Jue Mun 64 - NYANMIƐN NDƐ'N 1998

Be nga be ijɔ tɛtɛ'n, be kwlalɛ nga Nyanmiɛn kwlali be'n

1 Jue nga ti David liɛ. Ɔ o jue tofuɛ'm be su kpɛn'n i fluwa'm be nun wie.

¹ Jue nga ti David liɛ. Ɔ o jue tofuɛ'm be su kpɛn'n i fluwa'm be nun wie. I waan:

² Ee Nyanmiɛn, tie min kplinlɛ bɔ n kplin'n. Sasa min nguan'n min kpɔfuɛ b'ɔ wlanwlan min'n ti.

³ De min klunwifuɛ bɔ be cici min wun sa'n bé sa nun. De min sran kpanngban woo bɔ be yo sa tɛtɛ'n bé sa nun.

⁴ Bé nuan'n la kɛ kue bɔ b'a si'n sa. Bé nuan nun ndɛ'm be wɔ tɛ kpa kɛ ta mma bɔ be siesie bé wun

⁵ kɛ be su wa to i sran kpa'm bé wun nvialiɛ nun'n sa. Sran'm bé nyin bɔ be ´bo i bla-a, b'a to, srɛ bɔ kaan sa kun-man be.

⁶ Be wla be wiengu fanngan sa tɛ sɔ'm be yolɛ'n nun. Bé bo yo kun yɛ be kunndɛ be aya'n i suawlɛ nvialiɛ nun-ɔn. Be waan: «Nga, sran fi su wun-man ye o!»

⁷ Be bu sa tɛ nga be wa yo'n i wun akunndan, kpɛkuun be waan: «Like nga e ko yo'n, y'a wun i siɛn'n. Nanwlɛ, kɛ klɔ sran kpa'n ɔ o lɛ'n, ɔ si ngwlɛlɛ o.»

⁸ Sanngɛ nian, Nyanmiɛn ɔ'a fɛ i ta mma'n ɔ'a to i bé wun, b'a wun-man nun. Kɛ e ´se yɛ'n, be gua lɛ.

⁹ Be bɔbɔ bé nuan'n ti b'a tɔ. Be kwlaa nga be wun be'n, be keje be ti'n.

¹⁰ Srɛ kun sran'm be kwlaa. Sran sɔ'm be bo sa nga Nyanmiɛn yoli'n i jɔ sin, be si sa ti bɔ Nyanmiɛn yo sa sɔ mun'n.

¹¹ Man be nga Anannganman bu be sran kpa'n be klun jɔ i ti. Man be fiɛ i sin. Man be bɔ be ti sɛsɛ'n be fɛ i di bé nuan.