Zɔb I Nyrɛnnɛn Wunlɛ 7 - NYANMIƐN NDƐ'N 1998

Zɔb i Elifaz i su tɛlɛ'n i ndɛ'n wie ekun yɛ: ɔ kɛn i ndɛ'n kle Nyanmiɛn

¹ Sran i nguan'n ɔ ti kɛ sonja'm be nguan'n sa, yɛ ɔ ti kɛ kpa difuɛ'm be nguan'n sa.

² Kɛ kanga'n ko yo nan ɔ'a nyan fɔnvɔ ɔ'a tran nun'n yɛ man ɔ miɛn i yo ng'ɔ yo nin-ɔn. Kpa difuɛ'n i akatua'n i nyanlɛ'n ti yɛ man ɔ miɛn i nyin di junman nin-ɔn.

³ N kusu n liɛ'n, nyrɛnnɛn'n yɛ n wun i anglo kwlaa nun-ɔn, ɔ ti min aja. Fɛlɛ'n yɛ n fɛ kɔnguɛ kwlaa-a.

⁴ Kɛ n ko la'n, ndɛ nga n kan'n yɛ: «?Cɛn onin nan aliɛ'n ɔ'a cɛn nan m'an jaso?» Lele nan aliɛ'n ɔ'a cɛn'n, n kacikaci mín wun bɛ'n su n si-man wie se kun.

⁵ Min wunnɛn wunmuan'n ɔ ti kakaa mma nin buibui ngunmin. Ɔ ti kannin kannin ngunmin. Kannin sɔ'm be bu nzue sa puu puu!

⁶ Min nguan'n yɛ ɔ'a wie ndɛndɛ yɛ. Ɔ ti kɛ tannin wufuɛ'n i kloklo'n b'ɔ sin flafla'n sa. Mín cɛn'n i nuan bɔ be kleli'n yɛ ɔ'a ju yɛ, ɔ lɛ-man yowlɛ kun!

*

⁷ Ee Nyanmiɛn, ɔ bɔbɔ a si kɛ min nguan'n ti kɛ aunngban sa. N su nyan-man alaje kun le.

⁸ Wɔ bɔ a nian min su'n, a su wun-man min kun. Kɛ a ´nian-an, m'an tu anunman.

⁹ Kɛ nyanmiɛn ble'n ɔ fa nunnun nglo lɔ bɔ be wun-mɛn i kun'n, i kunngba nin-ɔn, be kɔ blɔlɔ-ɔ be ba-man kun.

¹⁰ Sran ng'ɔ kɔ sɔ'n, ɔ sɛ-mɛn i sin ɔ wa trɛn-mɛn i awlo'n nun kun. Lika ng'ɔ o lɛ laa'n, sɛ ɔ ti sran'n, wuun n ´se kɛ ɔ su wun-mɛn i min'n kun.

¹¹ I sɔ'n ti, m muan mín nuan-an ɔ yo-man ye. Min akunndan'n ɔ'a sanngan: n ´kan min klun ndɛ. Klunngbɔ o min klun: n ´ijɔ.

¹² ?Jenvie yɛlɛ min annzɛ Dragɔn yɛlɛ min bɔ i ti yɛ a yo man be sasa min kɛ nga sa-a?

¹³ Min waan sɛ n la-a, min afɛ'n ɔ ´yo sɔsɔ nan min wla'n ɔ ´gua ase kan.

¹⁴ Kpɛkuun a fa laliɛ cɛnlɛ wlanwlan min. Yɛ ninnge nga a fa sinsin mín nyin su'n be yo sro.

¹⁵ Sɛ be bo min kɔmin bɔbɔ-ɔ, ɔ flunman. Wie'n ɔ flunman tra owie nyɛnnglɛɛn nga m'an ka yɛ'n.

¹⁶ Nguan ɔ'a flan min! N su ka-man nguan nun sa tititi. Yaci min diin, m'an fɛ ngbɛn asiɛ'n su.

*

¹⁷ ?Sran ti nguɛ bɔ i ti yɛ man i ndɛ ti wɔ cinnjin sɔ-ɔ? ?Ɔ ti nguɛ bɔ i ti yɛ man i ndɛ ko mian wɔ sɔ-ɔ?

¹⁸ ?Ɔ ti nguɛ bɔ i ti yɛ man nglɛmun kwlaa a niɛn i osu sɔ-ɔ? ?Ɔ ti nguɛ bɔ i ti yɛ man a sɛ i nian titi sɔ-ɔ?

¹⁹ Cɛn onin ko yɛ a ´yi ɔ́ nyin min su-ɔ? Cɛn onin ko yɛ a ´yaci min nun m ´mɛn min nuan nzue-ɔ?

²⁰ Wɔ yɛ a nian sran'm be su-ɔ, sɛ n yoli wɔ sa kan'n, kle min sa sɔ'n. ?Nguɛ ti yɛ a tu ɔ nyin wɔ min sɔ-ɔ? Sɛ m'an flan wɔ-ɔ, kan.

²¹ ?Ɔ yo sɛ ti yɛ a yaci-man min wun sa'n cɛ-man min-ɔn? ?Ɔ yo sɛ ti yɛ ɔ́ wla fi-man min fɔnlɛ'n su-ɔ? Min yɛ m'an wie wu yɛ n la ndutre'n nun yɛ. Kɛ a wa ba min kunndɛlɛ'n, a su wun-man min kun.