Jue Mun 47 - NYANMIƐN NDƐ'N 1998

Amun `bo ndɛ be `manman Anannganman b'ɔ ti famiɛn dan'n

1 Jue nga ti Kɔre i sran'm be liɛ. Ɔ o jue tofuɛ'm be su kpɛn'n i fluwa'm be nun wie.

¹ Jue nga ti Kɔre i sran'm be liɛ. Ɔ o jue tofuɛ'm be su kpɛn'n i fluwa'm be nun wie. Be waan:

² Nvle nunfuɛ'm be kwlaa, amun `bo ndɛ, amun klun b'ɔ ti jɔwa'n ti'n, amun `bo sro nan amun `manman Nyanmiɛn.

³ Afin Anannganman b'ɔ sie mɛn wunmuan'n ɔ yo sro, i yɛ ɔ ti asiɛ'n su famiɛn dan nin-ɔn.

⁴ Ɔ kwlali nvle wie'm be nunfuɛ mun mannin ye, ɔ man e tiali mɛn wie'm be nunfuɛ'm be su.

⁵ Ɔ kpali e lika b'ɔ ti e aja like'n mannin ye. Lika sɔ'n, ɔ ti e bɔ e ti Zakɔb i nvle'n nunfuɛ bɔ Nyanmiɛn klo ye'n e anyrunnyan like .

⁶ Kɛ Nyanmiɛn ´fu oka'n kɔ'n, wuun be ´bo ndɛ be mɛnmɛn i, Anannganman ´kɔ wuun be ´bo awɛ'n.

⁷ Amun `to jue bo flɛ Nyanmiɛn, amun `to jue bo flɛ i. Amun `to jue bo flɛ e famiɛn'n, amun `to jue bo flɛ i.

⁸ Afin Nyanmiɛn ti asiɛ wunmuan'n su famiɛn. Amun `to jue fɛfɛ kpa kun be bo flɛ i.

⁹ Nyanmiɛn sie mɛn'n nunfuɛ'm be kwlaa, ɔ ti i famiɛn bia'n su.

¹⁰ Nvle'm bé su famiɛn'm be nin Abraam i Nyanmiɛn'n i nvle nunfuɛ'm be kan bo nun. Famiɛn mun bɔ be yɛ be sasa asiɛ'n be o Nyanmiɛn sa nun. Nyanmiɛn o like kwlaa ti su.