Zɔb I Nyrɛnnɛn Wunlɛ 8 - NYANMIƐN NDƐ'N 1998

Bildad i ndɛ klikli b'ɔ kannin be'n

¹ Bildad b'ɔ fin Siak'n waan:

² ?A ko yaci-man ndɛ nga'm be kanlɛ? Ɔ nuan nun ndɛ'n ɔ ti kɛ aunngban dan yɛ ɔ su fita sa.

³ ?A bu i kɛ wuun Nyanmiɛn ɔ'a kpɛ ndɛ bulɛ'n i wun? ?Nyanmiɛn b'ɔ kwla like kwlaa yo'n ɔ kpɛ nanwlɛ dilɛ'n i wun-ɔn ɔ yo ye?

⁴ Sɛ ɔ mma'm be yoli i sa'n, i nuan like yɛ ɔ fa mannin be-ɔ.

⁵ Ɔ liɛ'n, sɛ a fa ɔ wun mantan Nyanmiɛn'n, sɛ a kpata Nyanmiɛn b'ɔ kwla like kwlaa yo'n,

⁶ sɛ a yo sɛsɛ'n, sɛ b'a wun-man sa ɔ wun'n, Ɔ su sisi-mɛn i bo, ɔ ´nian wɔ lika, ɔ ´fa wɔ sie ɔ osu laa'n nun.

⁷ Wafa nga a fa ti laa'n, ɔ su ju-man siɛn liɛ'n i nun mlɔnmlɔn.

*

⁸ Usa é si mun nian, yɛ bu sa nga be nannan'm be wunnin i'n i akunndan.

⁹ Afin be flɛ kɛ anunman yɛ be wuli ye-ɔ, e si-man sa. E sran mun e nguan'n ɔ sin ndɛndɛ kɛ fɔnvɔ sa.

¹⁰ Be liɛ'n be ´wun wie be ´kan kle wɔ. Afin be si sa mun, ɔ o be klun lɔ. Be wa se wɔ kɛ yo:

¹¹ «Lika nga fɔkɔ nun-man lɛ'n, mlɔwa nnya kwla fifi-man lɛ. San lika flɔlɔ nun yɛ ndɛma'n ɔ bua-a.

¹² Sɛ ɔ tɛ yo nɔnman'n, yɛ sɛ be nian kpɛ-man bɔbɔ'n, sanngɛ sɛ nzue wie i bo'n, a ´nian-an, ɔ'a san ijre nga'm bé wun ɔ'a wu.»

*

¹³ Be bɔ bé wla fi Nyanmiɛn'n, kɛ be agualiɛ'n ɔ ti sɔ-ɔ. Be nga be kaci bé sin si Nyanmiɛn'n, be lɛ-man like fi bɔ be fa bé wla gua su-ɔ.

¹⁴ Bé wun su bɔ be lafi'n, bɔ be bu i kɛ like su nyan-man be'n, i kwlaa sɔ'n ɔ'a yo ngbɛn siɛn'n. Be fiawlɛ bɔ be waan b'a nyɛn i'n, ɔ ti kɛ akɛndɛwa sua sa.

¹⁵ Kɛ be waan be ´kisa bé sua'n su'n, kpɛkuun ɔ su keje. Kɛ be waan be ´tra nun'n, kpɛkuun ɔ'a bubu ɔ'a gua.

¹⁶ Be ti kɛ waka b'ɔ lɛ wunmiɛn kpa b'ɔ jin wia kpa'n nun, bɔ ɔ'a trɛ lele ɔ'a kata fie wunmuan'n su'n sa.

¹⁷ I bo olui'm be to blabla nun, yɛ be to blabla yɛbuɛ mun, be wlu yɛbuɛ sɔ'm be nun bɔbɔ.

¹⁸ Sanngɛ sɛ be tu i bo lika ng'ɔ taka lɛ nun'n, sɛ lika sɔ'n ɔ ti sran'n, wuun ɔ ´se i kɛ: « N nian wun-man wɔ le.»

¹⁹ Nian! Kɛ sran sɔ'm be agualiɛ liɛ'n ɔ gua be kɛ ng'ɔ o lɛ'n sa. Waka uflɛ yɛ ɔ wa fifi be takawlɛ'n nun-ɔn.

²⁰ Nyanmiɛn yi-man sran bɔ be wun-man sa be wun'n be blo le. Ɔ uka-man sa tɛ yofuɛ mun.

²¹ Cɛn kun ɔ wa yo man a ´sri lele tra su. Yɛ ɔ man ɔ klun ´jɔ lele kpe nun.

²² Nyannzuɛn dan kpa ɔ ´kun be bɔ be kpɔ wɔ'n. Kɛ ɔ ´yo sɔ'n, wuun sa tɛ yofuɛ'm b'a jaso lɛ.