Jue Mun 75 - NYANMIƐN NDƐ'N 1998

Nyanmiɛn yɛ ɔ ti jɔlɛ difuɛ-ɔ

1 Jue nga ti Azaf liɛ. Ɔ o jue tofuɛ'm be su kpɛn'n i fluwa'm be nun wie. Kɛ be ´to'n, be nian jue nga be to i kɛ «Nán yaci i lɛ man ɔ saci i'n» i su yɛ be to-ɔ.

¹ Jue nga ti Azaf liɛ. Ɔ o jue tofuɛ'm be su kpɛn'n i fluwa'm be nun wie. Kɛ be ´to'n, be nian jue nga be to i kɛ «Nán yaci i lɛ man ɔ saci i'n» i su yɛ be to-ɔ. I waan:

² Nyanmiɛn, e ´manman wɔ, e ´manman wɔ, e ´yi wɔ nglo, e ´kan wɔ abonuan sa'm be ndɛ e ´sin.

³ Nyanmiɛn waan: «Kɛ jɔlɛ dilɛ blɛ nga n kleli'n ko ju'n, m ´bu ndɛ nanwlɛ nun.

⁴ Sɛ asiɛ'n keje'n, yɛ sɛ i su tranfuɛ'm be usu'n, min yɛ n suan bé bo-ɔ.

⁵ N se wun tufuɛ'm be kɛ: ‹Man wun tulɛ'n wie lɛ!› Yɛ be nga be bu-man min like fi'n, bɔ be bu-man min nuan ndɛ'n i like fi'n, be kusu n se be kɛ: ‹Amun `yaci amún wun dandan yolɛ'n.

⁶ Amun `yaci amún wun dandan yolɛ'n, amun `yaci ndɛ kpakpa kanlɛ'n.› »

⁷ Man amun `si kɛ sran'n i wun dandan yolɛ'n ɔ kwla fin-man wia afiliɛ annzɛ wia atɔliɛ, annzɛ aawlɛ flɛnnɛn'n nun lɔ.

⁸ Afin jɔlɛ difuɛ'n yɛlɛ Nyanmiɛn. Sran nga i waan ɔ ´kɛn i ase'n, ɔ kɛn i ase, nga i waan ɔ ´mɛn i su'n, ɔ mɛn i su.

⁹ Klowa kun wo Anannganman sa nun. Nzan ng'ɔ o nun'n ɔ yo sa fiɛfiɛfiɛ. Nzan sɔ'n, Anannganman i ya nin-ɔn. Ɔ ´su nzan sɔ'n man sran wlɛfuɛ nga be wo asiɛ'n su'n. Be ´nɔn i ngba, like fi su ka-man klowa sɔ'n nun .

¹⁰ N liɛ'n, n su yaci-man Zakɔb i Nyanmiɛn'n i dunman bolɛ. N ´to jue m ´mɛnmɛn i.

¹¹ Anannganman waan: «N ´kan wlɛfuɛ'm be wun tulɛ'n i ase'n. M ´man min sufuɛ kpakpa'm be su.»