Zɔb I Nyrɛnnɛn Wunlɛ 31 - NYANMIƐN NDƐ'N 1998

Zɔb i ndɛ kasiɛn'n: Zɔb waan kɛ ɔ ´kɔ Nyanmiɛn nyrun'n, i kɔmin'n jin su

¹ N tali nda kɛ n fa-man min nyinma n kpɛ-man talua wie kannglɛ.

² ?Sɛ ɔ'a yo-man sɔ-ɔ, nguɛ sa cɛ yɛ n kwla sunnzun kɛ Nyanmiɛn b'ɔ kwla like kwlaa yo'n b'ɔ o nglo lɔ'n ɔ yo man min-ɔn?

³ Nyrɛnnɛn'n nin sran kunfuɛ mun yɛ ɔ fata-a. Afɛ'n nin sa tɛ yofuɛ mun yɛ ɔ fata-a.

⁴ ?Yɛ wuun Nyanmiɛn'n wun-man kɛ n fa nanti'n? ?N ja nga n tu'n, nán i yɛ ɔ si bé nuan-an?

*

⁵ Sɛ n di-man nanwlɛ mlɔnmlɔn, nan ndrunmun cɛ yɛ ɔ yo min fɛ yɛ n di'n,

⁶ man Nyanmiɛn fa toe nga ɔ ti sɛsɛ'n, ɔ fa sunnzun min. I bɔbɔ ɔ wa si kɛ n ti sein.

⁷ Sɛ m'an fa-man atin'n su sein, sɛ n fali min nyin m bloli like wie su, sɛ n kannin fiɛn wie,

⁸ sɛ n ta like'n, man n wiengu uflɛ di. Man be tu min fie'n nun ninnge bɔ be ´fifi'm bé bo.

*

⁹ Sɛ bla wie kunndɛlɛ akunndan kpɛnnin min klun'n, sɛ n sali min wiengu wie anuan nun'n,

¹⁰ man mín yi'n ɔ di sran uflɛ junman. Man sran uflɛ'm be nin i be la.

¹¹ Afin i sɔ sa'n ɔ ti tete. Ɔ ti sa kun bɔ jɔlɛ difuɛ'm be yaci cɛ-man .

¹² Wuun ɔ ti sin yɛ m'an sɔ i nuan-an. Sin sɔ'n, ɔ ´di min mlɔnmlɔn. Ɔ ´di ninnge nga n nyɛnnin i'n i kwlaa.

*

¹³ ?Sɛ n di min sufuɛ yasua wie annzɛ min sufuɛ bla wie i lufle'n, sɛ ɔ fɛ i sɔ sa'n ɔ sie min nyrun nan m'an yo-man ng'ɔ ti su'n m'an mɛn-mɛn i'n,

¹⁴ cɛn nga Nyanmiɛn ´jaso kɛ ɔ ´bu min fɔ'n, n ´yo i sɛ? ?Sɛ ɔ usa-usa min nun'n, n ´tɛ i su sɛ?

¹⁵ ?Nyanmiɛn b'ɔ man be wunnzɛli min bɔ be wuli min'n, nán i kunngba'n yɛ man be wunnzɛli be yɛ be wuli be kɛ min sa-a? ?Ɔ'a siesie-man be bé nin klun kɛ min sa ?

*

¹⁶ ?Kɛ yalɛfuɛ'm be srɛ min like m'an yo be anwɛn le? ?Angboti bla wie ɔ'a minndɛ min like wie ti lele ɔ'a fɛ ngbɛn le?

¹⁷ ?N kunngba m'an tran aliɛ su m'an di m'an kpɛ aika ba le?

¹⁸ Min aika ba talɛ'n, n fa fin min gbanflɛn nun. Yɛ min angboti bla lika nianlɛ'n, n fa fin mín nin klun.

¹⁹ Sɛ n wunnin sran nga i wun ti kplɛn annzɛ yalɛfuɛ wie, sɛ m'an man-man be kondro b'a kata-man bé wun'n,

²⁰ sɛ m'an man-man be min bua ndrɛ tralɛ'n wie kɛ be wla nan b'a la-man min ase le'n,

²¹ sɛ jɔlɛ diwlɛ lɔ'n, n jasoli aika wie wun kɛ n ´nian bɔ jɔlɛ difuɛ'm be ´jran min sin'n ti'n,

²² man mín sa'n ɔ kpa min wun tɔ. Man mín sa'n bu i afiɛn sɛsɛ tɔ.

²³ Afin Nyanmiɛn ti famiɛn. N su kwla suɛn-mɛn i fɔ b'ɔ fa tu sran'n i bo .

*

²⁴ ?N fali mín wla'n n guɛli i sika ɔkwlɛ'n su? ?N seli sika ɔkwlɛ'n i kɛ: «Min sasafuɛ'n yɛlɛ wɔ?»

²⁵ Ninnge kpakpa kpanngban annzɛ ninnge wafa-wafa nga n nyannin be'n, nán be ti yɛ n klun'n ɔ jɔli-ɔ.

²⁶ Kɛ n ´wun kɛ wia'n ɔ kpaja klanman'n, annzɛ kɛ n ´wun kɛ anglo'n i nantilɛ'n ɔ yo nyɛnmɛn'n,

²⁷ sɛ i ti be sɔlɛ akunndan kpɛnnin min klun'n, sɛ n fali be n yoli min amuɛn n sɔli be'n,

²⁸ nán sa bɔ jɔlɛ difuɛ'm be yaci cɛ min'n yɛ ɔ o lɛ-ɔ. Afin ɔ kle kɛ m'an kaci mín sin m'an si Nyanmiɛn b'ɔ o nglo lɔ'n.

*

²⁹ ?Kɛ sa tɔ min kpɔfuɛ'n i su'n, kɛ nyrɛnnɛn sa ɔ nyɛn i'n, n klun jɔ?

³⁰ ?Mín nuan nga nun, m boli i sannzan kɛ ɔ wu?

³¹ Be nga e nin be tran'n be si kɛ sran nga ɔ'a di-man nnɛn nga n fa man'n i wie'n, ɔ nun-man lɛ.

³² N yaci-man aofuɛ'n lɛ ɔ la-man gua su. N sike lika kɔfuɛ mun.

*

³³ ?N katali min sa tɛ'm be su kɛ sran sunman be yo'n sa? ?N fali min fɔnlɛ mun n fiali

³⁴ kɛ ɔ ´yo nan nzrafuɛ'm b'a ti-man'n ti, annzɛ kɛ ɔ ´yo nan sran'm b'a yo-man min finfin'n ti? ?M muannin mín nuan? ?M'an fite-man gua su?

*

³⁵ ?N ´nyan waan yɛ ɔ ´fɛ i su sie min nuan bo-ɔ? N kannin min ndɛ kasiɛn'n, min waan Nyanmiɛn b'ɔ kwla like kwlaa yo'n, `tɛ min su. Sa nga bɔ min kpɔfuɛ'n ɔ klɛli i mín wun'n,

³⁶ n ´fa sie min wati su. N ´fa yo mín kle klanman n ´fa wla min ti.

³⁷ N ´kan ajalɛ kwlaa nga n tuli'n i nun ndɛ n ´kle Nyanmiɛn. Kɛ n ´kɔ i nyrun'n, n ´nanti kpa kɛ famiɛn ba wie sa.

*

³⁸ Man e se kɛ min fie'n ɔ ti sran. Sɛ mín fie sɔ'n i su lɔ asiɛ'n ɔ ijɔli min cɛn kun sa'n, sɛ i su kofie'm be sun guali min wun cɛn kun sa'n,

³⁹ sɛ n dili i su ninnge ngbɛn'n, sɛ m'an fa-man sika m'an wla-man nun'n, sɛ m'an bu-man asiɛ'n i fuɛ nga be fa mannin min'n be sran cɛ'n,

⁴⁰ man ble nga n gua'n, ɔ yaci fifi owie, yɛ man ɔrz nga n gua'n, ɔ yaci fifi awie ijre. Zɔb i nuan'n i tɔwlɛ'n yɛ ɔ o lɛ-ɔ.