Jue Mun 59 - NYANMIƐN NDƐ'N 1998

Min Nyanmiɛn, de min be nga be waan be ´kun min'n bé sa nun

1 Jue nga ti David liɛ. Ɔ o jue tofuɛ'm be su kpɛn'n i fluwa'm be nun wie. Jue'n bɔ be to i kɛ «Nán yaci i lɛ man ɔ saci like'n,» i wafa kunngba'n su yɛ be nian be fa to-ɔ. Ɔ kan blɛ bɔ Sail sunmannin sran kɛ be ko tran David i sua'n wun lɛ nan sɛ be nyɛn i-ɔ be `kun i'n i ndɛ.

¹ Jue nga ti David liɛ. Ɔ o jue tofuɛ'm be su kpɛn'n i fluwa'm be nun wie. Jue'n bɔ be to i kɛ «Nán yaci i lɛ man ɔ saci like'n,» i wafa kunngba'n su yɛ be nian be fa to-ɔ. Ɔ kan blɛ bɔ Sail sunmannin sran kɛ be ko tran David i sua'n wun lɛ nan sɛ be nyɛn i-ɔ be `kun i'n i ndɛ. I waan:

² Min Nyanmiɛn, de min min kpɔfuɛ'm bé sa nun, sasa min be bɔ be kunndɛ kɛ be yo min like'n be ti.

³ De min min nyrɛnnɛn klefuɛ'm bé sa nun, de min sran kunfuɛ sɔ'm be sa nun.

⁴ B'a sa min nyrun kɛ be ´kun min. Anannganman, sran kunfuɛ sɔ'm b'a cici min wun ndɛ kusu wuun m'an fɔn-man yɛ m'an yo-man sa.

⁵ M'an yo-man like fi, sanngɛ kpɛkuun be wanndi be ba min su, b'a sa cɛiin. Jaso! Bla mín wun wa nan nian.

⁶ Wɔ Anannganman, wɔ bɔ a sie mɛn wunmuan'n, bɔ a ti Izraɛlfuɛ'm be Nyanmiɛn'n, jaso! A nin be bɔ be si-man wɔ'n be `nyɛn i. Nán si gblɛfuɛ tɛ sɔ'm be wie fi be aunnvuɛ.

⁷ Nnɔsua kɛ a ´nian-an, be yɛ b'a ba ekun yɛ. Be bo kɛ alua sa, be bo sin yia klɔ'n.

⁸ Ndɛ tɛtɛ'm be kanlɛ'n cɛ yɛ ɔ o be nuan-an. Bé nuan'n ti kɛ kue sa. Be ko se kɛ: «?Wan li cɛ yɛ ɔ o lɛ b'ɔ kwla ti ndɛ nga e kan nin-ɔn?»

⁹ Sanngɛ wɔ, Anannganman srilɛ yɛ a sri be-ɔ. A yo sran sɔ'm bɔ be si-man wɔ'n be finfin.

¹⁰ Wɔ yɛ a man min wunmiɛn-ɔn, ɔ nyrun yɛ mín nyin ta-a. Wɔ Nyanmiɛn'n, wɔ yɛ a ti min fiawlɛ sua-a.

¹¹ Min Nyanmiɛn bɔ i klun ti ufue'n, ɔ ´wunnge min wun wa. Ɔ wa yo man kɛ min kpɔfuɛ'm be ´tɔ'n, n ´wun nun.

¹² Nán ka lɛ nunnun be, ɔ yo sɔ-ɔ min nvle'n nunfuɛ'm bé wla ´fi kɛ a kwla. Min Min, wɔ bɔ a ti kɛ e nyrɛn sa'n, yi wɔ fanngan'n i nglo, yo man be wlan sin vaa ngbɛn nan be tɔ.

¹³ Ndɛ kwlaa nga be kan'n, ɔ ti tɛ kpan, ɔ man be fɔn. Man be tɔ be bɔbɔ be tutre'n nun kɛ aya sa! Be klo amuɛn wualɛ nin gblɛ kpɛlɛ ngboko.

¹⁴ Fa ya nunkun be, nunnun be mlɔnmlɔnmlɔn, nán be ka lɛ. Kɛ ɔ fɛ i lele b'ɔ ´fa ju asiɛ'n i awieliɛ lɔ'n, man be si kɛ wɔ yɛ a sie Izraɛl mɛn nin-ɔn.

¹⁵ Nnɔsua kɛ a ´nian-an, be yɛ b'a ba ekun yɛ. Be bo kɛ alua sa, be bo sin yia klɔ'n.

¹⁶ Be wlan-wlan lika'n nun be ´kunndɛ like be ´di. Sɛ be ku a yi-man'n, kpɛkuun be su ijɔ.

¹⁷ M ´manman wɔ ɔ kwlalɛ bɔ a kwla'n ti. Nglɛmun kwlaa n ´to jue, n ´yi wɔ ayɛ ɔ klun-ufue'n ti, afin a ti kɛ min fiawlɛ sua sa. Kɛ nyrɛnnɛn tɔ min su'n, ɔ sin yɛ n fia-a.

¹⁸ Min wunmiɛn manfuɛ, m ´bo n flɛ wɔ, afin min Nyanmiɛn klun-ufuefuɛ, a ti kɛ min fiawlɛ sua sa.