Ezai 63 - NYANMIƐN NDƐ'N 1998

Klunngbɔ tulɛ cɛn'n

¹ ?Wan yɛ ɔ fin Bɔzra b'ɔ ti Edɔm mɛn'n i famiɛn klɔ'n su lɔ ba-a, b'ɔ wla tralɛ ɔkwlɛ youun nin-ɔn? Ɔ wla tralɛ dan kun b'ɔ ti klanman kpa, ɔ ´nanti-ɔ, i ti'n man su, ɔ nanti fanngan su. Anannganman waan: «Min bɔbɔ-ɔ, min bɔ n kan ndɛ i nuan su nin-ɔn, min bɔ n lɛ sran'm be delɛ'n i wun fanngan nin-ɔn.

² ?Ɔ yo sɛ ti yɛ ɔ tralɛ'm be ti ɔkwlɛ-ɔ? ?Ɔ yo sɛ ti yɛ like tata ɔ́ wun ninnge'm be nun kɛ sran b'ɔ cuɛn vinyi mma nzue sa-a?

³ Min ngunmin yɛ n dili junman vinyi mma nzue yiwlɛ lɔ-ɔ, nvle'm be nun sran ba kun sa a uka-man min. Kɛ n fali ya'n, n tiatiali be su, n wɛtɛli be. Be mmoja'n, ɔ nyrɛn guali mín wun tralɛ'm be nun, i ti yɛ man be yoli fiɛn nin-ɔn.

⁴ Afin ɔ o min anwlɛn'n nun kɛ n ´tu min klunngbɔ cɛn kun. Blɛ'n ɔ'a ju kɛ n de min sran mun.

⁵ N nian-niannin, m'an nyan-man sran b'ɔ ´uka min-ɔn, i sɔ'n boli min wla. Kɛ bɔ m'an nyan-man sran'n, i ti n sili min wue'n nun kɛ m bɔbɔ n ´yo, kpɛkuun ya bɔ n fali'n, ɔ mannin min i yolɛ'n i wun akpue.

⁶ Kɛ n fali ya'n, n wɛtɛli sran wie mun. N fali ya dan, i ti n yoli man be kacili kɛ sran bɔ nzan ɔ'a bo be sa. Yɛ n guali be mmoja'n i ase.»

Anannganman i klun-ufue'n i wun ndɛ

⁷ N ´kan Anannganman i klun-ufue b'ɔ ti'n i wun ndɛ, n ´kan n ´flan nun. Yɛ n ´kan ye b'ɔ yo ye'n, b'ɔ i ti yɛ e mɛnmɛn i'n, i kwlaa i wun ndɛ. Yɛ n ´kɛn i klun-ufue b'ɔ yi i nglo Izraɛlfuɛ'm be lika'n i wun ndɛ. Like ng'ɔ yoli mannin be i klolɛ'n nin i klun-ufue dan'n ti, n ´kɛn i kwlaa i wun ndɛ.

⁸ Ɔ seli kɛ: «Be ti min nvle'n nunfuɛ mun, be ti ba bɔ be kpɛ-man gblɛ.» Ɔ yoli be defuɛ.

⁹ Ɔ deli be nyrɛnnɛn'n b'ɔ o bé su'n i nun. Be nyrɛnnɛn sɔ'n, ɔ kacili i bɔbɔ liɛ wie. I klolɛ'n nin i aunnvuɛ silɛ'n ti'n, i bɔbɔ ɔ kpɔli bé ti. Laa, ɔ niannin be lika, yɛ sɛ n ´kwlaa se'n, ɔ suali be i sa su cɛn'n kwlakwla.

¹⁰ Sanngɛ be yoli nyin kekle, be boli Nyanmiɛn i Wawɛ'n i wla. Nyanmiɛn ɔ'a klo-man be sa kun, kpɛkuun i bɔbɔ yɛ ɔ nin be kunnin siɛn nin-ɔn.

¹¹ Yɛ i nvle nunfuɛ'm bé wla kpɛnnin laa blɛ'n nin Moiz be su-ɔ. Be waan: «?Sran ng'ɔ fɛli i nvle'n nunfuɛ mun nin be sunianfuɛ mun jenvie'n nun fiteli'n, ɔ o nin? ?Sran ng'ɔ fɛli i Wawɛ'n sieli be afiɛn'n, ɔ o nin?

¹² Ɔ fɛli i sa b'ɔ yo nyɛnmɛn'n ɔ suannin Moiz i sa fama'n i bo. Ɔ kpacili nzue'n nun be nyrun, ɔ man ɔ nyannin dunman b'ɔ nunnun-man'n.

¹³ Ɔ fali be sinnin jenvie'n i bo kploun'n nun kɛ nnɛn kpanngɔ su wanndi aawlɛ flɛnnɛn nun'n sa, b'a bo-man nvaka.

¹⁴ Anannganman i Wawɛ'n fali be ɔli wunmiɛn delɛ kɛ nnɛn bɔ be kɔ kongo'n nun lɔ'n sa.» Kɛ a dunnin mmua ɔ nvle'n nunfuɛ'm be nyrun kɛ nga sa, yɛ kɛ ɔ dunman'n ɔ fuli klanman kɛ nga sa.

Srɛwa tantrantan'n

¹⁵ Kɛ a o ɔ sua klanman'n nun nyanmiɛn su lɔ'n, nian sa bɔ be ju e su'n. ?Ɔ klolɛ dan'n nin ɔ fanngan'n be o nin? Ɔ wun b'ɔ usu wɔ ye ti'n, yɛ aunnvuɛ bɔ a si ye'n, e wun-mɛn i sɔ kun.

¹⁶ Sanngɛ wɔ yɛ a ti é si nin-ɔn, Abraam si-man ye, Zakɔb kusu si-man ye. Wɔ Anannganman yɛ a ti é si nin-ɔn. Kɛ ɔ fin lalaa'n, be flɛ wɔ kɛ E Ti Kpɔfuɛ.

¹⁷ ?Anannganman, ɔ yo sɛ ti yɛ a yo man e wlan-wlan vaa bɔ e fa-man wɔ atin nin-ɔn? ?Ɔ yo sɛ ti yɛ a kete ye anwlɛn'n bɔ e sro-man wɔ nin-ɔn? E bɔ e ti ɔ sufuɛ mun'n, bɔ e ti ɔ liɛ'n, e dunman nun ti, sa ɔ́ sin bla.

¹⁸ E bɔ e ti ɔ nvle'n nunfuɛ mun'n, e trannin mɛn nga nun wa blɛ kaan sa. E kpɔfuɛ'm be sacili ɔ sua'n.

¹⁹ Kɛ e yoli kɛ sran'm bɔ a sie-man be'n nan ɔ dunman nun-man be su sa'n, ɔ'a cɛ kpa. Sɛ ɔ ti kɛ a su kpaci nyanmiɛn'n b'ɔ la nglo lɔ plaii'n nun'n yɛ a su jra wa'n, wuun oka'm be ´keje ɔ nyrun sa gbugbugbu.