Jue Mun 56 - NYANMIƐN NDƐ'N 1998

Sran kun bɔ be su kle i yalɛ'n, i Nyanmiɛn su lafilɛ

1 Jue nga ti David liɛ. Ɔ o jue tofuɛ'm be su kpɛn'n i fluwa'm be nun wie. Jue'n bɔ be to i kɛ «Auble mun bɔ be gua waka bɔ be o mmua lɔ'n bé su'n,» i wafa kunngba'n su yɛ be `nian be fa to-ɔ. Jue sɔ'n, ɔ kan Filistifuɛ'm be tralɛ bɔ be trali David Gat lɔ'n i ndɛ .

¹ Jue nga ti David liɛ. Ɔ o jue tofuɛ'm be su kpɛn'n i fluwa'm be nun wie. Jue'n bɔ be to i kɛ «Auble mun bɔ be gua waka bɔ be o mmua lɔ'n bé su'n,» i wafa kunngba'n su yɛ be `nian be fa to-ɔ. Jue sɔ'n, ɔ kan Filistifuɛ'm be tralɛ bɔ be trali David Gat lɔ'n i ndɛ . I waan:

² Ee Nyanmiɛn, yo min ye. Sran wie'm be su min su nin ndɛnngan'n. Cɛn kwlaa be nin min kun, be mian min sa fii.

³ Ee Nyanmiɛn, wɔ bɔ a o like kwlaa ti su'n, nian, cɛn kwlaa min kpɔfuɛ'm be su min su nin ndɛnngan'n. Be sɔnnin, be nin min kun.

⁴ Kɛ srɛ kun min'n, ɔ́ su yɛ n lafi-ɔ.

⁵ N ´la Nyanmiɛn ase i ndɛ'n ti, n lafi i su, ɔ man srɛ kun-man min. ?Nguɛ like bɔ cɛ yɛ klɔ sran kwla yo min-ɔn?

⁶ Cɛn kwlaa be kpɛ min ndɛ bɔ n kan'n bé wun, min wun akunndan tɛ yɛ be bu-ɔ.

⁷ Be cici min wun ndɛ, be di min sasabu. Kan kwlaa nga n ´kɔ'n, san be ´usa nun be ´ti nun, yɛlɛ kɛ be kunndɛ kɛ be ´kun min.

⁸ ?Sa tɛtɛ nga be ´yo be lɛ'n, nan be nyan bé ti? Ee Nyanmiɛn, fa bé wun ya nan yi be ase!

⁹ Nán ɔ wla fi min ngwlɛ nga n yi'n su. Sɔ min nyinmuɛn nzue'n ɔ sɛ'n nun nian. Sɛ m bua-man ato-ɔ, a sunnzunnin min nyinmuɛn sɔ'n a niannin.

¹⁰ Cɛn nga n ko kpan n ko flɛ wɔ'n, min kpɔfuɛ'm be ´cuɛn kɔ siɛn. N si kɛ Nyanmiɛn jin mín sin.

¹¹ N ´la Nyanmiɛn ase i ndɛ'n ti. Sakpa, n ´yo Anannganman kwla i ndɛ'n ti.

¹² N lafi Nyanmiɛn su, srɛ kun-man min. ?Nguɛ like bɔ cɛ yɛ klɔ sran'n kwla yo min-ɔn?

¹³ Fualɛ nga n fua kɛ n ´yo like wie m man wɔ'n, n ´fa asenna sraka n ´fa yiɛ i nuan.

¹⁴ Afin a deli min wie'n i nuan nun. Wɔ man m'an tu-man mɛn'n nun, ɔ man kɛ min nyin tɛ ɔ su'n, a nian min su, yɛ wɔ man min nyrun atin'n i su kpaja weiin.