Kalɛ 26 - NYANMIƐN NDƐ'N 1998

¹ Anannganman seli Moiz nin Aarɔn i wa Eleazar b'ɔ ti Nyanmiɛn nyrun jranfuɛ'n be kɛ:

² «Amun `klɛ Izraɛlfuɛ'm be kwlakwla be dunman awlobo-awlobo. Yasua nga b'a di afuɛ ablaɔn nin afuɛ ablaɔn gua su bɔ be kwla di sonja'n, be kwlaa be yɛ be `klɛ be dunman nin-ɔn.»

³ Moiz nin Nyanmiɛn nyrun jranfuɛ Eleazar be kannin ndɛ kleli Izraɛlfuɛ mun Moab lika kpɛtɛkplɛɛ'n nun lɔ. Be kannin ndɛ kleli be Zurdɛn nzue ba'n wun kokolɛ Zeriko klɔ'n i nyrun lɛ.

⁴ Be kan kleli be kɛ Anannganman seli Moiz kɛ ɔ `klɛ yasua nga be lɛ afuɛ ablaɔn nin afuɛ ablaɔn gua su'n be kwlaa be dunman. Izraɛl akpasua nga be fin Ezipt lɔ'n be yɛ:

⁵ Zakɔb i wa kpɛnngbɛn Ribɛn i akpasua liɛ'n i nun sran mun be yɛ: Enɔkfuɛ mun bɔ be ti Enɔk i osu nun mma mun'n, Palifuɛ mun bɔ be ti Pali i osu nun mma mun'n,

⁶ Ɛzrɔnfuɛ mun bɔ be ti Ɛzrɔn i osu nun mma mun'n, yɛ Karmifuɛ mun bɔ be ti Karmi i osu nun mma mun'n.

⁷ Osu-osu nga be fin Ribɛn akpasua'n su'n yɛ be o lɛ-ɔ. Be nun sran'm be kwlaa be ti akpi-akpi ablanan-nin-nsan sran ya nso sran ablasan (43.730).

⁸ Eliab ti Pali i wa,

⁹ Eliab i wa liɛ ng'ɔ wuli be'n yɛlɛ Nɛmiɛl, nin Datan, ɔ nin Abiram. Datan nin Abiram yɛ be ti nvle'n nun kpɛnngbɛn bɔ be jasoli Moiz nin Aarɔn bé wun nin-ɔn. Be jrannin Kɔre i minniɛn nga be jasoli Anannganman i wun'n bé sin.

¹⁰ Kpɛkuun asiɛ'n nun kpacili nan ɔ'a mɛn be nin Kɔre i minniɛn sɔ nga be jasoli Anannganman i wun'n yɛ Kɔre bɔbɔ, nan b'a wu. Cɛn kunngba sɔ'n nun yɛ Kɔre i minniɛn'm be wuli, bɔ sin yrali be sran ya nnyɔn sran ablenun nin-ɔn. I sɔ sa'n yoli nan be nga mun b'a fa tu bé wun fɔ nun.

¹¹ Sanngɛ Kɔre i mma'm b'a wu-man blɛ kunngba sɔ'n nun.

¹² Simeɔn akpasua'n su osu-osu mun yɛ: Nɛmiɛlfuɛ mun bɔ be ti Nɛmiɛl nun osu mma mun'n, Zamɛnfuɛ mun bɔ be ti Zamɛn i osu'n nun mma mun'n, Zakɛnfuɛ mun bɔ be ti Zakɛn i osu'n nun mma mun'n,

¹³ Zerakfuɛ mun bɔ be ti Zerak i osu'n nun mma mun'n, Sailfuɛ mun bɔ be ti Sail i osu'n nun mma mun'n.

¹⁴ Simeɔn i akpasua'n su osu-osu mun yɛ be o lɛ-ɔ. Be ti sran akpi-akpi ablaɔn-nin-nnyɔn sran ya nnyɔn (22.200).

¹⁵ Gad akpasua'n su osu-osu mun yɛ: Zɛfɔnfuɛ mun bɔ be ti Zɛfɔn i osu'n nun mma mun'n, Agifuɛ mun bɔ be ti Agi i osu'n nun mma mun'n, Sinifuɛ mun bɔ be ti Sini i osu'n nun mma mun'n,

¹⁶ Ɔznifuɛ mun bɔ be ti Ɔzni i osu'n nun mma mun'n, Erifuɛ mun bɔ be ti Eri i osu'n nun mma mun'n,

¹⁷ Arɔdfuɛ mun bɔ be ti Arɔd i osu'n nun mma mun'n, Areelifuɛ mun bɔ be ti Areeli i osu'n nun mma mun'n

¹⁸ Gad akpasua'n su osu-osu mun yɛ be o lɛ-ɔ. Be ti sran akpi-akpi ablanan sran ya nnun (40.500).

^19-21 Zida akpasua'n su osu-osu mun yɛ: Selafuɛ mun bɔ be ti Sela i osu'n nun mma mun'n, Ferezfuɛ mun bɔ be ti Perɛs i osu'n nun mma mun'n, Zerakfuɛ mun bɔ be ti Zerak i osu'n nun mma mun'n. Osu-osu nga be o Ferezfuɛ'm be akpasua'n su'n mun yɛlɛ Ɛzrɔnfuɛ mun bɔ be ti Ɛzrɔn i osu'n nun mma mun'n, Amilfuɛ mun bɔ be ti Amil i osu'n nun mma mun'n. Zida i wa nnyɔn bɔ be flɛ be Ɛr nin Ɔnan'n be wuli Kanaan mɛn'n nun lɔ.

²² Zida akpasua'n su osu-osu mun yɛ be o lɛ-ɔ. Be ti sran akpi-akpi ableso-nin-nsiɛn sran ya nnun (76.500).

²³ Isakar akpasua'n su osu-osu mun yɛ: Tolafuɛ mun bɔ ti Tola osu'n i mma nun mun'n, Pivafuɛ mun bɔ be ti Piva i osu'n nun mma mun'n,

²⁴ Zasibfuɛ mun bɔ be ti Zasib i osu'n nun mma mun'n, Simrɔnfuɛ mun bɔ be ti Simrɔn i osu'n nun mma mun'n.

²⁵ Isakar akpasua'n su osu-osu mun yɛ be o lɛ-ɔ. Be nun sran'm be ti akpi-akpi ablesiɛn-nin-nnan sran ya nsan (64.300).

²⁶ Zabilɔn akpasua'n su osu-osu mun yɛ: Serɛdfuɛ mun bɔ be ti Serɛd i osu'n nun mma mun'n, Elɔnfuɛ mun bɔ be ti Elɔn i osu'n nun mma mun'n, Zaleɛlfuɛ mun bɔ be ti Zaleɛl i osu'n nun mma mun.

²⁷ Zabilɔn akpasua'n su osu-osu'm be nun sran mun yɛ be o lɛ-ɔ. Be ti sran akpi-akpi ablesiɛn sran ya nnun (60.500).

²⁸ Manase akpasua'n nin Efraim akpasua'n be su yɛ Zozɛf i osu nun mma'm be kwlaa be wo-ɔ.

²⁹ Manase akpasua'n su osu-osu mun yɛ: Makirfuɛ mun bɔ be ti Makir i osu'n nun mma mun'n, yɛ Galaadfuɛ mun bɔ be ti Galaad i osu'n nun mma mun'n.

³⁰ Galaad akpasua'n su osu-osu mun yɛ: Zezɛrfuɛ mun bɔ be ti Zezɛr i osu'n nun mma mun'n, yɛ Elɛkfuɛ mun bɔ be ti Elɛk i osu'n nun mma mun'n,

³¹ Asriɛlfuɛ mun bɔ be ti Asriɛl i osu'n nun mma mun'n, Sisɛmfuɛ mun bɔ be ti Sisɛm i osu'n nun mma mun'n,

³² Sɛmidafuɛ mun bɔ be ti Sɛmida i osu'n nun mma mun'n, Efɛrfuɛ mun bɔ be ti Efɛr i osu'n nun mma mun'n.

³³ Efɛr i wa Zɛlɔfsad ɔ'a wu-man ba yasua, ba bla mun yɛ ɔ wuli be-ɔ. Be flɛ be Makla, Nɔa, Ɔgla, Milka, Tirza.

³⁴ Manase akpasua'n su osu-osu mun yɛ be o lɛ-ɔ. Be ti sran akpi-akpi ablenun-nin-nnyɔn sran ya nso (52.700).

³⁵ Efraim akpasua'n su osu-osu mun yɛ: Sitelakfuɛ mun bɔ be ti Sitelak i osu'n nun mma mun'n, Bekɛrfuɛ mun bɔ be ti Bekɛr i osu'n nun mma mun'n, Takanfuɛ mun bɔ be ti Takan i osu'n nun mma mun'n.

³⁶ Yɛ Eranfuɛ mun bɔ be ti Eran i osu'n nun mma mun'n, Eran ti Sitelak i wa.

³⁷ Efraim akpasua'n i su osu-osu'm be nun sran mun yɛ be o lɛ-ɔ. Be ti sran akpi-akpi ablasan-nin-nnyɔn sran ya nnun (32.500). Be kwlaa sɔ'm be ti Zozɛf i osu'n nun mma mun.

³⁸ Bɛnzamɛn akpasua'n su osu-osu mun yɛ: Belafuɛ mun bɔ be ti Bela i osu'n nun mma mun'n, Asbɛlfuɛ mun bɔ be ti Asbɛl i osu'n nun mma mun'n, Asiramfuɛ mun bɔ be ti Asiram i osu'n nun mma mun'n,

³⁹ Sifamfuɛ mun bɔ be ti Sifam i osu'n nun mma mun'n.

⁴⁰ Ardfuɛ mun bɔ be ti Ard i osu'n nun mma mun'n, yɛ Naamanfuɛ mun bɔ be ti Naaman i osu'n nun mma mun'n. Naaman nin Ard be ti Bela i mma mun.

⁴¹ Bɛnzamɛn akpasua'n su osu-osu'm be nun sran mun yɛ be o lɛ-ɔ. Be ti sran akpi-akpi ablanan-nin-nnun sran ya nsiɛn (45.600).

⁴² Dan akpasua liɛ'n fin osu kunngba nun, yɛlɛ Sikamfuɛ mun, be ti Sikam i osu nun mma mun.

⁴³ Be ti sran akpi-akpi ablesiɛn-nin-nnan sran ya nnan.

⁴⁴ Azɛr akpasua'n su osu-osu mun yɛ: Zimnafuɛ mun bɔ be ti Zimna i osu'n nun mma mun'n, Zisvifuɛ mun bɔ be ti Zisvi i osu'n nun mma mun'n, Bɛriafuɛ mun bɔ be ti Bɛria i osu'n nun mma mun'n,

⁴⁵ Ebɛrfuɛ mun bɔ be ti Ebɛr i osu'n nun mma mun'n, ɔ nin Malkiɛlfuɛ mun bɔ be ti Malkiɛl i osu'n nun mma mun'n. Ebɛrfuɛ nin Malkiɛlfuɛ'm be o Bɛria osu kunngba'n nun.

⁴⁶ Azɛr lɛ ba talua kun, be flɛ i Serak.

⁴⁷ Azɛr akpasua'n su osu-osu'm be nun sran mun yɛ be o lɛ-ɔ. Be ti sran akpi-akpi ablenun-nin-nsan sran ya nnan (53.400).

⁴⁸ Nɛftali akpasua'n su osu-osu mun yɛ: Zazɛɛlfuɛ mun bɔ be ti Zazɛɛl i osu'n nun mma mun'n, Ginifuɛ mun bɔ be ti Gini i osu'n nun mma mun'n,

⁴⁹ Zɛzɛrfuɛ mun bɔ be ti Zɛzɛr i osu nun mma mun'n, Silɛmfuɛ mun bɔ be ti Silɛm i osu'n nun mma mun'n.

⁵⁰ Nɛftali akpasua'n su osu-osu mun yɛ be o lɛ-ɔ. Be nun sran'm be ti akpi-akpi ablanan-nin-nnun sran ya nnan.

⁵¹ Izraɛlfuɛ nga be klɛli be dunman'n be kwlaa be ti sran akpi-akpi ya nsiɛn sran akpi kun sran ya nso sran ablasan (601.730).

Mɛn nga Izraɛlfuɛ'm be ´tran nun'n i nun cɛcɛlɛ'n

⁵² Anannganman seli Moiz kɛ:

⁵³ «Ɔ fata kɛ be cɛ mɛn'n nun nan be `fa man akpasua-akpasua mun. Kɛ akpasua kun i nun sran'm be nuan'n fa ti'n, i su yɛ be `nian yɛ be `mɛn i asiɛ liɛ nin-ɔn.

⁵⁴ Akpasua nga i nun sran'm be sɔnnin'n, man i lika liɛ'n yo dan, akpasua nga i nun sran'm b'a sɔn-man'n, man i lika liɛ'n yo kaan. Kɛ sran'm bé nuan fa ti'n yɛ be ´fa man be asiɛ nin-ɔn.

⁵⁵ Sanngɛ fɔtɔ yɛ be ´tu yɛ be ´fa cɛ mɛn sɔ'n nun-ɔn. Kɛ be si'm be akpasua'm be dunman'n fa ti'n i su yɛ be ´fa nyan be asiɛ nin-ɔn.

⁵⁶ Fɔtɔ yɛ be ´tu yɛ be ´fa cɛ mɛn'n nun-ɔn. Kɛ akpasua'm be su sran'm be nuan fa ti'n i su yɛ be `nian man be asiɛ nin-ɔn.»

Levifuɛ'm be dunman klɛlɛ nnyɔn su'n i ndɛ

⁵⁷ Osu-osu nga be o Levi akpasua'n su bɔ be klɛli be dunman'n mun yɛ: Gɛrsɔnfuɛ mun bɔ be ti Gɛrsɔn i osu'n nun mma mun'n, Keatfuɛ mun bɔ be ti Keat i osu'n nun mma mun'n, Mɛrarifuɛ mun bɔ be ti Mɛrari i osu'n nun mma mun'n.

⁵⁸ Osu kanngan wie'm be o osu sɔ'm be nun. Osu kanngan sɔ mun yɛ: Libnifuɛ mun, Ebrɔnfuɛ mun, Maklifuɛ mun, Misifuɛ mun, Kɔrefuɛ mun. Amram i si'n yɛlɛ Keat.

⁵⁹ Amram jali Zokebɛd, Levi i wa bla bɔ be wuli i Ezipt lɔ nin-ɔn. Zokebɛd nin Amram be wuli Aarɔn nin Moiz yɛ be niaan bla Mari.

⁶⁰ Aarɔn bɔbɔ wuli ba yasua nnan: Nadab, nin Abii, nin Eleazar, ɔ nin Itamar.

⁶¹ Sanngɛ Nadab nin Abii be ko fali sin b'ɔ ti-man Anannganman i liɛ'n, bɔ nán ng'ɔ kleli kɛ be fa'n, be wa yrali ansans mannin Anannganman nan b'a wu.

⁶² Yasua nga b'a di anglo kun nin anglo kun gua su bɔ be klɛli be dunman'n, be kwlaa be ti sran akpi-akpi ablaɔn-nin-nsan (23.000). B'a klɛ-man be dunman Izraɛlfuɛ'm be nun wie, afin b'a man-man be asiɛ kɛ Izraɛlfuɛ kun nga'm be sa.

Izraɛl akpasua'm be dunman klɛlɛ i nnyɔn su'n ɔ wieli

⁶³ Izraɛlfuɛ bɔ Moiz nin Nyanmiɛn nyrun jranfuɛ Eleazar be klɛli be dunman lika kpɛtɛkplɛɛ'n nun lɔ Zurdɛn nzue ba'n wun lɛ Zeriko klɔ'n i nyrun lɛ'n, be yɛlɛ nga be o lɛ'n.

⁶⁴ Be nga bɔ Moiz nin Aarɔn be klɛli be dunman Sinai aawlɛ flɛnnɛn'n nun lɔ'n, be wie fi nun-man be nun.

⁶⁵ Afin Anannganman dun mmua seli be kɛ be nun kun sa su ka-man lɛ, nan be kwlaa be ´wu aawlɛ flɛnnɛn'n nun lɔ, san Zɛfine i wa Kalɛb nin Nɛn i wa Zozie yɛ be kali lɛ-ɔ.