Zɔb I Nyrɛnnɛn Wunlɛ 26 - NYANMIƐN NDƐ'N 1998

Zɔb i Bildad i su tɛlɛ

¹ Zɔb tɛli i su kɛ:

² Nja moo! A si sran b'ɔ lɛ-man fanngan kun'n i uka klanman! A si sran nga afɛ'n ɔ'a ti i'n i de sakpa!

³ A si sran ng'ɔ si-man ngwlɛlɛ'n i afɔtuɛ man dan! A si ɔ ndɛ'm be siesie klanman!

⁴ ?Ndɛ kpa nga a kan'n, wan yɛ a kan mɛn i-ɔ? ?Wan li yɛ ɔ fa ndɛ sɔ'n wla ɔ́ nuan bɔ a kan nin-ɔn?

Nyanmiɛn kwla like kwlaa yo

⁵ Be bɔ b'a sin wie'n nun'n, be usu jenvie'n i bo lɔ. Be o jenvie nun ninnge'm bé bo lɔ.

⁶ Afin Nyanmiɛn wun blɔlɔ lɔ weiin. Like fi kata-man kunman dan bɔ be si-mɛn i bo'n su b'ɔ man ɔ wun-man lɔ-ɔ.

⁷ Ɔ fa nglo lɔ lika'n ɔ fa sie i lɛ sa ngbɛn. Ɔ fa asiɛ'n ɔ fa sende i lɛ sa ngbɛn.

⁸ Ɔ fa nzue'n wlɛ i nyanmiɛn ble'n i klun. Kɛ nyanmiɛn ble'n wo lɛ'n yɛ ɔ wo-ɔ, ɔ kpuke tɔ-man.

⁹ Ɔ fa like kata i famiɛn bia'n i nyin, nyanmiɛn ble'n yɛ ɔ fa kɛtɛ i nyin-ɔn.

*

¹⁰ Ɔ ja awɛ klukluklu bo sin yia jenvie'n kan lika weiin'n nin aosin'n be yia lɛ'n.

¹¹ Kɛ ɔ kpan sa fiaan! Sɛ e ´kwla se'n, kuatrɛn nga be lɛ nglo lɔ lika'n nun'n, be nuan bo bé wun yɛ be usu tututu.

¹² Nyanmiɛn i kwlalɛ b'ɔ kwla'n i dan'n ti ɔ kwlali jenvie'n. Ɔ fɛli i ngwlɛlɛ'n fufuli Raab nun.

¹³ Kɛ i nuan nun aunngban'n fita sa'n, nyanmiɛn'n su yo sɔ weiin! Ɔ wɔli wuo b'ɔ su wanndi'n i like boli nun i bue kun lɔ .

¹⁴ Nga ti sa ng'ɔ yo be'n be bue kaan sa. Be nganniɛn nga e ti i wa'n, e ti-mɛn i kpa bɔ ngbɛn. ?Yɛ i sa sroesroe ng'ɔ yo'n, e suɛn i bo sɛ yɛ ɔ yo ye-ɔ?