Ezai 64 - NYANMIƐN NDƐ'N 1998

¹ Sɛ a su jra wa'n, wuun a ´yo kɛ sin b'ɔ yra waka kee annzɛ b'ɔ yo man nzue'n ɔ tu'n sa. Sɛ a su jra wa'n, wuun a ´yi ɔ dunman'n i nglo kle ɔ kpɔfuɛ mun, wuun nvle-nvle'm be nunfuɛ'm be ´usu ɔ nyrun

² abonuan ninnge bɔ a ´yo be'n b'ɔ ´fu be nun'n ti. Sakpa, sɛ a su jra wa'n, wuun oka'm be ´keje sa gbugbugbu.

³ E nian ti-mɛn i le kɛ like uflɛ wie ɔ'a yo i sɔ sa ɔ'a man be nga be fa bé wla guɛ i su'n le, be nian kɛn-mɛn i sɔ nian kle-man ye le, e nian wun-mɛn i sɔ nin e nyinma le .

⁴ Be nga be tu be klun be yo ɔ klun sa'n, bɔ atin nga a kle be'n i su falɛ akunndan yɛ ɔ o be klun'n, a uka be. Sɛ a fali ya'n, é sa tɛ bɔ e yoli'n i ti-ɔ. ?Sanngɛ e ´yo sɛ yɛ e ´fite nun-ɔn?

⁵ E kwlaa y'a yo kɛ like fiɛn wie sa, yɛ é sa kpa nga e waan y'a yo be'n, be ti kɛ tralɛ bɔ mmoja ɔ'a guagua nun badaa'n sa. E kwlaa e glɔ kɛ waka nnya wie sa. Sɛ e ´kwla se'n, e sa tɛ'm be cuɛn e kɔ kɛ aunngban su fita nnya kee wie kɔ sa.

⁶ Sran fi kpan flɛ-man wɔ kun, ɔ kpɛn-man sran fi klun kɛ ɔ `fɛ i wun mantan wɔ, afin a kaci ɔ́ sin si ye, yɛ a yaci e lɛ man e sa tɛ'm be tin e su.

⁷ Ɔ nin sɔ'n ngba'n, Anannganman, a ti é si. E ti kɛ ufa sa, wɔ yɛ a ti ye ufuɛ-ɔ. E kwlaa e ti ɔ́ sa nuan like .

⁸ Anannganman, nán fa ya kpe nun, nán man sa tɛ nga e yo be'm be ´ka ɔ klun titi sɔ. Nian, e kwlaa e ti ɔ sran.

⁹ Ɔ klɔ'm b'a kaci kɛ aawlɛ flɛnnɛn sa, Siɔn a kaci kɛ aawlɛ flɛnnɛn sa, Zerizalɛm klɔ'n i su a tɔ srololo.

¹⁰ Sua bɔ i nun yɛ é si'm be su wɔ laa'n, e sua klanman beblebe sɔ'n, sin dili. Lika sɔ'n bɔ e go nun e klo-mɛn i'n, ɔ'a kaci sua'n nvuɛn.

¹¹ Anannganman, lika nvuɛn sɔ'n yɛ ɔ́ nyin tɛ i lɛ-ɔ. ?A ´tran lɛ sa ngbɛn? ?A su kan-man ndɛ fi? ?Nan a ´gua é nyin ase lele tra su?