Jue Mun 74 - NYANMIƐN NDƐ'N 1998

Flɛlɛ nga be flɛli Nyanmiɛn blɛ bɔ i sua'n sacili'n

1 Jue nga ti Azaf liɛ.

¹ Jue nga ti Azaf liɛ. I waan: ?Nyanmiɛn, ɔ yo sɛ ti yɛ a yi e blo mlɔnmlɔn sɔ-ɔ? ?E ti-man kɛ ɔ bua mun sa? ?Ɔ yo sɛ ti yɛ a fa ya kekle e wun sɔ-ɔ?

² Nán ɔ wla fi ɔ nvle'n. Ɔ ti wɔ liɛ ɔ fin-man ndɛ. A kpɔli i ti, ɔ ti wɔ aja like. Nán ɔ wla fi Siɔn oka b'ɔ ti ɔ tranwlɛ'n.

³ Bla wa nian lika b'ɔ bubuli ɔ'a cɛ'n i osu. Ɔ kpɔfuɛ'm be sacili ɔ lika'n i nun ninnge'n kwlaa.

⁴ Be nga be nin wɔ be kun'n be kpannin kɛ asɔmɔli sa ɔ lika'n nun. Be fali be nzɔliɛ liɛ'n be sieli i lɛ.

⁵ Be ´yo ɔ́ sua'n nun sa-a, ɔ waan waka kpɛfuɛ mun yɛ b'a fa be kpɛliɛ b'a kpɛn bo ble nun sa.

⁶ Be fali kpɛliɛ nin marto mun be bubuli ɔ́ sua'n nun ninnge nga be sɛli be'n.

⁷ Be yili ɔ sua'n nun sin, be suli i bo be yili i ase. Be yoli lika sɔ bɔ ɔ dunman'n wo su'n i finfin.

⁸ Be se bé wun kɛ: «E `kle be kwlaa be nyrɛnnɛn ke! E `wɔ be Nyanmiɛn suwlɛ'n kwlaa nun.»

⁹ E wun-man e nzɔliɛ'm be wie fi kun. Nyanmiɛn nuan ijɔfuɛ'm b'a wie. E wie fi e si-man blɛ bɔ i sɔ sa'm be wie-ɔ.

¹⁰ ?Ee Nyanmiɛn, cɛn onin ko yɛ ɔ kpɔfuɛ'n ɔ ´yaci ɔ safle wɔlɛ-ɔ? ?Nan kɛ ɔ ´saci ɔ wun sa tititi?

¹¹ ?Ɔ yo sɛ ti yɛ a o lɛ diin sɔ-ɔ? Yi ɔ́ sa'n fite fa bla ɔ kpɔfuɛ'n i like man ɔ wu ke!

¹² Ee Nyanmiɛn min famiɛn, wɔ yɛ kɛ ɔ fin lalafuɛ nun'n, a de sran mun mɛn wunmuan'n nun nin-ɔn.

¹³ Ɔ wunmiɛn dan'n ti, a kpɛli jenvie nun'n. A kpacili jenvie'n nun ninnge sroesroe'm bé ti'm be nun .

¹⁴ A kpɔtɔli Leviatan'n i ti mun, a fa mannin aawlɛ flɛnnɛn'n nun lɔ nnɛn mun kɛ be di.

¹⁵ A mannin nzue ti nin nzue ba'm be sonjiwlɛ. Wɔ yɛ man nzue ba dandan nga be nian wie-man nun le'n be wie nun-ɔn .

¹⁶ Wia'n nun nin kɔnguɛ'n be ti wɔ liɛ, afin wɔ yɛ a yili anglo nin wia nin-ɔn.

¹⁷ Wɔ yɛ a kleli asiɛ'n i juwlɛjuwlɛ mun kwlaa-a. Wɔ yɛ a sieli munngun'n nin wawa nin-ɔn .

¹⁸ Anannganman, man ɔ́ wla kpɛn su kɛ ɔ kpɔfuɛ'n ɔ wɔ ɔ safle. Man ɔ́ wla kpɛn su ekun kɛ nvle nga nun sran'm be sinnzin'n ti, be yo wɔ finfin.

¹⁹ Nán fa ɔ sran mun man blo nnɛn mun, afin be ndɛ lo wɔ. Nán ɔ wla fi ɔ sran aunnvuɛfuɛ mun bé su sa titi sɔ.

²⁰ Man ɔ nyin kpɛn aenguɛ bɔ a nin be trali'n su. Be di-man lika nga sran'm be fia be nun be yo sa tɛ'n be yalɛ.

²¹ Nán be nga be mian be fii'n be `fa be nyrun nyannzuɛn'n be wɔ. Man yalɛfuɛ mun nin nyrɛnnɛnfuɛ'm be manman wɔ.

²² Nyanmiɛn, jaso, nán tran lɛ sa diin ngbɛn! Nán ɔ wla fi nzowa nga sinnglinfuɛ sɔ'm be kpɛ wɔ cɛn kwlaa'n.

²³ Nán ɔ wla fi ɔ kpɔfuɛ'm be kpankpanlɛ bɔ be kpan'n su. Nán ɔ wla fi be bɔ be klo-man ɔ sa'n be kpanlɛ nga cɛn kwlaa i nyrun yɛ ɔ kɔ'n su.