Zɔb I Nyrɛnnɛn Wunlɛ 32 - NYANMIƐN NDƐ'N 1998

ELII I NDƐ B'Ɔ KANNIN'N ( 32—37 )

¹ Yasua nsan'm b'a tɛ-man Zɔb su kun. Afin i waan kɛ ɔ niɛn i wun siin'n, ɔ ti sɛsɛ.

² Yɛ Barakeɛl i wa Elii b'ɔ fin Biz akpasua'n su'n, ɔ ´fa ya Zɔb wun-ɔn. Elii sɔ'n ɔ fin Ram osu'n nun. Sa ti b'ɔ fali ya'n, yɛlɛ kɛ Zɔb jran sili i we'n nun seli kɛ ɔ ti sɛsɛ Nyanmiɛn nyrun.

³ Ɔ fali ya Zɔb i janvuɛ nsan'm be wun wie. Sa ti'n, yɛlɛ kɛ b'a nyan-man ndɛ nanwlɛ kun b'a tɛ-man Zɔb su. Sanngɛ ɔ nin i sɔ ngba'n, b'a bu ndɛ'n b'a yi Zɔb su.

⁴ Kɛ be nin Zɔb be ´kan'n, Elii ti lɛ. Afin ɔ wun kɛ be kpɛnngbɛn trɛ i.

⁵ Kɛ ɔ ´nian bɔ be sran nsan'm be wun-man ndɛ nga be fa tɛ Zɔb su kun'n, yɛ ɔ plannin-ɔn.

Sa bɔ man Elii wlɛli i nuan ndɛ'n nun'n yɛ:

⁶ Barakeɛl i wa Elii b'ɔ fin Biz waan: N ti bakan, amún ti ɔ'a bo je. I sɔ'n ti srɛ kun min. N wun-man like nga n ko yo nan m'an kan sa nga n si i'n m'an kle amun-ɔn.

⁷ N seli n klun lɔ kɛ: «Kpɛnngbɛn'm be ´wun ndɛ'n i kanwlɛ. Yɛ kɛ bɔ be afuɛ'n ɔ'a ɔ i nyrun lɔun'n ti, be ´tike ngwlɛlɛ'n i nyin kle ye.»

⁸ Kannzu nanwlɛ, Nyanmiɛn b'ɔ kwla like kwlaa yo'n i Wawɛ'n yɛ man sran kun si ngwlɛlɛ-ɔ.

⁹ Ngwlɛlɛ'n ɔ fin-man cɛlɛ bɔ sran cɛ'n. Je bolɛ'n, ɔ kle-man kɛ be si sa ng'ɔ ti i su'n.

¹⁰ I sɔ'n ti, amun `sie amun su man n kan n liɛ nga n wun i'n.

*

¹¹ Kɛ amun ´kan amun ndɛ mun'n, n ti lɛ n ti be. Yɛ n su minndɛ. Min waan wuun amun ´yiyi ndɛ'n nun lele ´guɛ lɔ.

¹² I sɔ'n ti n sieli min su kpa kɛ ɔ fata'n sa. Sanngɛ amun wie fi i nuan'n ɔ'a kwla-man Zɔb. Amun wie fi ɔ'a wun-mɛn i su tɛwlɛ.

¹³ Nán amun se kɛ: «Sran nin i be kan-an ɔ su kpɛ-man. Nyanmiɛn yɛ ɔ nin i kan-an ɔ ´kpɛ-ɔ.» Nán i sɔ selɛ'n yɛ ɔ ti i atin nin-ɔn.

¹⁴ Nán min yɛ Zɔb kan ndɛ'n mannin min-ɔn. I ti n su nian-man amun ndɛ liɛ'n su yɛ n ´tɛ i su-ɔ.

*

¹⁵ Srɛ'n ɔ'a kun be kpo, b'a muan bé nuan sɔ bliin. Be nyan-man ndɛ be kɛn-mɛn i kun.

¹⁶ M'an minndɛ lele bɔ be ijɔ-man kun'n, bɔ be tilɛ be lɛ-man wie be kɛn-mɛn i kun'n,

¹⁷ n kusu n ´kan wie, n ´kan nga n wun i'n.

¹⁸ Ndɛ sunman o min klun. Mín wun blibli min, min waan n ´ijɔ.

¹⁹ Ndɛ'n, ɔ wun min klun lɔ kɛ kplo uflɛ bɔ nzan o nun nan b'a kɛtɛ i ti kpan nan ɔ su wa kpuke'n sa.

²⁰ Man n kan wie nan min wun sanndi min. Man n tike mín nuan n tɛ ndɛ sɔ'm be su wie.

²¹ Nán sran sin yɛ n ´jran-an. N su laka-man sran fi.

²² N si-man sran laka. Yɛ sɛ n yo i sɔ bɔbɔ-ɔ, Nyanmiɛn b'ɔ yili min'n, ɔ ´ka lɛ ´fa min.