Zɔb I Nyrɛnnɛn Wunlɛ 20 - NYANMIƐN NDƐ'N 1998

Zɔfar i ndɛ nsan su b'ɔ kannin'n: sran ng'ɔ bu-man Nyanmiɛn like fi'n i su nyrɛnnɛn sa mun

¹ Zɔfar b'ɔ fin Naama'n, ɔ kannin wie ekun, i waan:

² Ɔ ndɛ nga a kan'n, ɔ kle min akunndan'n i yalɛ, i ti ɔ fata kɛ n tɛ wɔ su. N jran-an ɔ jran-man.

³ Ndɛ nga a kan man min'n, ɔ sɔn-man min klun. Kɛ m buli akunndan lele'n, m'an wun sa nga n ´fa tɛ wɔ su'n.

⁴ ?A si-man kɛ, kɛ ɔ fin cɛn bɔ Nyanmiɛn fali sran sieli i asiɛ'n su'n,

⁵ sran ng'ɔ bu-man Nyanmiɛn like fi'n, i anyrunnyan'n ɔ kɔ-man mmua, i aklunjuɛ'n cɛ-man? ?Yɛ a si-man ekun kɛ sran nga i nyin yi-man Nyanmiɛn'n, i klun jɔ-man kɔ-man mmua ?

*

⁶ Sɛ bɔ ɔ nyin to nyanmiɛn'n, sɛ i ti'n ɔ to nyanmiɛn ble'n bɔbɔ'n,

⁷ i awieliɛ'n ɔ ´wie i kɛ i bɔbɔ i sewie'n sa. Kpɛkuun be nga be si i laa'n, be ´usa kɛ: «?Ɔ o nin li?»

⁸ Ɔ ´sin kɛ laliɛ bɔ be cɛn'n sa, be su wun-mɛn i kun. Ɔ ´mlin-mlin kɛ aolia nun like bɔ be wun i kɔnguɛ'n sa.

⁹ Sran ng'ɔ wunnin sran sɔ'n i laa'n, ɔ su wun-mɛn i kun. Lika ng'ɔ tran lɛ'n, be su wun-mɛn i lɛ kun.

*

¹⁰ Yalɛfuɛ'm be ´kpɛ sin yiɛ i mma mun. Be ´mian be fii. Bé si ɔ yi like nga ɔ fɛli i yalɛfuɛ sɔ'm bé sa nun. Afin like sɔ mun yɛ ɔ fa nyɛnnin i wun-ɔn.

¹¹ I sa nin i ja mun bɔ be ti kpinndin-kpinndin kɛ gbanflɛn'm be liɛ'n sa'n, be nin i yɛ be ´ko la ndutre'n nun-ɔn.

*

¹² Sa tɛ'n i yolɛ'n ɔ yo i fɛ kɛ like b'ɔ yo be nuan nun fɛ'n sa. Ɔ fa fiɛ i taaman'n bo.

¹³ I waan ɔ yi-mɛn i ase mlɔnmlɔn, kɛ ɔ ´yo nan i fɛ'n ɔ'a kɛ i nuan nun lɛ'n ti.

¹⁴ Kusu aliɛ ng'ɔ dili b'ɔ o i klun lɔ'n ɔ ´saci, ɔ ´yo i klun lɔ kɛ ɔnda bɔyre sa.

¹⁵ Yalɛfuɛ'm be ninnge kpakpa ng'ɔ fɛli i be sa nun'n, ɔ ´fi be gua. Nyanmiɛn ɔ ´yi be i klun lɔ ´fite.

¹⁶ Kannzu ɔnda bɔyre yɛ ɔ nɔnnin-ɔn, ɔnda taaman'n ɔ ´kun i kusu.

*

¹⁷ Awɛma nzue nin nɔnnɔn nga be sonji gblogblo kɛ nzue ba sa'n, ɔ su wun-man be kun.

¹⁸ I junman'n i nuan like ng'ɔ nyɛn i'n, ɔ ´fa man sran mun. I nuan su kɛn-mɛn i. Ɔ su di-mɛn i mmlusuɛ'n i ti aklunjuɛ.

¹⁹ Afin kɛ ɔ miannin yalɛfuɛ mun ɔ deli be ninnge mun, ɔ'a nian-man be lika. Kɛ ɔ `kplan sua man be'n, ɔ'a yo-mɛn i sɔ, sanngɛ ɔ deli be liɛ mun.

²⁰ I konvi'n ɔ ti tɛ dan. Ɔ man i anwlɛn su ninnge'n kwlaa ɔ ´fi i sa.

²¹ I konvi tɛ'n ti ɔ wun like-ɔ ɔ yaci-mɛn i lɛ. I sɔ'n ti muae b'ɔ lɛ i'n ɔ su cɛ-man.

*

²² Ɔ ´nyan ninnge sunman ´sin yiɛ i, kpɛkuun sa ´tɔ i su. Nyrɛnnɛn sa'm be ´kan bo nun be ´guɛ i su.

²³ Kɛ ɔ ´di like'n, wuun Nyanmiɛn i ya'n ɔ'a jaso i wun. Ɔ man nyrɛnnɛn'n ɔ ´tɔ i su kɛ nzue yɛ ɔ su tɔ sa .

²⁴ Sɛ i waan ɔ ´wanndi blalɛ bɔ be ti alɛ ninnge mun be nyrun'n, aaba cua ɔ ´wɔ i, kpɛkuun ɔ ´bo nun i bue kun lɔ.

²⁵ Ɔ ´cuɛn cua bɔ ɔ'a bo nun i wia sin lɔ'n, yɛ ɔ ´cuɛn cua bɔ ɔ'a bo i afɔkɔ'n nun'n kusu, kpɛkuun bé ja nun lɛ ninnge sroesroe wie mun be ´tɔ i su.

*

²⁶ Sa kekle wafa'n kwlaa be ´tɔ i sa nun ninnge'm be su. Sin wie bɔ nán sran yɛ ɔ sɔli i nuan'n, ɔ ´kun i bɔbɔ'n, yɛ ninnge ng'ɔ kali i sua'n nun'n kwlakwla, sin sɔ'n, ɔ ´yra be.

²⁷ Nyanmiɛn su lɔ ninnge'm be ´yi i sa tɛ'n i nglo. Asiɛ'n kusu nin i be ´nyɛn i.

²⁸ Nyanmiɛn i ya cɛn'n nun'n, nzue dan wie ɔ wa fɛ i bo ninnge mun ´kɔ.

²⁹ Like nga Nyanmiɛn sie i lɛ fa sie sran nga be bu-mɛn i like fi'n yɛ ɔ o lɛ-ɔ. Sa nga Nyanmiɛn siesie man be'n yɛ ɔ o lɛ-ɔ.