Zɔb I Nyrɛnnɛn Wunlɛ 10 - NYANMIƐN NDƐ'N 1998

Zɔb i Bildad i su tɛlɛ'n i wie ekun yɛ: i waan Nyanmiɛn yili i bɔbɔ Zɔb kɛ ɔ ´saci i

¹ Nguan'n i nun tranlɛ ɔ'a flan min! I ti sa ng'ɔ yo-man min fɛ'n, n ´kan. Klunngbɔ ng'ɔ o min klun lɔ'n ti, m muan-man min nuan.

² N ´se Nyanmiɛn kɛ: nán bu min fɔ! Sa nga a wunnin i mín wun'n, kan man n ti.

³ ?I kpa'n, kɛ a kle min yalɛ'n, bɔ a yo min bɔ n ti ɔ́ sa nuan like'n min finfin'n, bɔ man sa nga sran nga be bu-man wɔ like fi'n be siesie'n i nuan yia'n, fɛ li yɛ ɔ yo wɔ-ɔ?

⁴ ?I kpa'n, like nga sran wun i'n yɛ a wun i-ɔ? ?Ɔ sa wlɛ wunlɛ'n ɔ ti kɛ sran'm be liɛ'n sa?

⁵ ?Ɔ nguan'n ɔ ti tika kɛ sran'm be liɛ'n sa? ?Afuɛ nga a di'n, ɔ ti kaan kɛ sran'm be liɛ'n sa?

⁶ ?Ɔ yo sɛ ti cɛ yɛ man ɔ waan san a ´kunndɛ sa nga n yoli nin-ɔn? ?Ɔ yo sɛ ti cɛ yɛ man ɔ waan san a ´wun sa min wun nin-ɔn?

⁷ Kusu wuun a si jrɛiin kɛ m'an yo-man sa, yɛ a si kɛ sran fi kwla de-man min ɔ́ sa nun.

⁸ ?Ɔ sa'n bɔ a fa siesieli min bɔ a fa yili min'n, be kunngba'n yɛ a su wa fa saci min-ɔn?

⁹ Ɔ bɔbɔ a si kɛ a fali fa yɛ a fa yili min kɛ be fa wu sɛ'n sa-a. Nán man ɔ́ wla fi su. ?Siɛn'n, a su yo nan n kaci ndutre ekun?

¹⁰ Kɛ be fa nɔnnɔn'n be guɛ i kpongbo'n i bo lɔ b'ɔ kaci fromaz'n, i wafa kunngba'n yɛ a fa yoli min-ɔn.

¹¹ Kpɛkuun a mannin min wunnɛn, yɛ a fali kplo katali su. A fali owie mun nin ndin mun wlawlali min wunnɛn'n nun.

¹² Kpɛkuun a yoli min ye: a mannin min nguan. Yɛ a yoli nga a ko yo nan nguan sɔ'n ɔ'a fi-man mín sa'n.

*

¹³ Sanngɛ kpɛkuun a fa sa kun a fiali mín wun. N si ɔ klun lɔ sa sɔ'n:

¹⁴ ɔ waan a ´nian min nan sɛ n ´yo sa tɛ o. Yɛ ɔ waan sa tɛ kwlaa wie ala bɔ n yo'n, a ´nian su a ´bu min fɔ.

¹⁵ I ti'n, sɛ n yo sa'n, ɔ ti kekle man min. Sɛ kannzɛ m'an yo-man sa'n, n lɛ-man atin bɔ m ´man mín ti'n su-ɔ. M'an wun nyannzuɛn sa mlɔnmlɔnmlɔn! Nyrɛnnɛn ng'ɔ o min su'n, be flɛ-mɛn i nyrɛnnɛn.

¹⁶ Sɛ m man min ti'n su kaan sa'n, wuun a su min su, a fuan min kɛ asɔmɔli su fuan like wie sa. Kpɛkuun a fa sa uflɛ mun yi min su ekun.

¹⁷ A jin min su nin min yalɛ klelɛ'n sa tititi. Ya nga a fɛ i mín wun'n, i nyrun yɛ ɔ kɔ-ɔ. Kɛ min yalɛ klefuɛ klikli'm be ´fɛ'n, wuun uflɛ'm be ´sin be osu sa tititi.

¹⁸ ?Ɔ yo sɛ ti yɛ wɔ man n fin min nin klun n fiteli-ɔ? Sɛ ɔ ti kɛ n wuli lɔ'n, i liɛ'n, wuun sran fi ɔ'a wun-man min,

¹⁹ wuun n yoli kɛ sran bɔ w'a yi-mɛn i le'n sa, wuun kɛ n fin min nin klun lɔ n fiteli'n be fali min wɔli asieliɛ trelele.

²⁰ Blɛ nga n tɛ di'n, ɔ'a wie a wie. Yaci min diin! Cuɛn ɔ́ wun man n di alaje kan

²¹ ka nan m'an ɔ kan be kɔ lɔ-ɔ be ba-man kun'n, bɔ lɔ ti aosin ble'n.

²² Mɛn sɔ'n i nun lɔ dun tritritri kpa, yɛ lɔ ti sukusuku. Wia nun'n, lɔ lika'n ɔ dun kɛ aosin sa.