Ezai 65 - NYANMIƐN NDƐ'N 1998

Jɔlɛ dilɛ ng'ɔ wa ba'n

¹ Be nga b'a usa-man like fi'n, n yoli sa'm mannin be. Be nga b'a fa-man bé wun a mantan-man min'n, n yili mín wun nglo n kleli be. Nvle kun wie b'ɔ o lɛ'n, bɔ n dunman nun-man i nunfuɛ'm be su'n, n seli be kɛ: «Min yɛ, n su ba.»

² Nvle kun wie bɔ i nunfuɛ'm bé nyin ti kekle'n, bɔ be fa atin tɛ'n, bɔ be bɔbɔ be klun klo like yɛ be yo'n, n tinngɛli ń sa n flɛli be cɛn kwlaa.

³ Sran sɔ'm be klɔklɔ min cɛn kwlaa, be fa fia-man. Be yi sraka be fie'm be su, yɛ be yra ansans sraka yiwlɛ bɔ be fa bliki be yoli'n be su, be yra ansans sɔ'n be fa man amuɛn mun.

⁴ Be tran asieliɛ kunman'm be nun, yɛ be la yɛbuɛ buɛ'm be nun. Be di kɔkɔti nnɛn'n, yɛ aliɛ bɔ be ti fiɛn'n yɛ be o be talie'm be nun-ɔn.

⁵ Be se be nga be nin be yia'n be kɛ: «Amun `cuɛn amún wun siɛn, nán amun kan ye, sɛ ɔ'a yo-man sɔ-ɔ, kɛ bɔ e ti saun dan'n, sɛ amun mantan ye'n, amun ´wu.» Kɛ n wun sa tɛtɛ sɔ mun'n, n fa ya, yɛ min anwlɛn'n be min klun.

⁶ Amun nian, m'an klɛ bé sa nga be yo'n. N ´tannin bé sa sɔ'n i nuan like m ´man be, n ´yo man ɔ ´ti be kpa sakpa. N su yaci-man be lɛ.

⁷ Min Anannganman, min wan yoo: «Bé sa tɛtɛ'm bɔ be yo be'n nin be nannan'm be liɛ'n, m ´bubu be n ´sie nan n ´si be nuan, be nannan'm be yra ansans be mannin amuɛn mun oka'm be su, be sɔtɔ i sɔ yolɛ'n, ɔ'a cɛ. Be klɔklɔli min kpɔlɛ'm bé su. Bé sa tɛtɛ nga be yoli i laa'n, n ´tannin i nuan kalɛ'n m ´man be. Ɔ ´ti be kpa.»

⁸ Anannganman waan: «Sɛ nzue o vinyi mma'n i sɔsɔwa kun nun kpa'n, be se kɛ: ‹Nán amun saci i, afin be nyan nun nzan kpa-a ɔ yo ye.› I kunngba nin-ɔn, i sɔ yɛ n wa yo n sufuɛ mun-ɔn, kɛ ɔ ´yo nan m'an saci-man be wunmuan'n ti.

⁹ N ´yo man Zakɔb ɔ ´nyan osufuɛ mun, yɛ n ´yo man min oka'm be yo Zida osu nunfuɛ'm be liɛ, oka sɔ'm be ´yo min sran nga n kpali be'n be liɛ, yɛ min sufuɛ'm be ´tran oka lika sɔ'm be nun.

¹⁰ Min nvle'n nunfuɛ nga be fa bé wun mantan min'n, Sarɔn lika kpɛtɛkplɛɛ'n ɔ ´yo be bua mun nin be boli'm be didiwlɛ, yɛ Akɔr kongo'n ɔ ´yo be nannin'm be lawlɛ.

¹¹ Sanngɛ amun bɔ amun wanndili min'n, bɔ amún wla fili min oka'n i atin'n su'n, bɔ amun man Gad i aliɛ'n, bɔ amun man Mɛni i nzan'n,

¹² n ´yo man amun ´wu tɛ kpa. Amun ´koto amún ja bue su klo yɛ be ´kpɛ amun kɔmin-ɔn. Afin n flɛli amun amu'an tɛ-man min su. Sa nga min waan be ti tɛ'n, be cɛ yɛ amun yo be-ɔ, sa nga n klo-man be'n, yɛ amun yo be-ɔ.

¹³ I sɔ'n ti, min bɔ n ti Anannganman Nyanmiɛn'n, min wan yoo: ‹Amun `nian, min sufuɛ'm be ´nyan like be ´di, sanngɛ amun liɛ'n, awe ´kun amun. Amun `nian, min sufuɛ'm be ´nyan nzue be´nɔn, sanngɛ amun liɛ'n, nzuewe ´kun amun. Amun `nian, min sufuɛ'm bé wun ´kpaja be, sanngɛ amun liɛ'n, amún nyin ɔ ´gua ase.

¹⁴ Be klun ´jɔ lele tratra su, i ti be ´bo sro, sanngɛ amun liɛ'n, nyrɛnnɛn b'ɔ wa tɔ amun su'n ti amun ´kplin. Yɛ awlaboɛ b'ɔ ´kun amun kpo'n ti, amun ´fɛfɛ.

¹⁵ Sɛ amun wu'n, min sufuɛ nga be ´ka amún sin wa'n, be ´fa amun dunman'n yɛ be ´fa wa sran'm be amuɛn-ɔn. Be ´se kɛ: Man Anannganman kun wɔ kɛ sran nga sa annzɛ kɛ sran nga sa. Sanngɛ min sufuɛ'm be liɛ'n, m ´man be dunman uflɛ .

¹⁶ Mɛn'n nga nun wa'n, be nga be klo kɛ be `yra be nguan'n, be ´se kɛ be `bo min Nyanmiɛn bɔ n ti nanwlɛfuɛ'n min dunman yɛ be `fa yo-ɔ. Be nga be waan be ´ta nda'n, be ´bo min Nyanmiɛn bɔ n ti nanwlɛfuɛ'n min dunman yɛ be ´fa ta-a .› » «Bé wla wa fi laa nyrɛnnɛn liɛ mun, n su wun-man nyrɛnnɛn sɔ mun kun.

Nyanmiɛn su lɔ uflɛ nin asiɛ uflɛ

¹⁷ Afin n wa yi nyanmiɛn ng'ɔ la nglo lɔ plaii'n, nin asiɛ'n be uflɛ. Kɛ ɔ ko yo sɔ'n, be su bo-man laa sa'm be su be di-man jɔlɛ kun. Be su bu-man be akunndan kun .

¹⁸ Man amun klun jɔ, yɛ man amún wun blibli amun cɛn'n kwlakwla like nga n wa yi be'n be ti. N wa yi Zerizalɛm kun bɔ i nun ɔ ´yo fɛ, yɛ n wa yi nvle kun bɔ i nun sran nga be ´tran lɔ'n, be klun wa jɔ.

¹⁹ Zerizalɛm klɔ sɔ'n i ti mín wun wa kpaja min, yɛ min nvle'n i nunfuɛ'm be ti n klun wa jɔ . Be su ti-man sunlɛ nin kpankpanlɛ lɔ kun.

²⁰ Be su wun-man kɛ bakan ɔ ´wu i kaan nun lɔ kun, yɛ sran kpɛnngbɛn b'ɔ yo-man oke kɔ-man mmua b'ɔ wu'n, be su wun-mɛn i sɔ lɔ kun. Afin sɛ sran kun ´wu nan ɔ lɛ afuɛ ya'n, wuun be flɛ kɛ ɔ tɛ yo gbanflɛn annzɛ talua. Sran nga ɔ'a di-man afuɛ ya nan ɔ wu'n, wuun be se kɛ b'a bo i sannzan ti-ɔ.

²¹ Sɛ min sran'm be kplan sua'n, be ´tran be nun, sɛ be ta vinyi'n, be ´di i su mma.

²² Be su kplan-man sua be yaci man-man sran wie kɛ ɔ tran nun. Be su ta-man waka be yaci man-man sran uflɛ kɛ ɔ di i su mma. Afin min nvle'n nunfuɛ'm be ´cɛ cɛcɛcɛcɛ. Yɛ min sran kpa'm be ´di be bɔbɔ bé sa nuan ninnge'm be su.

²³ Be su fɛ-man ngbɛn, be su wu-man ba nan ba sɔ'm b'a wu be nyin bo lɛ. Afin be ´flɛ be nin be osu'n nunfuɛ'm be kɛ be bɔ Anannganman yo be ye'n.

²⁴ Yɛ m bɔbɔ n ´dun mmua n tɛ be su kwlaa nan b'a flɛ min, be nuan su tɔ-man nan m'an yo like nga be usa'n m'an man be.

²⁵ Blo alua nin bua'n be ´didi likawlɛ, asɔmɔli'n ɔ ´di ijre kɛ nannin sa, wuo'n kusu, ndutre yɛ ɔ ´di-ɔ. Be su yo-man sa tɛ, yɛ be su saci-man like min oka'n su.» Anannganman'n yɛ ɔ se sɔ-ɔ.