Jean 17 - NYANMIƐN NDƐ'N 1998

Jésus srɛli Nyanmiɛn kɛ ɔ niɛn i sɔnnzɔnfuɛ'm be su

¹ Kɛ Jésus kannin sɔ bɔ i nuan tɔli'n, ɔ mɛnnin i nyin su niannin Nyanmiɛn su lɔ seli kɛ: «Min Si, blɛ'n ɔ'a ju siɛn'n, yi ɔ Wa'n i sran wafa ng'ɔ ti'n i nglo nɛn i kusu man ɔ kɔmin su.

² Afin a fali sran'm be kwlaa wlɛli i sa nun kɛ ɔ `sie be nan ɔ `man be kwlaa nga a fa be mɛnnin i'n be anannganman nguan.

³ Kɛ be se kɛ be ´nyan anannganman nguan'n, i bo'n yɛlɛ kɛ be ´si wɔ bɔ ɔ kunngba cɛ yɛ a ti Nyanmiɛn'n nin Jésus-Krist bɔ a sunmɛnnin i'n.

⁴ N yoli man a nyannin kɔmin asiɛ'n su wa, yɛ junman nga a mannin min kɛ n di'n, n wieli i di.

⁵ I sɔ'n ti siɛn'n, min Si, nyrun nga kɛ n wo ɔ wun lɔ'n n lɛ i'n nan w'a yi mɛn'n, man n nyan nyrun kunngba sɔ'n ɔ wun lɔ ekun.

⁶ Be nga a fa be mɛn'n nun mannin min'n, n yoli man be sili wɔ. Be ti ɔ liɛ yɛ a fa be mannin min-ɔn, yɛ be fali ɔ ndɛ'n su.

⁷ Siɛn'n, b'a wun i wlɛ weiin kɛ like nga a mannin min'n, be kwlaa be fin ɔ́ sa nun sakpa,

⁸ afin ndɛ nga a kan kleli min'n, n kan kleli be, yɛ be fali su. B'a wun i wlɛ weiin kɛ n fin ɔ wun lɔ, yɛ b'a lafi su kɛ wɔ yɛ a sunmannin min-ɔn.

⁹ Bé wun yalɛ yɛ n su koko n kle wɔ-ɔ. Nán mɛn nunfuɛ'm bé wun yalɛ yɛ n su koko n kle wɔ-ɔ, sanngɛ be nga a fa be mannin min'n, bé wun yalɛ yɛ n su koko n kle wɔ-ɔ, afin be ti ɔ liɛ.

¹⁰ Like ng'ɔ ti n liɛ'n, i kwlaa'n ɔ ti ɔ liɛ, yɛ ng'ɔ ti ɔ liɛ'n, ɔ ti n liɛ, yɛ be man n kɔmin su.

¹¹ N nun-man mɛn'n nun wa kun, sanngɛ be liɛ'n be tɛ o wa, n kusu n su ba ɔ́ sin. Min Si bɔ ɔ nzuɛn'n nin klɔ sran liɛ'n ti-man kun'n, ɔ dunman'n b'ɔ o n su'n ti, nian bé su. Man be yo sran wunmuan kɛ min nin wɔ e ti sran wunmuan'n sa.

¹² Kɛ min nin be tɛ o wa'n, ɔ dunman'n b'ɔ o n su'n ti'n, n niannin bé su. N kplali bé wun, be wie fi a mlin-man san sran nga be sieli i liɛ'n sɔ'n i cɛ, ɔ yoli sɔ nan ɔ ndɛ nga be klɛli'n ɔ `kpɛn su .

¹³ Siɛn'n, n su kɔ ɔ́ sin. N kannin ndɛ sɔ'n mɛn'n nun nan be klun jɔ kɛ n liɛ'n sa lelele.

¹⁴ N kannin ɔ ndɛ'n kleli be, ɔ man mɛn nunfuɛ'm be kpɔ be, afin be ti-man mɛn nunfuɛ kɛ n kusu n ti-man mɛn nunfuɛ'n sa.

¹⁵ N srɛ-man wɔ kɛ a yi be mɛn'n nun, sanngɛ n ´srɛ wɔ kɛ Klunwifuɛ'n ti a `nian bé su.

¹⁶ Be ti-man mɛn nunfuɛ kɛ n kusu n ti-man mɛn nunfuɛ'n sa.

¹⁷ Yo man be kaci ɔ liɛ mlɔnmlɔn nanwlɛ'n ti, ɔ ndɛ'n ti nanwlɛ.

¹⁸ Kɛ a fa sunman min mɛn'n nun'n, n kusu n fa sunmannin be mɛn'n nun sɔ.

¹⁹ Be ti n fa mín wun mannin wɔ mlɔnmlɔn nan be kusu be `kaci ɔ liɛ sakpa.

²⁰ Nán be ngunmin bé wun yalɛ yɛ n su koko kle wɔ-ɔ, sanngɛ be nga be wa lafi n su ndɛ nga be ´kan'n ti'n, be liɛ o nun.

²¹ Min Si, n ´srɛ wɔ kɛ be `kaci sran wunmuan, yɛ be nin ye e `yo sran wunmuan kɛ min nin wɔ e ti sran wunmuan'n sa nan mɛn nunfuɛ'm be lafi su kɛ wɔ yɛ a sunmannin min-ɔn.

²² N yoli man be nyannin nyrun kɛ a yoli man n nyannin nyrun'n sa nan be `kaci sran wunmuan kɛ min nin wɔ e ti sran wunmuan'n sa.

²³ Man min nin be e yo sran wunmuan kɛ min nin wɔ e ti sran wunmuan'n sa nan be kaci sran wunmuan mlɔnmlɔn. Man ɔ yo sɔ nan mɛn nunfuɛ'm be si kɛ wɔ yɛ a sunmannin min-ɔn, yɛ a klo be kɛ a fa klo min'n sa.

²⁴ Min Si, lika nga n wo lɔ'n, n klo kɛ be nga a fa be mannin min'n, be `tran lɔ wie nan be wun nyrun nga wɔ man n lɛ i'n, afin i sin nan w'a yi mɛn'n yɛ a sɔtɔ n klolɛ-ɔ.

²⁵ Min Si bɔ a ti sran kpa, mɛn nunfuɛ'm be si-man wɔ, sanngɛ n si wɔ, yɛ be nga be o yɛ'n, be si kɛ wɔ yɛ a sunmannin min-ɔn.

²⁶ N yoli man be sili wɔ, yɛ n yoli man be wa si wɔ ekun nan klolɛ nga a fa kloli min'n, be `si kɛ a klo be sɔ wie, yɛ be `si kɛ min nin be y'a yo sran wunmuan.»