛ-cɛn nun'n, ɔ wluli Nyanmiɛn ndɛ suanlɛ nin i srɛlɛ sua nun lɔ, afin titi kɛ wunmiɛn-delɛ-cɛn'n ju'n, ɔ yo i sɔ. Ɔ jaoli kɛ ɔ ´kanngan Nyanmiɛn ndɛ,

¹⁷ yɛ be fa Nyanmiɛn nuan ijɔfuɛ Ezai i fluwa'n wlɛli i sa nun-ɔn, ɔ tikeli su, ɔ wunnin lika nga Ezai klɛli i kɛ:

¹⁸ «E Min Nyanmiɛn i Wawɛ'n wo min su, yɛlɛ kɛ ɔ guali min su ngo kɛ m bo jasin fɛ'n kle yalɛfuɛ mun. Ɔ sunmannin n kɛ n kan kle be bɔ be trali be lomuɛn'm be kɛ be ´nyan bé ti, yɛ n kan kle anyansifuɛ'm be kɛ be ´wun ase, yɛ n `yo man mianfuɛ'm be nyan alaje,

¹⁹ yɛ n `kan afuɛ nga e Min Nyanmiɛn'n ɔ ´yo i sran'm be ye'n i ndɛ .»

²⁰ I sin ɔ katali su, ɔ fa wlɛli fluwa sunianfuɛ'n i sa nun, yɛ ɔ trannin ase-ɔ. Be kwlaa nga be o Nyanmiɛn ndɛ suanlɛ nin i srɛlɛ sua nun'n, be niɛn-niɛn i klengleiin.

²¹ Yɛ ɔ seli be kɛ: «Nyanmiɛn ndɛ nga be klɛli'n, i nun ndɛ nga an tili be yɛ'n, ndɛkɛn b'a kpɛn su.»

²² Be kwlaa be seli kɛ i wun yo be fɛ, ndɛ fɛ b'ɔ kan'n ɔ bo bé nuan, yɛ be seli kɛ: «?Nán Zozɛf wa nin-ɔn?»

²³ Jésus seli be kɛ: «Nyanndra nga be bu se kɛ: ‹Ayre yofuɛ, yo ɔ bɔbɔ ɔ wun ayre'n,› n si kɛ amun wa bu kle min. Amun wa se n kɛ: ‹Sa nga a yoli be Kapɛrnaɔm lɔ bɔ e tili'n, yo sa kunngba sɔ'n ɔ bɔbɔ mɛn'n nun wa.› »

²⁴ Ɔ seli be ekun kɛ: «Nanwlɛ, Nyanmiɛn nuan ijɔfuɛ fi lɛ-man nyrun i bɔbɔ i mɛn'n nun.

²⁵ Ndɛ nanwlɛ kpa yɛ m ma kan kle amun lɛ-ɔ: Eli blɛ su'n, angboti mmla'm be sɔnnin Izraɛl mɛn'n nun, blɛ sɔ'n nun'n, nzue'n jrannin afuɛ nsan anglo nsiɛn, yɛ awe kpɛnnin dan kpa mɛn wunmuan sɔ'n nun.

²⁶ Sanngɛ Nyanmiɛn a sunman-man Eli angboti bla sɔ'n be wie fi sin, san angboti bla kun b'ɔ o Sarɛpta Sidɔn mɛn'n nun'n i sin cɛ yɛ ɔ sunmɛnnin i-ɔ .

²⁷ Yɛ Nyanmiɛn nuan ijɔfuɛ Elize kusu i blɛ su'n, kokowefuɛ kpanngban be o Izraɛl mɛn'n nun, sanngɛ be nun wie fi wun a sa-man, san Naaman b'ɔ fin Siri'n i kunngba cɛ yɛ i wun sali-ɔ .»

²⁸ «Kɛ be nga be o Nyanmiɛn ndɛ suanlɛ nin i srɛlɛ sua'n nun lɛ'n be kwlaa be tili ndɛ sɔ'n, ya kunnin be dan kpa.»

²⁹ Be jao fuannin Jésus be klɔ'n su, be fɛ i ɔli lele juli oka'n bɔ be klɔ'n wo su'n i bue kun b'ɔ seli pia'n su lɔ kɛ be ´su i yi i kongo nun lɔ.

³⁰ Sanngɛ ɔ sinnin be afiɛn lɛ ɔli.

Bian bɔ asiɛ usu sacili i'n

³¹ Jésus ɔli Galile klɔ kun bɔ be flɛ i Kapɛrnaɔm'n su, wunmiɛn-delɛ-cɛn'n nun'n, ɔ kleli be like.

³² I like b'ɔ kle be'n bo bé nuan, yɛlɛ kɛ i ndɛ b'ɔ kan'n, ɔ kle be kɛ ɔ lɛ sin jranfuɛ.

³³ Kɛ ɔ ´yo sɔ'n, wuun bian kun bɔ asiɛ usu b'ɔ saci sran'n ɔ'a saci i'n ɔ o Nyanmiɛn ndɛ suanlɛ nin i srɛlɛ sua'n nun lɛ, ɔ kpannin kekle kpa ɔ seli kɛ:

³⁴ «Ee! ?Jésus Nazarɛtfuɛ, nguɛ sa yɛ ɔ wo e nin wɔ ye afiɛn-ɔn? ?A ba e sacilɛ? N si wɔ kpa, a ti Nyanmiɛn i Sran kpa.»

³⁵ Jésus ijɔli i, ɔ seli i kɛ: «Muan ɔ nuan lɛ, jao bian nga su.» Asiɛ usu'n tɛli bian sɔ'n i ase nzra'n nun lɛ, ɔ jaoli i su ɔ'a yo-mɛn i like fi.

³⁶ Be kwlaa bé nuan boli be wun, be usa be wiengu kɛ: «Nguɛ sa yɛlɛ nga? Ɔ kwla asiɛ usu bɔ be saci sran'n, be sro i, ɔ man kɛ ɔ se be kɛ be jao sran'm be su'n, be jao!»

³⁷ Ɔ man i dunman'n fuli lele juli klɔklɔ nga be mantan lɛ'n be su.

Jésus yoli Piɛr sia bla'n i juejue

³⁸ Kɛ Jésus fin Nyanmiɛn ndɛ suanlɛ nin i srɛlɛ sua lɛ fiteli'n, ɔ ɔli Simɔn i awlo lɔ. Kɛ ɔ ´yo sɔ'n, wuun ayrɛ dan kpa a gua Simɔn sia bla'n i wun, be kan kleli Jésus.

³⁹ Ɔ kannin ase i su, ɔ ijɔli ayrɛ b'ɔ guɛ i wun'n. Ayrɛ'n tuli i wun, yɛ bé ja osu kunngba'n nun lɛ ɔ jao kunndɛ like mannin be-ɔ.

Tukpacɛfuɛ fanunfanun'm be juejue yolɛ

⁴⁰ Kɛ wia'n tɔli'n, be kwlaa nga be lɛ tukpacɛfuɛ bɔ be tukpacɛ'n ti fanunfanun'n, be fa be blɛli Jésus. Ɔ fɛ i sa fuali be kwlakwlakwla be su, ɔ yoli be juejue.

⁴¹ Asiɛ usu'm be kusu be jaoli sran kpanngban bé su. Be ´jao bé su sɔ'n, wuun be kpan kekle kɛ: «A ti Nyanmiɛn Wa.» Sanngɛ Jésus ijɔli be, ɔ seli be kɛ nán man be ijɔ, afin be si kɛ ɔ ti Krist.

Jésus i Zide lɔ Nyanmiɛn ndɛ kanlɛ

⁴² Kɛ aliɛ cɛnnin'n, Jésus fite ɔli blo lɔ lika kun b'ɔ ti diin'n nun. Sran'm be kunndɛli i lele be wunnin i, be waan be ´trɛ i ase nan nán ɔ tu i bo bé wun lɛ.

⁴³ Sanngɛ ɔ seli be kɛ: «Nyanmiɛn sielɛ'n i ndɛ kanlɛ klɔ uflɛ wie'm be su'n ɔ ti i cinnjin, i sɔ'n ti yɛ Nyanmiɛn sunmannin min-ɔn.»

⁴⁴ Ɔ kannin Nyanmiɛn ndɛ Nyanmiɛn ndɛ suanlɛ nin i srɛlɛ sua'm be nun Zide lɔ.