Jue Mun 79 - NYANMIƐN NDƐ'N 1998

Sun flɛlɛ bɔ Nyanmiɛn i mma'm be sun flɛ i'n

1 Jue nga ti Azaf liɛ.

¹ Jue nga ti Azaf liɛ. I waan: Ee Nyanmiɛn, aofuɛ wie'm b'a fa ɔ lika'n, b'a yo ɔ́ sua'n i fiɛn, yɛ b'a bubu Zerizalɛm klɔ wunmuan'n, ɔ'a kaci kɛ yɛbuɛ kwle sa.

² B'a kun ɔ sufuɛ mun, b'a fa be fuɛn'm b'a man anunman mun kɛ be `di. B'a fa be fuɛn'm b'a man blo nnɛn mun.

³ Ɔ sufuɛ nanwlɛfuɛ'm be mmoja'n sonji sin yiali Zerizalɛm klɔ'n kɛ nzue sa. B'a nyan-man sran b'ɔ ´sie be saka mun-ɔn.

⁴ Be nga be lika'm be mantan e wa'n, be kpɛ e nzowa. Be nga be mɛn'm be sin yia e liɛ'n, be yo e finfin, be srisri ye.

⁵ ?Anannganman cɛn onin ko yɛ a ´yaci ya tantrantan nga a fɛ i e wun nin-ɔn? ?Cɛn onin ko yɛ é ti kwla b'ɔ a si'n i su ya b'ɔ yra kɛ sin sa'n, ɔ ´jaso e su-ɔ?

⁶ Ɔ fata kɛ nvle-nvlefuɛ nga be si-man wɔ'n, ɔ nin mɛn nga be nunfuɛ'm be bo-man ɔ dunman'n yɛ a fa bé wun ya-a !

⁷ Afin b'a fɛn Izraɛlfuɛ'm bé bo ninnge'n kwlaa kpan, b'a saci be mɛn'n kwlaa.

⁸ Nán fa be nga be dun mmua e nyrun'n bé sa tɛ'n fa gua ye su, sanngɛ kɛ bɔ a klo ye'n ti'n, wunnge e wun wa. Nán sisi ɔ bo, afin e tɔlɛ'n ɔ'a yo dan ngboko.

⁹ Nyanmiɛn, wɔ bɔ a de ye'n, bla wa uka ye, nian ɔ dunman'n b'ɔ ti fuwa'n ti. Nian ɔ dunman dan'n ti de ye, yɛ yaci e wun sa'n cɛ ye.

¹⁰ ?Ɔ yo sɛ yɛ man aofuɛ'm be kwla usa kɛ: «Be Nyanmiɛn'n wo nin» nin-ɔn? Man be si kɛ ɔ sufuɛ nga be kun be'n, a tu be klunngbɔ. Man e kusu e wun i sɔ wie.

¹¹ Man bisuafuɛ'm be kplinlɛ'n to wɔ lɔ. Ɔ kwlalɛ bɔ a kwla dan'n ti, de be bɔ b'a bu be fɔ kɛ be ´kun be'n.

¹² Min Min, be nga be mɛn'n mantan e liɛ'n b'a klɔklɔ wɔ. Ɔ nzowa nga be kpɛli wɔ'n, man be nyɛn i su sa sɔ kpɛ nso.

¹³ Sanngɛ e bɔ e ti ɔ sran mun'n, bɔ e ti kɛ ɔ́ kuku'n nun nnɛn mun sa'n, e liɛ'n e ´to jue e ´manman wɔ tititi, e ´bo e flɛ wɔ tititi.