Jue Mun 61 - NYANMIƐN NDƐ'N 1998

Anannganman i sua'n nun tranlɛ'n i kpa b'ɔ ti'n

1 Jue nga ti David liɛ. Ɔ o jue tofuɛ'm be su kpɛn'n i fluwa'm be nun wie. Kɛ be ´to'n, be bo like b'ɔ ti kɛ jru sa'n wie.

¹ Jue nga ti David liɛ. Ɔ o jue tofuɛ'm be su kpɛn'n i fluwa'm be nun wie. Kɛ be ´to'n, be bo like b'ɔ ti kɛ jru sa'n wie. I waan:

² Nyanmiɛn, tie min kpanlɛ bɔ n kpan'n. Tie srɛlɛ bɔ n srɛ wɔ'n.

³ Kannzɛ n wo asiɛ'n i bue kun lɔ'n, kɛ mín wla'n bo'n, wɔ yɛ n kpan flɛ wɔ-ɔ. Fa min sie yɛbuɛ ng'ɔ o nglo bɔ m bɔbɔ n fu su-ɔ ɔ yo-man ye'n su.

⁴ Min kpɔfuɛ'n ti, ɔ nun yɛ n fia-a, a ti kɛ klɔ'n i sasalɛ sua bɔ be sisi i wun talɛ kekleke'n sa.

⁵ N klo kɛ n ´tran ɔ tannin sua'n nun tititi nan n ´fia ɔ ndɛwa'n bo.

⁶ Nyanmiɛn, wɔ yɛ a tili fualɛ nga n fuali'n i kwlaa nin-ɔn. Like nga a fa man be bɔ be nyin yi wɔ'n, a fa mannin min.

⁷ Gua famiɛn'n i afuɛ'n su, man ɔ cɛ cɛcɛcɛ.

⁸ Ee Nyanmiɛn, man ɔ sie lika'n yɛ ɔ tran ɔ nyrun lɛ tititi. Ɔ klun-ufue b'ɔ wie-man le'n ti, sɛsɛ i.

⁹ Nanwlɛ, n ´to jue m bo n flɛ wɔ tititi, yɛ fualɛ nga n fua kleli wɔ kɛ n ´yo like m ´man wɔ'n, n ´yiɛ i nuan cɛn kwlakwla.