Ezai 8 - NYANMIƐN NDƐ'N 1998

Be `fɛn ninnge mun

¹ Anannganman seli min kɛ: «Fa like paplapa dan kun nan klɛ su weiin man be wun i. Klɛ su kɛ: ‹Be `fɛn ninnge'n ndɛndɛ, be `kan bé wun be `ko fa ninnge'n.› »

² N fali sran wie'm be kɛ be `yo min lalofuɛ, be ti nanwlɛfuɛ. Kun yɛlɛ Iri b'ɔ ti Nyanmiɛn nyrun jranfuɛ'n, yɛ kun yɛlɛ Berekia i wa Zakari.

³ Yɛ n wluli Nyanmiɛn nuan ijɔfuɛ bla b'ɔ ti min yi'n i sin, ɔ wunnzɛli nan ɔ'a wu ba yasua kun. Anannganman seli min kɛ: «Tɔn i dunman kɛ Kan Ɔ Wun Fɛn Be Bo Ninnge'n.

⁴ Afin kwlaa nan bakan ɔ'a si baba nin manmin flɛ'n, be ´fa Damas lɔ anyanbeun'n nin Samari lɔ ninnge mun ko man Asiri famiɛn'n.»

Asirifuɛ'm be balɛ ndɛ

⁵ Anannganman kannin ndɛ kleli min ekun, i waan:

⁶ «Kɛ bɔ nvle nga nunfuɛ'm be yoli Silɔe nzue'n b'ɔ sonji blɛblɛblɛ'n i finfin'n, kɛ bɔ Rɛzɛn nin Rɛmalia i wa'n be ti yɛ be klun jɔ'n,

⁷ i ti Anannganman man Efrat nzue kpanngban b'ɔ sonji kekle'n, ɔ sonji ba be su, Asiri famiɛn'n b'ɔ lɛ nyrun dan'n ɔ ´ba. Nzue'n ɔ ´yi dan kpa, ɔ ´kɛtɛ i cenje'n kwlaa su.

⁸ Ɔ ´kata Zida mɛn'n i su, ɔ ´yi lele ɔ di lika'n, ɔ ´ju be kɔmin nun. Ee! Emaniɛl, be su wun-man nzue'n i cenje'n kun, nzue'n ɔ ´di ɔ mɛn'n wunmuan'n.»

Like nga sran'm be waan be ´yo'n, ɔ ´yo ngbɛn

⁹ Sran mun, amun `kpan, srɛ dan kpa ɔ wa kun amun! Amun kwlaa nga amun wo asiɛ'n i muamua lɔ'n, amun `sie amún su, alɛ'n ti amun `buabua amún wun, srɛ dan kpa ɔ wa kun amun!

¹⁰ Kannzɛ amun bu like nga amun ´yo'n be akunndan sie, be su kpɛn-man su! Kannzɛ amun kan ndɛ wie'n, ɔ su kpɛn-man su, afin Nyanmiɛn nin ye o nun.

Yɛbuɛ bɔ bé ja kpla su'n

¹¹ Kɛ Anannganman trali min'n, b'ɔ wlali min su nun kpa kɛ nán n nanti nvle nga nunfuɛ'm be atin liɛ'n su'n, ɔ seli min kɛ yoo:

¹² «Blɛ bɔ sran kun nga'm be ´kan sran dandan'm bé wun jasolɛ ndɛ'n, nán amun bua nun. Nán amun sro like nga be sro i'n, nán ɔ ´kun amun srɛ.

¹³ Anannganman b'ɔ sie mɛn wunmuan'n i kunngba yɛ ɔ fata kɛ amun kisɛ i su-ɔ. I yɛ ɔ fata kɛ amun nyin yi i-ɔ, i yɛ ɔ fata kɛ amun sro i-ɔ.

¹⁴ Ɔ wa yo kɛ sua sa, yɛ ɔ wa yo kɛ yɛbuɛ bɔ bé ja'n ɔ kpla su'n sa, ɔ wa yo kɛ yɛbuɛ b'ɔ yi sran ase'n sa, ɔ ´yo sɔ man Izraɛl akpasua nnyɔn'n. Ɔ wa yo kɛ tɛ nin aya sa ɔ man Zerizalɛmfuɛ mun.

¹⁵ Sran kpanngban be ´bo tanngan, be ´tɔ yɛbuɛ'n su, yɛ be lika'n wie ´bubu, be ´tɔ aya nun yɛ ɔ ´tra be .»

Anannganman yɛ m minndɛ i-ɔ

¹⁶ Fa min ndɛ nga mun sie kpa, ta su min sɔnnzɔnfuɛ'm be nyrun.

¹⁷ N su minndɛ Anannganman. Blɛ nga nun liɛ'n, ɔ'a kaci i sin ɔ'a si Zakɔb i osu'n nunfuɛ mun. N fa mín wla guɛ i su kpa.

¹⁸ Min nin ba nga Anannganman fa be mannin min'n, e ti nzɔliɛ Izraɛl mɛn'n nun, E bo sa'm be su e kle Izraɛlfuɛ mun. Anannganman b'ɔ sie mɛn wunmuan'n, b'ɔ tran Siɔn oka'n su'n i dunman nun.

¹⁹ Sran wie'm be se kɛ: «Be nga be nin wunmiɛn mun ijɔ'n, bɔ be tu be aswre'n, bɔ be ijɔ blɛblɛblɛ be kan sa nga be wa ju'n, amun `wɔ bé sin.» Be se ekun kɛ: «Sɛ sran'm be usa be amuɛn'm be sa-a ɔ ti-man tɛ. Yɛ sɛ sran kun usa wunmiɛn'm be sa sran wie'm be dunman nun'n, ɔ ti-man sa.» Sɛ be se amun sɔ'n,

²⁰ amun `se kɛ: «Anannganman i mmla'n nin i nuan ndɛ'n yɛ be di su-ɔ.» Sran nga b'a kan-man sɔ'n, be su nyan-man nguan.

Aosin tikitiki kpa'n

²¹ Kɛ be ´sin mɛn nun'n, afɛ'n ɔ'a ti be, yɛ awe'n ɔ'a kun be kpo. Sɛ awe kun be'n, be ´fa ya be ´kpɛ be famiɛn'n nin be Nyanmiɛn'n be nzowa. Be ´man be nyin'n su be ´nian nglo lɔ.

²² I sin, kɛ be nian asiɛ nin-ɔn, be ´wun kɛ nyrɛnnɛn nin aosin tuun, ɔ nin srɛ b'ɔ kun sran'n yɛ be o su-ɔ. Be ´su bé bo yi i aosin tikitiki'n nun.

²³ Sanngɛ asiɛ'n bɔ nyrɛnnɛn o su kɛ e ´se yɛ'n, aosin'n su ka-man su tititi. Laa'n, Anannganman kuakuali Zabilɔn nin Nɛftali lika'n, sanngɛ blɛ ng'ɔ ´ba lɔ'n, lika nga be o Zurdɛn'n i sin lɔ'n, bɔ be wo atin ng'ɔ san jenvie'n i wun lɔ'n, be nin aofuɛ'm be lika'm be ´nyan nyrun.