Kalɛ 29 - NYANMIƐN NDƐ'N 1998

Bo srolɛ cɛn'n

¹ «Anglo nso su'n i cɛn ba klikli'n su'n, amun `yia, amun `su min. Nán amun di junman fi. Ɔ ti bo srolɛ cɛn.

² Amun `yi tɛ nga be yrɛ i nnɛn'n kɔlikɔli'n, b'ɔ bɔn min bue nun fannin'n, amun `man nannin tola nga ɔ'a kpɛ cro sɔ kun, nin bua nene kun, ɔ nin bua nga b'a kpɛ cro'n bɔ be lɛ afuɛ kun'n, i sɔ nso. Nán lɛ fi tran nnɛn sɔ'm bé wun.

³ Amun `sie nnɛn kun su ble sanmlɛn mlɛnnɛnnɛn kpa bɔ be fa ngo be fɔtɔli'n: amun `sie nannin tola kun su ble sanmlɛn mlɛnnɛnnɛn kpa kilo ngwlan, yɛ amun sie bua nene'n su kilo nsiɛn.

⁴ Man be sie bua nga ɔ'a kpɛ cro'n kun su ble sanmlɛn mlɛnnɛnnɛn kpa kilo nsan.

⁵ Amun `fa boli kpakpuɛ kun kusu `yi tɛ nga be fa kpata min'n, nan be `yo like ng'ɔ fata be yo nan m'an yaci amun wun sa'n m'an cɛ amun'n.

⁶ Man be yi tɛ sɔ'n be fa uka tɛ ng'ɔ o yɛ'n bé su: anglo kwlaa i cɛn klikli'n su tɛ'n bɔ be yrɛ i nnɛn'n kɔlikɔli'n, nin tɛ nga be yi i cɛn kwlakwla'n, ɔ nin bé su ble sanmlɛn mlɛnnɛnnɛn kpa bɔ ngo yɛ be fa fɔtɔli'n, yɛ be `su nzan nga be kleli bɔ be guɛ i ase'n. Tɛ sɔ'm be ti tɛ bɔ be yra be nnɛn'n kɔlikɔli'n bɔ be bɔn min bue nun fannin.»

Cɛn dan nga bɔ i nun yɛ Anannganman yaci sa mun cɛ'n

⁷ «Anglo nso su'n i le blu su'n, amun `yia nan amun su min. Amun `ci nglɛmun, nán amun di junman fi.

⁸ Amun `fa nannin tola nga b'a kpɛ cro'n sɔ kun, nin bua nene kun, ɔ nin bua nga b'a kpɛ cro'n sɔ nso bɔ b'a di afuɛ kun'n, nán lɛ fi tran nnɛn sɔ'm bé wun.

⁹ Kɛ amun man nnɛn kun'n, amun `sie su ble sanmlɛn mlɛnnɛnnɛn kpa bɔ be fa ngo fɔtɔli'n. Amun `sie nannin tola kun su ble sanmlɛn mlɛnnɛnnɛn kpa kilo ngwlan, yɛ amun `sie bua nene'n kun su kilo nsiɛn,

¹⁰ yɛ amun `sie bua nga b'a kpɛ cro'n nso'n be su ble sanmlɛn mlɛnnɛnnɛn kpa kilo nsan-nsan.

¹¹ Amun `fa boli kpakpuɛ kun be `yi tɛ nga be fa kpata min'n. Tɛ nga be fa nunnun tɛ mun'n nin tɛ nga be yrɛ i nnɛn'n kɔlikɔli titi'n, nin sraka nga amun fa ble sanmlɛn mlɛnnɛnnɛn kpa be yi'n, ɔ nin nzan nga be guɛ i ase'n, amun `fa uka bé su.»

Tannin sua'm be ti cɛn dilɛ'n

¹² «Anglo nso su'n i cɛn ba blu-nin-nnun su'n, amun `yia nan amun `su min, nán amun di junman fi. Amun `di cɛn, amun `manman min lele cɛn ba nso.

¹³ Cɛn klikli'n su'n, amun `fa nannin tola nga b'a kpɛ cro'n sɔ blu-nin-nsan, nin bua nene nnyɔn, ɔ nin bua nga b'a kpɛ cro bɔ b'a di afuɛ kun'n, i sɔ blu-nin-nnan, nán man lɛ fi tran nnɛn sɔ'm bé wun. Amun `fa yi tɛ nga be yrɛ i nnɛn'n kɔlikɔli'n b'ɔ bɔn min bue nun fannin'n.

¹⁴ Kɛ amun man nnɛn kun'n, amun `sie su ble sanmlɛn mlɛnnɛnnɛn kpa nga be fa ngo be fɔtɔli'n: amun `sie nannin tola blu-nin-nsan'm be su ble sanmlɛn mlɛnnɛnnɛn kilo ngwlan-ngwlan. Amun `sie bua nene nnyɔn'm be su kilo nsiɛn-nsiɛn,

¹⁵ yɛ amun `sie bua nga b'a kpɛ cro sɔ blu-nin-nnan'n be su ble sanmlɛn mlɛnnɛnnɛn kpa kilo nsan-nsan.

¹⁶ Amun `fa boli kpakpuɛ kun be `yi tɛ nga be fa kpata min'n. Tɛ nga be yrɛ i nnɛn'n kɔlikɔli'n bɔ amun yi i tititi'n, nin sraka nga amun fa ble sanmlɛn mlɛnnɛnnɛn kpa be yi'n, ɔ nin nzan nga be guɛ i ase'n, amun `fa uka tɛ sɔ'm be kwlaa be su.

^17-34 Kɛ ɔ fɛ i cɛn dilɛ blɛ sɔ'n i le nnyɔn'n su lele b'ɔ ´fa ju i le nso su'n, amun `yi tɛ nga be yrɛ i nnɛn'n kɔlikɔli'n bɔ amun yi i cɛn kwlaa'n, i sin amun `fa nnɛn nga lɛ fi nun-man bé wun'n be `yi tɛ, yɛ sraka nga be fa ble annzɛ like ng'ɔ ti kɛ ble sa be yi'n, amun `fa sie su. Nnɛn sɔ'm be yɛ. Cɛn ba nnyɔn su'n, amun `fa nannin tola blu-nin-nnyɔn, nin bua nene nnyɔn, nin bua nga b'a kpɛ cro nga b'a di afuɛ kun'n i sɔ blu-nin-nnan, ɔ nin boli kpakpuɛ kun. Cɛn ba nsan su'n, amun `fa nannin tola blu-nin-kun, nin bua nene nnyɔn, ɔ nin bua nga b'a kpɛ cro nga b'a di afuɛ kun'n i sɔ blu-nin-nnan, ɔ nin boli kpakpuɛ kun. Cɛn ba nnan su'n, amun `fa nannin tola blu, nin bua nene nnyɔn, nin bua nga b'a kpɛ cro'n nga b'a di afuɛ kun'n i sɔ blu-nin-nnan, ɔ nin boli kpakpuɛ kun. Cɛn ba nnun su'n, amun `fa nannin tola ngwlan, nin bua nene nnyɔn, nin bua nga b'a kpɛ cro'n nga b'a di afuɛ kun'n i sɔ blu-nin-nnan, ɔ nin boli kpakpuɛ kun. Cɛn ba nsiɛn su'n, amun `fa nannin tola mɔcuɛ, nin bua nene nnyɔn, nin bua nga b'a kpɛ cro'n nga b'a di afuɛ kun'n i sɔ blu-nin-nnan, ɔ nin boli kpakpuɛ kun. Cɛn ba nso su'n, amun `fa nannin tola nso, nin bua nene nnyɔn, nin bua nga b'a kpɛ cro'n nga b'a di afuɛ kun'n i sɔ blu-nin-nnan, ɔ nin boli kpakpuɛ kun.

³⁵ Cɛn ba mɔcuɛ su'n, amun `yia yialɛ kasiɛn'n, nán amun di junman fi.

³⁶ Amun `fa nannin tola kun, nin bua nene kun, ɔ nin bua nga b'a kpɛ cro'n bɔ b'a di afuɛ kun'n sɔ nso. Nán man lɛ fi tran nnɛn sɔ'm be wun. Amun `fa be yi tɛ nga be yra be nnɛn'n kɔlikɔli'n, b'ɔ bɔn min bue nun fannin be man min.

³⁷ Amun `sie nnɛn kun su sraka nga amun fa ble sanmlɛn mlɛnnɛnnɛn kpa be yi'n, yɛ amun `sie su nzan nga be guɛ i ase'n.

³⁸ Amun `fa boli kun amun `yi tɛ nga be fa kpata min'n. Tɛ nga be yi i cɛn'n kwlakwla bɔ be yrɛ i'n, bɔ be sie su ble sanmlɛn mlɛnnɛnnɛn kpa nin nzan bɔ be guɛ i ase'n, tɛ sɔ'm be kwlaa be uka su.

³⁹ Tɛ ng'ɔ fata kɛ amun yi be amún cɛn dilɛ blɛ'm be nun'n be yɛ be o lɛ-ɔ. Tɛ nga be yrɛ i nnɛn kɔlikɔli ɔ nin sraka nga be fa ble sanmlɛn mlɛnnɛnnɛn kpa be yi'n, ɔ nin nzan nga be guɛ i ase'n be uka bé su. Be uka bo kun yolɛ i su tɛ nga amun klun klo amun yi'n su. Yɛ be uka nda nga amun ta min'n i su tɛ'n i su wie.»