Jacques 3 - NYANMIƐN NDƐ'N 1998

Bé nuan

¹ N niaan mun, nán amun nun kpanngban be ´kunndɛ kɛ be ´yo like klefuɛ, afin an si kɛ kɛ Nyanmiɛn ´di jɔlɛ'n, e bɔ e ti like klefuɛ'n, ɔ ´usa-usa e sa kpa tra be nga mun.

² E kwlaa e fɔn sa sunman nun. Sran nga i nuan fitefite-man tɛtɛ'n, ɔ ti sran kpa b'ɔ kwla niɛn i wun su.

³ E fa blalɛ wla nnɛn kpanngɔ'm bé nuan nun nan be yo like nga e klo kɛ be yo'n, ɔ man e kwla fa be kɔ lika nga e klo kɛ be wɔ'n.

⁴ An `nian mmeli'n kusu, ɔ ti dan, yɛ aunngban dan'n fɛ kɔ. Sanngɛ ɔ nin i sɔ'n ngba'n, like nga be fa kan'n ti kaan sa, i yɛ man ɔ sin lika nga i kanfuɛ'n klo kɛ ɔ sin nin-ɔn.

⁵ Kɛ bé nuan'n kusu ti sɔ-ɔ, ɔ nin i kaan b'ɔ ti'n, i yɛ man be ijɔ kpakpa nin-ɔn. An `nian, sin kaan sa yra bo dan kpa.

⁶ Bé nuan'n kusu ti kɛ sin sa, ɔ man be kwla yo sa tɛ dan. Ɔ ti e wunnɛn'n i bue, i yɛ ɔ saci é wun sa nin-ɔn. Ɔ ti kɛ sin sa, kɛ be wuli ye'n, ɔ saci é wun sa lele fa ju e wie cɛn, sin sɔ'n fin nyrɛnnɛn lika'n nun lɔ.

⁷ Sɛ sran waan ɔ ´lo blo nnɛn wafa'n kwlaa, nin anunman mun'n, nin wuo mun'n, ɔ nin nzue nun ninnge mun'n, ɔ kwla yo. B'a lo be bɔbɔ.

⁸ Sanngɛ bé nuan'n, sɛ ɔ ti nnɛn'n, wuun sran fi kwla lo-mɛn i, ɔ ti tɛ, be kwla sie-mɛn i. Ɔ ti kɛ duwlɛ sa!

⁹ E nuan sɔ'n yɛ e fa manman e Min'n b'ɔ ti e Si nin-ɔn. E nuan kunngba'n, yɛ e fa wua sran bɔ Nyanmiɛn yili be'n bɔ be ti kɛ i sa'n, be amuɛn nin-ɔn .

¹⁰ Nyanmiɛn manmanlɛ'n nin amuɛnnwua'n be fin nuan kunngba sɔ'n nun. N niaan mun, nán man ɔ yo sɔ.

¹¹ ?Nzue ti kunngba'n i bue kwla yo fɛ, yɛ i bue kwla yo yraka-yraka?

¹² ?N niaan mun, figie kwla su olivie mma? ?Vinyi kwla su figie mma? ?Nzue b'ɔ yo fɛ'n kwla fin-man nzue ti bɔ njin o nun'n nun?

Ngwlɛlɛ b'ɔ fin nyanmiɛn su'n

¹³ ?Amun nun onin yɛ ɔ si ngwlɛlɛ b'ɔ wun sa wlɛ-ɔ? Man be wun i sɔ i nzuɛn kpa'n nin sa kpa ng'ɔ yo be'n nun, yɛ man be wun kɛ ɔ yo i wun aenvuɛ yɛ ɔ ti ngwlɛlɛfuɛ.

¹⁴ Sanngɛ sɛ amun klunwi'n ti amún nyin ci sran yɛ an bu amun bɔbɔ amun wun akunndan'n, nán an fa amun ngwlɛlɛ'n di amún nuan, yɛ nán an fa nanwlɛ'n kaci ato.

¹⁵ I sɔ ngwlɛlɛ liɛ'n fin-man nyanmiɛn su, ɔ ti asiɛ'n su wa liɛ, ɔ ti klɔ sran liɛ, ɔ fin mmusu'm bé si Satan.

¹⁶ Afin lika nga bé nyin ci sran bɔ be bu be bɔbɔ be wun akunndan lɛ'n, sa sukusuku'n nin sa tɛtɛ'n kwlaa o lɛ.

¹⁷ Ngwlɛlɛ b'ɔ fin nyanmiɛn su'n, sɛ ɔ ti sran'n, wuun e ´se kɛ sa tɛ kaan sa nun-mɛn i wun. Ɔ klo-man ndɛnngan, ɔ ti wɛtɛfuɛ, be nin i kwla koko yalɛ, ɔ si aunnvuɛ dan, ɔ yo sa kpa, ɔ bu-man sran'n wie kpa tra-man wie, yɛ ɔ klo-man dunman.

¹⁸ Be nga be siesie afiɛn'n, be ti kɛ fie difuɛ sa. Sɛ alaje o lɛ nan be lua like'n, like nga be nyɛn i nun'n yɛlɛ sa i nuan su yolɛ'n.