Jean 20 - NYANMIƐN NDƐ'N 1998

Jésus i cɛnlɛ

¹ Mɔnnɛn'n b'ɔ ti le mɔcuɛ'n i cɛn ba klikli'n, Mari b'ɔ fin Magdala'n wɔli ndia'n su lɔ nglɛmun ndɛ kpa kɛ lika'n nian titi-man'n, ɔ wunnin kɛ b'a yi yɛbuɛ'n b'ɔ o ndia i anuan nun'n.

² Ɔ wanndi ko toli Simɔn Piɛr nin Jésus sɔnnzɔnfuɛ nga Jésus klo i kpa'n, yɛ ɔ seli be kɛ: «B'a yi e Min'n i fuɛn'n ndia'n nun, e si-man lika nga be fɛ i ɔli'n.»

³ Kɛ Piɛr nin Jésus sɔnnzɔnfuɛ sɔ'n be ´fite kɔ ndia'n su lɔ'n, be nnyɔn'n be wanndi,

⁴ sanngɛ kun'n wanndi kpa tra Piɛr, ɔ dun mmua juli ndia'n su lɔ.

⁵ Ɔ kpɛ i nyin ase yɛ ɔ wunnin tannin tanmue'm bɔ be gua lɛ'n, sanngɛ ɔ'a wlu-man lɔ.

⁶ Simɔn Piɛr b'ɔ ka siɛn'n, ɔ wa juli lɛ. Ɔ wluli ndia nun lɔ, yɛ ɔ wunnin tanmue'm bɔ be gua lɛ'n,

⁷ nin tannin nga be fa katali Jésus ti'n. Ɔ wunnin kɛ b'a bubu tannin kun sɔ'n nun ɔ guɛ i ngunmin.

⁸ Yɛ Jésus sɔnnzɔnfuɛ ng'ɔ dun mmua juli ndia'n su lɛ'n, i kusu wluli lɔ-ɔ. Like ng'ɔ wunnin i'n yɛ man ɔ lafili su kɛ Jésus a cɛn-ɔn.

⁹ Afin be nian wun-man Nyanmiɛn Ndɛ nga be klɛli i kɛ san Jésus ´cɛn'n i wlɛ .

¹⁰ Yɛ be sali bé sin be ɔli be awlo-ɔ.

Jésus yili i wun kleli Mari b'ɔ fin Magdala'n

¹¹ Sanngɛ Mari jin ndia'n i anuan'n nun lɛ ɔ sun. Kɛ ɔ ´sun'n, ɔ kpɛli i nyin ase niannin ndia'n nun lɔ.

¹² Ɔ ´nian-an anz nnyɔn yɛ, tannin ufue o bé wun! Be ti kan Jésus fuɛn'n lali lɛ'n, kun ti i ti lika lɔ yɛ kun ti i ja ngua lɔ.

¹³ Yɛ be usɛli i kɛ: «?Mmo, nguɛ ti yɛ a sun-ɔn?» Ɔ seli be kɛ: «B'a fa min Min'n i fuɛn'n, n si-man lika nga be yili i'n.»

¹⁴ Kɛ ɔ kannin sɔ b'ɔ ´kpɛ i nyin'n, ɔ ´nian-an, sran yɛ ɔ jin'n, sanngɛ ɔ'a wun-mɛn i wlɛ kɛ Jésus-ɔ.

¹⁵ Yɛ Jésus usɛli i kɛ: «?Mmo, nguɛ ti yɛ a sun-ɔn? ?A kunndɛ wan?» Ɔ buli kɛ fiefuɛ nin-ɔn nan ɔ'a se i kɛ: «Nja, sɛ wɔ yɛ a fali'n, kle min lika nga a ko yili i'n man n ko fa.»

¹⁶ Jésus seli i kɛ: «Mari!» Ɔ kpɛli i nyin ɔ seli i ebre nun kɛ: «Rabuni.» Rabuni'n ti dunman bɔ mɛn sɔ'n nunfuɛ'm be fa flɛ be ninnge klefuɛ mun-ɔn.

¹⁷ Yɛ Jésus seli i kɛ: «Nán kan min, afin n nian fu-man min Si wun lɔ ka. Sanngɛ kɔ min niaan'm be sin ko se be kɛ n ´fu kɔ min nin amun e Si'n b'ɔ ti min nin amun e Nyanmiɛn'n i wun lɔ.»

¹⁸ Mari b'ɔ fin Magdala'n ɔ wa kan kleli Jésus sɔnnzɔnfuɛ'm be kɛ ɔ wunnin e Min'n, yɛ ɔ kannin ndɛ ng'ɔ kan kleli i'n kleli be-ɔ.

Jésus yili i wun kleli i sɔnnzɔnfuɛ mun

¹⁹ Le kunngba sɔ'n i nnɔsua nun'n, Zuif'm bé wun srɛ ti i sɔnnzɔnfuɛ'm be nyinnin bé sin anuan. Sa sɔ'n yoli mɔnnɛn'n b'ɔ ti le mɔcuɛ'n i cɛn ba klikli'n. Jésus wluli lɔ ɔ jrannin be afiɛn lɛ, yɛ ɔ seli be kɛ: «Man amun wun jɔ amun fɔuun!»

²⁰ Kɛ ɔ kannin sɔ'n, ɔ fɛli i sa'n nin i nvɛn nun'n kleli be. Kɛ e Min'n i sɔnnzɔnfuɛ'm be wunnin i'n, be klun jɔli.

²¹ Yɛ ɔ seli be ekun kɛ: «Man amun wun jɔ amun fɔuun! Kɛ n Si fa sunmannin min'n, n kusu n ´fa sunman amun sɔ.»

²² Kɛ ɔ kannin ndɛ sɔ'n, ɔ fitali bé su nan ɔ'a se be kɛ: «An `sɔ Nyanmiɛn Wawɛ'n nun.»

²³ Be nga an yaci be wun sa'n cɛ be'n, Nyanmiɛn ´yaci cɛ be, yɛ be nga an yaci-man bé wun sa'n cɛ-man be'n, bé wun sa liɛ'n ´ka bé wun.

Jésus nin Tomas

²⁴ Kɛ Jésus ´bɛ i sɔnnzɔnfuɛ bé wun lɛ'n, wuun Tomas bɔ be flɛ i kɛ Nda'n b'ɔ ti be blu-nin-nnyɔn'n be nun kun'n, ɔ nun-man lɛ wie.

²⁵ I sɔ'n ti'n, be nga'm be seli i kɛ: «Y'a wun e Min'n.» Sanngɛ ɔ seli be kɛ: «Sɛ m'an wun-mɛn i sa klun kpɛngbɛ osu'n, sɛ m'an fa-man n sama a wla-man kpɛngbɛ'n i osu sɔ nun'n, yɛ sɛ m'an fa-man n sa a wlɛ-mɛn i nvɛn nun liɛ'n i osu nun'n, n fɛ-mɛn i mlɔnmlɔn.»

²⁶ Kɛ ɔ dili le mɔcuɛ'n, Jésus sɔnnzɔnfuɛ'm be o sua lɔ ekun, Tomas nin be yɛ be o lɛ-ɔ, b'a nyin bé sin anuan, sanngɛ Jésus wluli lɔ ɔ jrannin be afiɛn lɛ, yɛ ɔ seli be kɛ: «Man amun wun jɔ amun fɔuun!»

²⁷ Yɛ ɔ seli Tomas kɛ: «Fa ɔ sama'n bla, nian mín sa'n, fa ɔ sa'n bla wa ekun fa wla n nvɛn nun kpɛngbɛ liɛ'n i osu'n nun, nán yo sran b'ɔ lafi-man sa su, sanngɛ lafi su!»

²⁸ Yɛ Tomas seli i kɛ: «Min Min, min Nyanmiɛn!»

²⁹ Yɛ Jésus seli i kɛ: «A wunnin min'n ti yɛ a lafili su-ɔ, sanngɛ be nga b'a wun-man min bɔ be lafili su'n, be liɛ su ti ye!»

Sa nga ti yɛ be klɛli fluwa nga'n

³⁰ Jésus yili atrɛ kpanngban kpa ekun i sɔnnzɔnfuɛ'm be nyrun bɔ b'a klɛ-man be fluwa nga nun.

³¹ Sanngɛ kɛ ɔ ´yo nan amu'an lafi su kɛ Jésus ti Krist nan ɔ ti Nyanmiɛn i Wa'n, i ti yɛ be klɛli nga-a, yɛ sɛ an lafi i su'n, i ti amun ´nyan nguan .