Kalɛ 36 - NYANMIƐN NDƐ'N 1998

Bla nga be di aja'm be bian aja'n i su mmla

¹ Zozɛf i osu nun mma'm be nun'n, Galaad lɔ awlobo kpɛnngbɛn mun bɔ be ti Makir wa'n, be nin Manase i osu nunfuɛ mun be wa toli Moiz nin Izraɛl akpasua-akpasua'm bé su kpɛnngbɛn mun.

² Be waan: «Moiz, kɛ bɔ Anannganman seli wɔ kɛ a `tu fɔtɔ nan a fa cɛ asiɛ'n nun a `man Izraɛl akpasua mun'n, ɔ seli wɔ ekun kɛ a `fa e niaan bian Zɛlɔfsad i lika liɛ'n a mɛn i wa bla mun.

³ Siɛn'n, sɛ be ko ja Izraɛl akpasua uflɛ su bian'n, be fa be lika liɛ e liɛ'n nun be ko uka akpasua uflɛ nga be wluli nun'n i lika liɛ'n su. Kɛ ɔ ´yo sɔ'n, kpɛkuun e lika liɛ nga be mannin ye'n i su ɔ'a kpɛ.

⁴ I sɔ nun'n, afuɛ nga i nun yɛ Izraɛlfuɛ'm be di-man junman mlɔnmlɔn'n, bla sɔ'm be lika liɛ bɔ be fɛli i é sa nun'n, ɔ ´ka akpasua uflɛ i liɛ'n nun.»

⁵ Anannganman kannin i nuan su ndɛ kleli Moiz. I waan ɔ `se Izraɛlfuɛ'm be kɛ: «Zozɛf i osu nunfuɛ'm be ndɛ yo fɛ.

⁶ Zɛlɔfsad i mma bla'm bé wun mmla nga m mannin'n yɛ. Yasua kwlaa nga be klo i'n yɛ be jɛ i-ɔ. Sanngɛ man yasua nga be ´jɛ i'n ɔ fin bé si i osu'n nun.

⁷ Kɛ ɔ yo sɔ'n liɛ'n, Izraɛl akpasua kun i asiɛ liɛ'n su kɔ-man akpasua uflɛ sa nun. Akpasua kun i asiɛ liɛ'n ti i su sran'm be liɛ.

⁸ Sɛ akpasua'm be nun kun su bla kun di i si i aja'n, ɔ fata kɛ ɔ ja bian i si i osu'n nun kɛ ɔ ´yo nan Izraɛl akpasua kun i asiɛ liɛ'n ɔ'a kɛ i sa nun titi'n ti.

⁹ Kɛ ɔ yo sɔ'n liɛ'n, nvle kun i asiɛ liɛ'n su kɔ-man nvle uflɛ sa nun. Kpɛkuun nvle kun ´trɛ i asiɛ'n nun kekle.»

¹⁰ Zɛlɔfsad i mma bla'm be fali Anannganman i ndɛ ng'ɔ kan kleli Moiz'n su.

¹¹ Makla, Tirza, Ɔgla, Milka yɛ Nɔa be jali bé si niaan bian'm be mma yasua mun

¹² Manase b'ɔ ti Zozɛf i wa'n i osu nunfuɛ mun. Kpɛkuun be asiɛ'n kali bé si i akpasua'n su.

¹³ Mmla nin atin kleklelɛ ninnge nga bɔ Anannganman man Moiz kan kleli Izraɛlfuɛ mun Moab lika kpɛtɛkplɛɛ'n nun, Zurdɛn'n i nuan lɛ Zeriko klɔ'n nyrun ndɛnman su lika'n nun lɔ'n, be yɛ be o lɛ-ɔ.