Kalɛ 8 - NYANMIƐN NDƐ'N 1998

Kannin'm be siesiewlɛ

¹ Anannganman seli Moiz kɛ ɔ

² `kan ndɛ nga kle Aarɔn. I waan ɔ `se i kɛ: «Blɛ bɔ a ´fa kannin mun siesie'n, nian su kpa man be kpaja kannin siewlɛ'n i nyrun.»

³ Aarɔn niannin su yoli i sɔ. Ɔ siesieli kannin mun kannin siewlɛ'n i nyrun lɛ kɛ Anannganman kan kleli Moiz kɛ ɔ `kan kle i'n sa.

⁴ Be boli sika ɔkwlɛ yɛ be fa yoli kannin siewlɛ nin-ɔn. Kɛ ɔ fɛ i i bo ngua lɔ lele b'ɔ fa ju i ti'n su, waka nyrɛ'm be nzɔliɛ'm be nun'n, sika ɔkwlɛ yɛ be boli be fa yoli-ɔ. Nga Anannganman fa kleli Moiz kɛ ɔ `yo'n, i su yɛ be niannin be yoli-ɔ.

Levifuɛ'm be Anannganman i sa nun fa wlalɛ

⁵ Anannganman seli Moiz kɛ:

⁶ «Flɛ Levifuɛ mun man be jaso Izraɛlfuɛ onga'm be afiɛn nan kplo be fiɛn nan siesie be nin min e afiɛn.

⁷ Wafa nga a wa fa kplo be wun fiɛn'n yɛ. Kpɛntɛn-kpɛntɛn bé su nzue b'ɔ salo sa tɛ'n. Man be bɔbɔ be fa laliɛ lɛman be yiyi be wunnɛn wunmuan'n su ndrɛ'n, man be kpu be tralɛ mun, man bé wun ɔ sa .

⁸ Man be fa nannin tola bɔ b'a kpɛ cro'n kun nin i su ble sanmlɛn mlɛnnɛnnɛn kpa'n bɔ be fa ngo be fɔtɔli'n, kpɛkuun ɔ bɔbɔ fa nannin tola uflɛ nga be fa yi min kpatalɛ tɛ'n.

⁹ Flɛ Levifuɛ mun man be mantan min tannin sua'n i nyrun lɛ, nan yia Izraɛlfuɛ'm be kwlakwlakwla.

¹⁰ Flɛ Levifuɛ mun man be bla min nyrun lɛ. Man Izraɛlfuɛ'm be fa bé sa fua Levifuɛ'm bé su.

¹¹ Man Aarɔn yo nzɔliɛ ng'ɔ kle kɛ ɔ su fa Levifuɛ mun wla min sa nun'n, man ɔ yo i Izraɛlfuɛ'm bé nuan, nan Levifuɛ'm be wlu min junman'n nun.

¹² Man Levifuɛ'm be fa bé sa sie nannin tola bé ti'm bé su. Man Aarɔn fa nannin tola'n kun yi min kpatalɛ tɛ'n, yɛ ɔ fa kun'n kusu yi tɛ nga be yrɛ i nnɛn'n kɔlikɔli'n, i sin nan ɔ'a yo like ng'ɔ fata kɛ ɔ yo nan m'an yaci Levifuɛ'm be wun sa m'an cɛ be.

¹³ Yo man Levifuɛ'm be jran nglo Aarɔn nin i mma'm be nyrun lɛ, nan yo nzɔliɛ ng'ɔ kle kɛ be su fa Levifuɛ mun wla min sa nun'n.

¹⁴ Yo man Levifuɛ'm be jaso Izraɛlfuɛ'm be afiɛn nan be `yo min liɛ klonglo.

¹⁵ I sin, man Levifuɛ'm be wa di junman tannin sua'n nun. Wafa nga bɔ a ´fa kplo be wun fiɛn'n bɔ a ´yo nzɔliɛ ng'ɔ kle kɛ be su fa be be wlɛ mín sa nun'n yɛ ɔ o lɛ-ɔ.

¹⁶ Afin be liɛ'n, Izraɛlfuɛ'm be kwlaa be nun'n, be ti min liɛ klonglo. N fali be kɛ be `yo min liɛ nan be sin Izraɛlfuɛ'm be talua ba yasua'm be osu.

¹⁷ Afin talua ba nga be wu be'n, be ti min liɛ, sɛ sran o, sɛ nnɛn o, be ti min liɛ. Kɛ ɔ fin cɛn bɔ n yoli man Eziptfuɛ'm be talua ba yasua'm be wuli'n, Izraɛlfuɛ'm be talua ba yasua'm be ti min liɛ klonglo.

¹⁸ I kwlaa sɔ'n ti yɛ n kpali Levifuɛ mun kɛ be sin Izraɛlfuɛ'm be talua ba yasua'm be ajalɛ nun nin-ɔn.

¹⁹ N fali Levifuɛ mun m mannin Aarɔn nin i mma mun kɛ be `jran Izraɛlfuɛ'm be nuan be `di min junman'n tannin sua'n nun. Be yɛ n kpali be Izraɛlfuɛ'm be afiɛn kɛ be `yi Izraɛlfuɛ'm be ti tɛ mun-ɔn. Kɛ ɔ yo sɔ'n, Izraɛlfuɛ'm be su wun-man nyrɛnnɛn dandan ng'ɔ fata kɛ be wun be'n, afin be su wunnge-man lika ng'ɔ ti min liɛ klonglo'n i wun kun.»

²⁰ Moiz nin Aarɔn, ɔ nin Izraɛlfuɛ'm be kwlakwla be yoli like nga Anannganman kan kleli Moiz kɛ be yo be man Levifuɛ mun'n.

²¹ Levifuɛ'm be kploli bé wun fiɛn, kpɛkuun be kpuli bé wun ninnge mun. I sin Aarɔn yoli nzɔliɛ ng'ɔ kle kɛ be su fa be wlɛ Anannganman i sa nun, yɛ ɔ yoli like ng'ɔ fata kɛ ɔ yo nan Nyanmiɛn ɔ'a yaci be wun sa a cɛ be nan be wun fiɛn'n ɔ'a kplo'n.

²² Kɛ ɔ yoli sɔ'n, Levifuɛ'm be wa dili junman tannin sua'n nun. Kɛ be ´di junman sɔ'n, Aarɔn nin i mma mun yɛ be nian be su-ɔ. Kɛ Anannganman kan kleli Moiz kɛ be `fa yo Levifuɛ mun'n, i su yɛ be yoli-ɔ.

²³ Anannganman seli Moiz kɛ:

²⁴ «Levifuɛ'm be junman'n i wun ndɛ yɛ: Levifuɛ kwlaa ng'ɔ ko nyan afuɛ ablaɔn-nin-nnun'n, man ɔ wlu min junman'n nun sua'n nun lɔ.

²⁵ Kɛ be ´se kɛ ɔ'a di afuɛ ablenun'n, nán ɔ di min junman'n kun, nán ɔ su min mín sua'n nun lɔ kun.

²⁶ I liɛ ng'ɔ kwla yo i siɛn'n, yɛlɛ Levifuɛ nga be tɛ o junman'n nun'n be ukalɛ. Sanngɛ i bɔbɔ lɛ-mɛn i tiaun junman kun sa. Mmla nga a wa jran su bɔ Levifuɛ'm be fa di min junman'n yɛ be o lɛ-ɔ.»