Jean 19 - NYANMIƐN NDƐ'N 1998

¹ Yɛ Pilat man be fa Jésus be ko boboli i-ɔ.

² Sonja'm be wɔli owie kɛ sika kle sa, be fa wlɛli i ti, yɛ be wlɛli i wun tralɛ dan kun b'ɔ ti ɔkwlɛ kankankan.

³ I sin be wunngeli i wun lɛ be seli kɛ: «Zuif'm be famiɛn, Nyanmiɛn man a cɛ o!» Yɛ be kpacili i nyin nun-ɔn .

⁴ Pilat fiteli ekun ɔ wa seli Zuif'm be kɛ: «An `nian, m ma fɛ i blɛ amun guasu wa nan an wun kɛ m'an wun-mɛn i wun ndɛ kun bɔ n ´jran su fa bu i fɔ-ɔ.»

⁵ Ɔ man kɛ Jésus fiteli'n, owie kle b'ɔ ti kɛ sika kle sa'n wo i ti, yɛ tralɛ dan b'ɔ ti ɔkwlɛ kankankan'n, ɔ wlɛ i wun. Yɛ Pilat seli be kɛ: «An `nian, amun sran'n yɛ!»

⁶ Kɛ Nyanmiɛn nyrun jranfuɛ dandan mun nin sonja'm be wunnin i'n, be kpan seli kɛ: «Bobo i waka'n su! Bobo i waka'n su!» Pilat seli be kɛ: «An bɔbɔ an `fɛ i ko bobo i, afin n liɛ'n, n wun-mɛn i wun ndɛ kun nga n ´jran su n ´fa bu i fɔ-ɔ.»

⁷ Zuif'm be seli i kɛ: «Ɔ yo i wun kɛ ɔ ti Nyanmiɛn Wa. E lɛ mmla kun bɔ be klɛli i kɛ sran ng'ɔ yo sɔ-ɔ be `kun i.»

⁸ Kɛ Pilat tili ndɛ sɔ'n, srɛ kunnin i trali su.

⁹ Ɔ wluli i awlo lɔ ekun, yɛ ɔ usali Jésus kɛ: «?A fin ye sɛ?» Sanngɛ ɔ'a tɛ-mɛn i su.

¹⁰ Ɔ man Pilat seli i kɛ: «?Min yɛ n usa wɔ sa-a a tɛ-man n su nin-ɔn? ?A si-man kɛ n kwla yo man be kwla yaci ɔ nun yɛ n kwla yo man be kwla kun wɔ?»

¹¹ Jésus tɛli i su kɛ: «Sɛ Nyanmiɛn a man-man wɔ atin'n, a kwla yo-man n sa fi. I sɔ'n ti'n, sran ng'ɔ fa min mannin wɔ'n, i fɔ'n b'ɔ dili'n i dan tra ɔ liɛ'n.»

¹² Kɛ ɔ fin i lɛ'n, Pilat kunndɛli kɛ ɔ ´yaci i nun, sanngɛ Zuif'm be kpan seli kɛ: «Sɛ a yaci bian nga nun'n, wuun nán Sezar janvuɛ yɛlɛ wɔ. Sran kwlaa ng'ɔ yo i wun famiɛn'n, wuun ɔ'a jao Sezar wun.»

¹³ Kɛ Pilat tili ndɛ sɔ'n, ɔ fa Jésus fiteli guasu lɔ nan ɔ'a tran ase jɔlɛ diwlɛ lɔ. Lika'n bɔ be flɛ i Yɛbuɛ Wama'n bɔ Ebre aniɛn nun be flɛ i Gabata'n i su yɛ ɔ trannin-ɔn.

¹⁴ Cɛn sɔ'n ti cɛn bɔ Zuif'm be buabua bé wun kɛ be ´di Delɛ-cɛn'n. Kɛ ɔ yo sɔ'n, wuun wia'n su wa jran. Ɔ seli Zuif'm be kɛ: «Amun famiɛn'n yɛ!»

¹⁵ Sanngɛ be kpan seli kɛ: «Be `kun i! Bobo i waka'n su!» Pilat usali be kɛ: «?M `bobo amun famiɛn'n?» Nyanmiɛn nyrun jranfuɛ dandan'm be seli kɛ: «E lɛ-man famiɛn uflɛ fi san Sezar kunngba cɛ.»

¹⁶ Nan ɔ'a fɛ i a man be kɛ be ko bobo i, yɛ be nin i ɔli-ɔ.

Jésus i waka'n su bobolɛ

¹⁷ Jésus suɛli i waka'n klɔ'n nun lɛ fa ɔli lika bɔ be flɛ i Ti Kongloman'n nun lɔ, lika sɔ'n ebre nun be flɛ i Gɔlgota.

¹⁸ Lɛ yɛ be boboli Jésus nin sran nnyɔn nin-ɔn, kun o wa, kun ɔ o wa ɔ o be afiɛn .

¹⁹ Pilat klɛ ndɛ wie sieli waka'n su, ɔ klɛli i kɛ: «Jésus Nazarɛtfuɛ'n b'ɔ ti Zuif'm be famiɛn'n yɛ.»

²⁰ Zuif kpanngban kpa be kanngannin ndɛ sɔ'n, afin lika nga be boboli Jésus'n ɔ mantan klɔ'n. Be klɛli ndɛ sɔ'n ebre, nin latɛn, ɔ nin grɛk nun.

²¹ Zuif'm be Nyanmiɛn nyrun jranfuɛ dandan'm be wa seli Pilat kɛ: «Nán klɛ kɛ ɔ ti Zuif'm be famiɛn, sanngɛ klɛ kɛ i bɔbɔ waan, ɔ ti Zuif'm be famiɛn.»

²² Yɛ Pilat seli be kɛ: «Nga n ko klɛ'n yɛ m'an klɛ i lɛ.»

²³ Kɛ sonja'm be boboli Jésus'n, be fɛli i tralɛ mun, be sran nnan be cɛ fali. Be fɛli i tralɛ dan'n kusu. Tralɛ sɔ'n ɔ fin i nglo lɔ jra kli, ɔ lɛ-man ngbaliɛ.

²⁴ Be seli be wiengu kɛ: «Nán man e titi nun, sanngɛ man e tu fɔtɔ nan e wun sran ng'ɔ ´yo i liɛ'n.» Be yoli i sɔ nan Nyanmiɛn Ndɛ nga be klɛli'n ɔ `kpɛn su. Be klɛli i kɛ: «Be cɛ n tralɛ mun fali, yɛ be tuli n tralɛ dan'n i wun fɔtɔ.» I sɔ yɛ sonja'm be yoli-ɔ .

²⁵ Jésus i nin'n, ɔ nin Klopas i yi'n b'ɔ ti Jésus i nin'n i niaan'n, ɔ nin Mari b'ɔ fin Magdala'n be jin waka nga be boboli Jésus su'n i bo lɛ.

²⁶ Kɛ Jésus wunnin i nin'n ɔ nin i sɔnnzɔnfuɛ ng'ɔ klo i kpa'n kɛ be jin lɛ'n, ɔ seli i nin kɛ: «Mmo, ɔ́ wa'n yɛ ɔ o lɛ-ɔ.»

²⁷ Yɛ ɔ seli i sɔnnzɔnfuɛ'n kusu kɛ: «Ɔ nin'n yɛ ɔ o lɛ-ɔ.» Kɛ ɔ fin cɛn sɔ'n nun'n, i sɔnnzɔnfuɛ'n fɛli i nin'n wɔli i awlo.

Jésus i wulɛ

²⁸ Kɛ ɔ yoli sɔ'n, Jésus sili kɛ ɔ'a wie like ng'ɔ bɛli i yolɛ'n i yo, sanngɛ kɛ ɔ yo nan Nyanmiɛn ndɛ nga be klɛli ɔ'a kpɛn su'n ti'n, ɔ seli kɛ: «Nzue we kun min .»

²⁹ Vinɛgri sɛ kun jin lɛ. Be fali mlɛn boli vinɛgri sɔ'n nun, be fa blɛblɛli i izɔp b'ɔ ti kɛ ndɛma sa'n su, be fa wɔli i nuan su.

³⁰ Kɛ Jésus tafili su'n, ɔ seli kɛ: «I kwlaa ɔ'a wie.» Kpɛkuun ɔ kɛnnin i ti ase, yɛ ɔ kali nun-ɔn.

Be wɔli Jésus nvɛn nun cua

³¹ Zuif'n be ko srɛli Pilat kɛ ɔ yo man be bubu be nga be boboli be'n bé ja'n nan be yi be waka'n su, afin cɛn sɔ'n ti ya cɛn. Ya cɛn'n yɛ Zuif'm be fa buabua bé wun-ɔn, yɛ be klo-man kɛ be `yaci be lɛ man wunmiɛn-delɛ-cɛn'n to be lɛ yɛlɛ kɛ wunmiɛn-delɛ-cɛn kun sɔ'n ti bé cɛn dan.

³² Yɛ sonja mun be bali be nga be boboli be'n bé ja'm be bubulɛ-ɔ. Be bu nga liɛ'n be bu nga liɛ'n.

³³ Kɛ be toli Jésus bɔ be wun kɛ ɔ'a wu'n, ɔ man b'a bubu-mɛn i liɛ'n wie,

³⁴ sanngɛ sonja'm be nun kun wɔli i nvɛn nun cua, kpɛkuun nzue nin mmoja be fin nun fiteli.

³⁵ Sran ng'ɔ wunnin nun'n yɛ ɔ kannin-ɔn, yɛ ndɛ ng'ɔ kan'n ti nanwlɛ. I bɔbɔ si kɛ ndɛ ng'ɔ kan'n ti nanwlɛ, ɔ man amun kusu an `lafi su wie.

³⁶ Kɛ ɔ ko yo nan Nyanmiɛn Ndɛ nga be klɛli'n ɔ'a kpɛn su'n ti yɛ ɔ yoli sɔ-ɔ. Be klɛli i kɛ: «Be su bu-mɛn i owie'n wie fi .»

³⁷ Yɛ be kɛn i Nyanmiɛn Ndɛ'n nun lika uflɛ ekun kɛ: «Be ´nian sran nga be bɔbɔ be wɔli i cua'n .»

Jésus i sielɛ

³⁸ Kɛ ɔ yoli sɔ'n, i sin Zozɛf b'ɔ fin Arimate'n b'ɔ ti Jésus sɔnnzɔnfuɛ bɔ sanngɛ Zuif'm bé wun srɛ ti ɔ yi-mɛn i wun nglo'n, ɔ wa srɛli Pilat kɛ ɔ fa Jésus fuɛn'n mɛn i. Pilat kplinnin su, yɛ ɔ ko fɛ i fuɛn'n wɔli-ɔ.

³⁹ Nikodɛm b'ɔ le kun kɔnguɛ ɔ ɔli Jésus wun lɔ'n, i kusu fali mir bɔ be sɛnngɛnnin i nin aloɛs b'ɔ wa de ju kilo ablasan'n bali.

⁴⁰ Ɔ man be fali Jésus fuɛn'n, kɛ be ´cici i'n, wuun be ´fa ayre fannin'n guagua tannin tanmue bɔ be ´fa cici i'n nun, afin kɛ Zuif'm be sie be sran sɔ-ɔ.

⁴¹ Kan be boboli Jésus lɛ'n, fie kun o lɛ. Be kpɛli ndia uflɛ kun yɛbuɛ nun kɛ sua ba sa fie sɔ'n su, be nian sie-man sran nun le.

⁴² Ndia sɔ'n mantan koko lɛ ti lɛ yɛ be sieli Jésus-ɔ, afin be o Zuif'm bé wun buabualɛ cɛn'n nun.